1 ብታነ ጉታን አላዛራ ጌተትያ እስ አደይ ሀርገትስ። ብታነይ ማይራማነ እ ምችያ ማርታ ደእያ ጉታ። ሉቃ 10:38-39. 2 ሄ ማይራማ ጎዳ ቶሁዋ ሽቶ ትያዳ ባ ብናናን እያ ቶሁዋ ቁችዳሮ። ሀርገትዳይ እ እሻ አላዛራ። ዮሀ 12:3. 3 ሄሳ ግሾ፥ ምቸት፥ “ጎዳዉ፥ ነ ዶሰይስ ሀርገትስ” ግድ የሱሳኮ ኪትዶሶና።

4 የሱሲ ሄሳ ስእዳ ዎደ፥ “ሀ ሀርገይ፥ ፆሳይነ እያ ናአይ ቦንቸታና መላፐ አትሽን፥ ሀይቆስ ጋꬅያ ሀርገ ግደና” ያግስ።

5 የሱሲ ማርታ፥ እ ምችዉነ አላዛራ ዶሴስ። 6 ሽን አላዛር ሀርግዳይሳ የሱሲ ስእድ ባ ደእያ በሳን ናምኡ ጋላስ ጋምእስ። 7 ሄሳፈ ጉየ፥ የሱሲ ባ ታማረታኮ፥ “ዛሪድ ይሁዳ ቢታ ቦስ” ያግስ።

8 እያ ታማረት ዛሪድ፥ “አስታማርያዉ፥ ጉꬃ ዎደፐ ካሰ አይሁደት ነና ሹቻን ጫድድ ዎꬋናዉ ኮይዶሶና፤ ሀእካ ያ ባኔ?” ያግዶሶና።

9 የሱሲ፥ “እስ ጋላሳን ታማነ ናምኡ ሳተይ ደኤስ ግደነዬ? ጋላስ ሄመትያ አስ ሀ አላምያ ፖኡዋ በእያ ግሾ ꬉበተና። 10 ሽን ቃማ ሄመትያ ኦንካ ፖኦይ ባይና ግሾ፥ ꬉበቴስ” ያግስ። 11 የሱሲ ሄሳ ግዳፐ ጉየ ኤንታኮ፥ “ኑ ዶስያ አላዛር ꬍስክስ፥ ሽን እያ ደንꬃናዉ ታኒ ባና” ያግስ።

12 እያ ታማረት ዛሪድ፥ “ጎዳዉ፥ እ ꬍስክዳባ ግድኮ እያዉ ሎአና” ያግዶሶና።

13 የሱሲ አላዛር ሀይቅዳይሳ ኦድስ፥ ሽን ኤንታዉ ጮ ꬍስኮ ዳንስ። 14 ሄሳ ግሾ፥ የሱሲ ጌሽድ ኤንታኮ፥ “አላዛር ሀይቅስ። 15 ህንተ አማናና መላ ታኒ ሄ በሳን ደኦናይሳስ ህንተ ግሾ ኡፋይታይስ። አነ የꬍተ፤ እያኮ ቦስ” ያግስ።

16 ሄሳፈ ጉየ፥ ድድሞሳ *ድድሞሳ፦ ጉሳይ መንተ ጉሱ። ጌተትያ ቶማስ ባ ላገ ታማረታኮ፥ “አስታማርያራ ሀይቃናዉ ኑካ ቦስ” ያግስ።

17 የሱሲ ጋክያ ዎደ አላዛር ሞገትን ኦይዱ ጋላስ ግድስ። 18 ብታነይ የሩሳላመፐ ሄꬑ ክሎ ምትረ መላ ሃኬስ። 19 ዳሮ አይሁደት ማርታነ ማይራሞ ኤንታ እሻይ ሀይቅዳይሳስ ምንꬃናዉ ይዶሶና።

20 ማርታ የሱሲ ይዳይሳ ስአዳ እያ ሞካናዉ ከያሱ፥ ሽን ማይራማ ሶን አታሱ። 21 ማርታ የሱሳኮ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን። 22 ሽን ሀእ ግድኮካ ኔኒ ዎስያባ ፆሳይ ነዉ እማናይሳ ታኒ ኤራይስ” ያጋሱ።

23 የሱሲ፥ “ነ እሻይ ሀይቆፐ ደንዳና” ያግስ።

24 ማርታ እያኮ፥ “ዉርሰꬃ ጋላስ እ ሀይቆፐ ደንዳናይሳ ኤራይስ” ያጋሱ።

25 የሱሲ ኢኮ፥ “ታኒ ደንዶነ ደኦ፤ ታና አማንያ ኦንካ ሀይቅኮካ ደኦን ዳና። 26 ቃስ ደኦን ደኤይነ ታና አማንያ ኦንካ ሀይቀና። ሄሳ ኔኒ አማናይ?” ያግስ።

27 ማርታ ዛራዳ፥ “ጎዳዉ፥ ኤ ታኒ አማናይስ! ኔኒ ፆሳ ናኣ፥ አላምያ ያናዉ ደእያ ክርስቶሳ ግደይሳ ታኒ አማናይስ” ያጋሱ።

28 ማርታ ሄሳ ግዳፐ ጉየ፥ ባዳ ባ ምችዉ ጌማን ፄጋዳ፥ “አስታማረይ ይድ ነና ኮዬስ” ያጋሱ። 29 ማይራማ ሄሳ ስእዳ ዎደ ኤለሳ ደንዳ ኤቃዳ የሱሳኮ ባሱ። 30 ሄ ሳተን የሱሲ ማርታራ ጋሄትዳ በሳን ደኤስ፤ ቡሮ ጉታ ጋክቤና። 31 ማይራሞ ምንꬅሸ ኢራ ሶን ደእያ አይሁደት፥ እያ ደንዳ ኤቃዳ ኤለሳዳ ካረ ከይዳይሳ በእድ፥ ዱፎ ባዳ ዬካናዉ ሀንያ ዳንን እዮ ካልድ ከይዶሶና።

32 ማይራማ የሱሲ ደእያሱዋ ባዳ እያ በእዳ ዎደ እያ ቶሁዋ ቦላ ኩንዳዳ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን” ያጋሱ።

33 የሱሲ ማይራማነ ኢራ ደእያ፥ አይሁደት ዬከይሳ በእድ፥ ባ ዎዛናን ዳሮ ሴለትድ፥ 34 “አዉን ሞግደቲ?” ያግድ ኦይችን፥ “ጎዳዉ፥ ያዳ በአ” ያግድ ዛርዶሶና።

35 የሱሲ አፉፅስ። 36 ሄሳ ግሾ፥ አይሁደት፥ “እ አላዛራ አይ መላ ዶስያኮ በእተ” ያግዶሶና።

37 ሽን ኤንታፈ እሶት እሶት፥ “ሀይስ ቆቅያ ፄልስዳይስ ሀ አደይ ሀይቆና መላ ኦꬃናዉ ዳንዳኤነሽን?” ያግዶሶና።

38 ቃስካ የሱሲ ሴለትድ፥ አላዛር ሞገትዳ ዱፉዋ ብስ። ሄ ዱፎይ ሹቻን ጎርደትዳ ጎንጎሎ። 39 የሱሲ፥ “ሹቻ ደንꬅተ” ያግድ ኪትስ።

ማርታ፥ “ጎዳዉ፥ እ ሀይቆሳፐ ኦይዱ ጋላስ ግድዳ ግሾ፥ ሀእ ፅንቃና” ያጋሱ።

40 የሱሲ ማርታኮ፥ “ነ አማንያባ ግድኮ ፆሳ ቦንቹዋ በአናይሳ ታኒ ነዉ ኦዳብክና?” ያግስ። 41 ኤንቲ ሹቻ ደንꬅን የሱሲ ሳሎ ፑደ ፄልድ፥ “አዋዉ፥ ታና ነ ስእዳ ግሾ ነና ጋላታይስ። 42 ነ ኡባ ዎደ ታና ስኤይሳ ታኒ ኤራይስ። ሽን ሀይሳን ኤቅዳ አሳይ ኔኒ ታና ኪትዳይሳ አማናና መላ ታኒ ኤንታ ግሾ ሀይሳ ጋይስ” ያግስ። 43 የሱሲ ሄሳ ግዳፐ ጉየ፥ ባ ቃላ ꬎቁ ኦꬅድ፥ “አላዛራ፥ ሃ ከያ!” ያግስ። 44 ሀይቅዳ አደይ ዚትዳ መላ ኩሸይነ ቶሆይ ሻሎን ቃሸትድ ደእሽን እያ አይፈይ ካረይ ጎዘትዳ መላ ዱፉዋፐ ከይስ። የሱሲ ኤንታ፥ “ብርሽተ፥ ቦ ጊተ!” ያግስ።

45 ሄሳ ግሾ፥ ማይራምኮ ይዳ አይሁደታፐ ዳሮት የሱሲ ኦꬅዳይሳ በእድ እያ አማንዶሶና። 46 ሽን ኤንታፈ እሶት እሶት ፋርሳወታኮ ብድ የሱሲ ኦꬅዳይሳ ኤንታዉ ኦድዶሶና። 47 ሄሳፈ ጉየ፥ ካህነ ሀላቃትነ ፋርሳወት ሻንጉዋ ሺሽድ፥ “ሀ አደይ ዳሮ ማላታታ ኦꬅያ ግሾ ኑ አይ ኦꬅኖ? 48 ኑኒ እያ ስእ ግድ አግኮ አሳ ኡባይ እያ አማናና። ቃስ ሮመ ቢታ አሳት ይድ ኑ ፆሳ ኬꬃነ ኑ ደርያ ꬋይሳና” ያግዶሶና።

49 ኤንታፈ እሶይ ቃያፋ ገይስ፥ ሄ ላይꬅ ካህነ ሀላቃ ግድዳይስ፥ “ህንተ አይኮካ ኤረከታ! 50 አሳ ኡባይ ꬋየይሳፈ አሳ ኡባ ግሾ እስ አስ ሀይቀይስ ሎኦ ግደይሳ ኤረከቲ?” ያግስ። 51 እ ሄሳ ባፐ ግቤና። ሽን ሄ ላይꬅ ካህነ ሀላቃ ግድያ ግሾ፥ የሱሲ አይሁደ አሳ ግሾ ሀይቃናዉ በሰይሳ ትንብተ ኦድስ። 52 ቃስ የሱሲ አይሁደ አሳ ፃላላስ ግዶናሽን ላለትድ ደእያ ፆሳ አሳ ኡባ እስፈ ሺሻናዉነ እስ አስ ኦꬃናዉ ሀይቃና።

53 ሄ ጋላሳፐ ዶምድ ኤንቲ እያ ዎꬋናዉ ማቀትዶሶና። 54 ሄሳ ግሾ፥ የሱሲ አይሁደታ ግዶን ቆንጨን ስመረትቤና። ሽን መላ ቢታ ማታን ደእያ ኤፍሬማ ጉታ ብስ። ባ ታማረታራ ሄ በሳን ጋምእስ።

55 አይሁደት ቦንችያ ፓስካ ጋላሳይ ማትስ። ቃስ ዳሮ አሳይ ባንታና ጌሻናዉ ፓስካ ቦንችያ ጋላሳይ ጋካናፐ ስን ሄ ቢታፈ የሩሳላመ ብዶሶና። 56 ኤንቲ ፆሳ ኬꬃን ኤቅድ የሱሳ ዩሳ ናግያ ግሾ፥ “አይ ቆፔቲ? የሱሲ ባልያ ቦንቻናዉ ዬኔ?” ያግድ እሶይ እሱዋ ኦይችዶሶና። 57 ካህነ ሀላቃትነ ፋርሳወት የሱሳ ኦይካናዉ፥ እ ደእያሱዋ ኤርያ ኦንካ ባንታዉ ኦዳና መላ ኪትዶሶና።