1 የሱሲ፥ “ታኒ ህንተዉ ቱማ ኦዳይስ፤ ዶርሳ ግርበ ግዶ ፐንገራ ግዶና ሀራሶራ ገልያ ኦንካ ካይሶነ ፓንጋ። 2 ሽን ፐንገራ ገለይስ ዶርሳታ ሄመይሳ። 3 ፐንግያ ናገይስ እያዉ ፐንግያ ዶዬስ፤ ዶርሳትካ እያ ቃላ ስኦሶና። እ ባ ዶርሳታ ኤንታ ሱንꬃን ሱንꬃን ፄጌስ፤ ኤንታ ካለꬅድ ካረ ከሴስ። 4 እ ባ ዶርሳታ ካረ ከስዳፐ ጉየ ኤንታ ስንꬃን ሄመቴስ። ኤንቲ እያ ቃላ ኤርያ ግሾ እያ ካሎሶና። 5 ሀራ ኡራ ቃላ ኤንቲ ኤሮና ግሾ እያፐ ባቃቶሶናፐ አትሽን፥ እያ ጌዶ ካሎኮና” ያግስ።

6 የሱሲ ኤንታዉ ሀ ሌምሱዋ ኦድስ፥ ሽን እ አይ ግዳኮ ኤንቲ አኬክቦኮና።

7 ዛሪድ የሱሲ ኤንታኮ፥ “ታኒ ህንተዉ ቱማ ኦዳይስ፤ ታኒ ዶርሳታስ ፐንገ። 8 ታፐ ስን ይዳ ኡባይ ካይሶነ ፓንጋ፥ ሽን ዶርሳት ኤንታ ስእቦኮና። 9 ፐንገይ ታና፤ ታ ባጋራ ገልያ ኦንካ አታና። እ ታ ባጋራ ገላናነ ከያና፤ ሎኦ ሄመትያ በሲ ደማና። 10 ካይሶይ ካይሶታናዉ፥ ሹካናዉነ ꬋይሳናዉ ዬስፐ አትሽን፥ ሀራባስ ዬና። ታኒ ኤንታዉ ደኦይ ዳና መላነ ኩምድ ፓላሀና መላ ያስ።

11 “ታኒ ሎኦ ሄንꬃንቾ፤ ሎኦ ሄንꬃንቾይ ባ ዶርሳታ ግሾ ባ ሸምፑዋ አꬅድ እሜስ። 12 ኡነ ሄምያ አስ ዶርሳታ ጎዳነ ሄንꬃንቾ ግዶና ግሾ ሱꬉመይ ያ ዎደ በእድ ዶርሳታ አግድ ቤስ። ሄሳ ግሾ፥ ሱꬉመይ ዶርሳታ ኦይክድ ላሌስ። 13 ኡነ ሄመይስ ሚሸስ ሄምያ ግሾነ ዶርሳታባይ እያ ቆፍሶና ግሾ ዶርሳታ አግድ ባቃቴስ።

14-15 “ታኒ ሎኦ ሄንꬃንቾ። ታ አዋይ ታና ኤረይሳዳ ታንካ ታ አዋ ኤራይስ። ሄሳዳካ፥ ታኒ ታ ዶርሳታ ኤራይስ፤ ታ ዶርሳትካ ታና ኤሮሶና። ታኒ ታ ዶርሳታ ግሾ ታ ሸምፑዋ አꬃ እማይስ። ማቶ 11:27፤ ሉቃ 10:22. 16 ሀ ዉድያን ባይና ሀራ ዶርሳት ታዉ ደኦሶና። ታኒ ኤንታካ ኤሀናዉ በሴስ። ኤንቲ ታ ቃላ ስአና፤ ኤንቲ እስ ዉደ ግዳና፤ ሄንꬃንቾይካ እሱዋ።

17 “ታኒ ታ ሸምፑዋ አꬃ እማዳ ዛራ ኤክያ ግሾ ታ አዋይ ታና ዶሴስ። 18 ታ ዶሳዳ ታ ሸምፑዋ አꬃ እማይስፐ አትሽን፥ ታፐ ኦንካ ኤከና። ታኒ ታ ሸምፑዋ አꬃ እማናዉነ ዛራ ኤካናዉ ማት ታዉ ደኤስ። ታኒ ኦꬃና መላ ታ አዋይ ታና ኪትዳይስ ሀይሳ” ያግስ።

19 ሄሳ እ ግዳ ግሾ፥ አይሁደታ ግዶን ቃስካ ሻከተꬅ መትስ። 20 ኤንታፈ ዳርያ ባጋይ፥ “እያን ቱና አያናይ ደኤስ! እ ጎዬስ! እ ግያባ አይስ ስኤቲ?” ያግዶሶና።

21 ሀራት ቃስ፥ “ፃላሄይ ኦይክዳ አስ ሀይሳዳ ኦደተና። ቱና አያን ቆቀ አይፈ ፄልሳናዉ ዳንዳእዬ?” ያግዶሶና።

22 የሩሳላመን ፆሳ ኬꬃ አንጅስዳ ጋላሳታ ቦንችያ ባለይ ጋክስ፤ ሄ ዎደ ሳእ ባልጎ። 23 የሱሲ ፆሳ ኬꬃን ሶሎሞነ ባራንዳን ስመረቴስ። 24 አይሁደት የሱሳ ዩሾን ሺቅ ኤቅድ፥ “ኔኒ ኑና አዉደ ጋካናዉ ስራ ዎꬃኔ? ኔኒ ክርስቶሳ ግድኮ አነ ኑስ ጌሻዳ ኦዳ” ያግዶሶና።

25 የሱሲ ዛሪድ ኤንታኮ፥ “ታኒ ህንተዉ ኦዳስ፤ ሽን ታና አማነከታ። ታኒ ታ አዋይ ታዉ እምዳ ማታን ኦꬅያ ኦሶይ ታባ ማርካቴስ። 26 ሽን ታኒ ህንተዉ ኦድዳይሳዳ ህንተ ታ ዶርሰ ግዶና ግሾ አማነከታ። 27 ታ ዶርሳት ታ ቃላ ስኦሶና። ታኒ ኤንታ ኤራይስ፤ ኤንትካ ታና ካሎሶና። 28 ታኒ ኤንታዉ መርና ደኡዋ እማይስ፤ ኤንቲ ኡባራካ ꬋዮኮና። ኦንካ ታ ኩሸፐ ኤንታ ቦንቅ ኤካናዉ ዳንዳኤና። 29 ኤንታ ታዉ እምዳ ታ አዋይ ኡባፈ አꬌስ*ታ አዋይ ኡባፈ አꬌስ፦ እስ እስ በን ማፃፋት፥ “ታ አዋይ ታዉ እምዳ ኤንቲ ኡባፈ አꬎሶና” ያጎሶና። ኦንካ ታ አዋ ኩሸፐ ኤንታ ቦንቅ ኤካናዉ ዳንዳኤና። 30 ታነ ታ አዋይ እስኖ” ያግስ።

31 አይሁደት የሱሳ ጫዳናዉ ቃስካ ሹች ደንꬅዶሶና። 32 የሱሲ ኤንታኮ፥ “ታኒ ኦꬃና መላ ታ አዋይ ታዉ እምዳ ዳሮ ሎኦ ኦሶታ ህንተና ኦꬃ በሳስ። ሄሳታፐ አዉሳ ግሾ ታና ሹቻን ጫዳናዉ ኮዬቲ?” ያግስ።

33 አይሁደት ዛሪድ፥ “ኑኒ ነና ነ ሎኦ ኦሶ ግሾ ሹቻን ጫዳናዉ ኮዮኮ። ሽን ኔኒ ፆሳ ጫይያ ግሾነ አሰ ግዳሸ ኔኒ፥ ነና ፆሰ ግያ ግሾሳ” ያግዶሶና። ሌወ 24:16.

34 የሱሲ ዛሪድ፥ “ጌሻ ማፃፋን ፆሳይ፥ ‘ህንተ ፆሳታ’ ግዳይስ ፃፈትቤኔ?ማዝ 82:6. 35 ጌሻ ማፃፋይ መርናዉ ላመተና። ፆሳይ ባ ቃላ እምዳ አሳታ፥ ‘ፆሳታ’ ግድ ፄግኮ፥ 36 አዋይ ዶርድ ሀ አላምያ ኪትዳ ታና ፆሳ ናአ ዋትድ ‘ፆሳ ጫያሳ’ ያገቲ? 37 ታኒ ታ አዋይ ኦይሳ ኦꬆና እፅኮ ታና አማኖፕተ። 38 ሽን ታኒ ኦꬅያባ ግድኮ ህንተ ታና አማኖና እፅኮካ፥ ታ አዋይ ታናን ደኤይሳነ ታካ ታ አዋን ደኤይሳ ህንተ ኤራና መላ ታ ኦሱዋ አማንተ” ያግስ።

39 ቃስካ ኤንቲ እያ ኦይካናዉ ኮይዶሶና፥ ሽን እ ኤንታፈ ከስ ኤክስ።

40 ዮሃንስ ካሰ ፃማቅያ በሳ፥ ዮርዳኖሰ ሻፋፐ ሄፍንꬅ የሱሲ ፕንድ ያን ደእስ። ዮሀ 1:28. 41 ዳሮ አሳይ የሱሳኮ ይድ፥ “ዮሃንስ ማላታ ኦꬅቤና፥ ሽን እ ሀ አድያባ ኦድዳባይ ኡባይ ቱማ” ያግዶሶና። 42 ያን ዳሮ አሳይ የሱሳ አማንዶሶና።