1 የሱሲ ባ ታማረታኮ፥ “ህንተ ዎዛናይ ኡንኤቶፎ፥ ፆሳ አማንተ፥ ታናካ አማንተ። 2 ታ አዋ ኬꬃን ዳሮ በሲ ደኤስ። ታኒ ህንተዉ በሰ ጊግሳናዉ ባይስ። ሄሳ ግዶናኮ ታኒ ህንተዉ ኦድከሽን። 3 ታኒ ባዳ በሰ ጊግስዳፐ ጉየ፥ ታኒ ደእያሱዋን ህንተ ዳና መላ ስማ ያዳ ህንተና ታኮ ኤፋና። 4 ህንተ ታኒ ብያ በሳ ኤፍያ ኦግያ ኤሬታ” ያግስ።

5 ያትን፥ ቶማስ፥ “ጎዳዉ፥ ኔኒ ብያ በሳ ኑኒ ኤሮኮ፤ ኦግያ ዋትድ ኤራናዉ ዳንዳአኔ?” ያግስ።

6 የሱሲ ዛሪድ፥ “ኦገይ፥ ቱማይነ ደኦይ ታና። ታ ባጋራ ግዶና እፅኮ ኦንካ ታ አዋኮ ባናዉ ዳንዳኤና። 7 ህንተ ታና ኤርያባ ግድያኮ፥ ታ አዋካ ኤራና። ሽን ህዛፐ ዶምድ ህንተ እያ ኤሬታነ እያ በእደታ” ያግስ።

8 ፍልጶስ የሱሳኮ፥ “ጎዳዉ፥ አዋ ኑና በሳ፤ ሄስ ኑስ ግዳና” ያግስ።

9 የሱሲ ዛሪድ፥ “ታኒ ሀይሳ መላ ዎደ ህንተራ ደእንካ ታና ኤርኪ? ታና በእዳ ኡራይ አዋካ በእስ። ያትን፥ ኔኒ ዎይጋዳ፥ ‘አዋ ኑና በሳ’ ጋይ? 10 ታኒ አዋራ እስኖ ግደይሳነ አዋይካ ታራ እስኖ ግደይሳ ኔኒ አማንክዬ? ታኒ ህንተዉ ኦድያ ቃላ ታኒ ታፐ ኦድከ፥ ሽን ታናን ደእያ አዋይ ባ ኦሱዋ ኦꬄስ። 11 ታኒ አዋን ደኤይሳነ አዋይካ ታናን ደኤይሳ አማንተ። ሄሳ አማኖና እፅኮ ታ ኦꬅያባታን ታና አማንተ።

12 “ታኒ ህንተዉ ቱማ ኦዳይስ፤ ታና አማንያ ኡራይ ታኒ ኦꬅያ ኦሱዋፐ አꬍያ ኦሶ ኦꬃና። ታኒ አዋኮ ብያ ግሾ ታና አማንያ ኦንካ ሀይሳፈ አꬍያ ኦሶ ኦꬃና። 13 አዋይ ናኣ ባጋራ ቦንቸታና መላ ታ ሱንꬃን ህንተ ዎስያ ኡባ ታ ህንተዉ ኦꬃና። 14 ታ ሱንꬃን አይብባካ ህንተ ኦይችኮ ታ ህንተዉ ኦꬃና።

15 “ህንተ ታና ዶስኮ ታ ኪታ ናጋና። 16 ታኒ አዋ ዎሳና፤ ህንተራ መርናዉ ዳና መላ ምንይሳ ህንተዉ እማና። 17 ሄ አያናይ ፆሳ ቱማ ቆንጭሴስ። ሀ አላምያ አሳይ እያ በኦና ግሾነ ኤሮና ግሾ እያ ኤካናዉ ዳንዳኦኮና። ሽን እ ህንተራ ደእያ ግሾነ ህንተ ግዶን ዳና ግሾ ህንተ እያ ኤሬታ።

18 “ታኒ ህንተና አይያ አዉ ባይና ናአዳ ህንተ ፃላላ አግከ፤ ስማዳ ህንተኮ ያና። 19 ጉꬃ ዎደፐ ጉየ አላመይ ታና ዛር በኤና፥ ሽን ህንተ በአና። ታኒ ደኦን ደእያ ግሾ ህንተካ ደኦን ደአና። 20 ታኒ ታ አዋን፥ ህንተ ታናን፥ ቃስ ታኒ ህንተናን ደኤይሳ ህንተ ሄ ጋላስ ኤራና።

21 “ታ ኪታ ኤክድ ናገይ ታና ዶሴስ። ታና ዶሰይሳ ታ አዋይካ ዶሴስ፤ ታንካ እያ ዶሳይስ፤ ታኒ እያዉ ቆንጫና” ያግስ።

22 አስቆሮታ ይሁዳ ግዶና ይሁድ የሱሳኮ፥ “ጎዳዉ፥ ኔኒ ዋታዳ አላምያስ ግዶናሽን ኑስ ነና ቆንጭሳኔ?” ያግስ።

23 የሱሲ ዛሪድ፥ “ታና ዶስያ ኦንካ ታ ቃላስ ኪተታና። ታ አዋይ እያ ዶሳና። ቃስ ታ አዋይነ ታኒ እያኮ ይድ እያራ ዳና። 24 ታና ዶሶና ኦንካ ታ ቃላስ ኪተተና። ህንተ ስእያ ቃላይ ታና ኪትዳ አዋባፐ አትሽን፥ ታባ ግደና።

25 “ታኒ ህንተራ ሀእ ደአሸ ሄሳ ህንተዉ ኦዳስ። 26 ሽን አዋይ ታ ሱንꬃን ኪታና ምንꬅያ ጌሻ አያናይ፥ ህንተና ኡባባ ታማርሳና። ታኒ ህንተዉ ኦድዳ ኡባ እ ህንተና ሀሳይሳና።

27 “ሳሮተꬃ ህንተዉ እማና። ታኒ ታ ሳሮተꬃ ህንተዉ እማና። ታ እምያ ሳሮተꬃይ አላመይ እምያ ሳሮተꬃ መላ ግደና። ሄሳ ግሾ፥ ኡንኤቶፍተ፥ ያዮፍተ። 28 ‘ታኒ ባና፥ ሽን ስማዳ ህንተኮ ያና’ ግዳይሳ ስእደታ። ህንተ ታና ቱማ ዶስያባ ግድያኮ ታ አዋይ ታፐ አꬍያ ግሾ ታኒ እያኮ በይሳን ህንተ ኡፋይታና። 29 ሄስ ሀንያ ዎደ ህንተ አማናና መላ ሄስ ሀኖና ደእሽን ስንꬃታዳ ታኒ ህንተዉ ኦዳስ።

30 “ሀ አላምያ ሃረይስ ያ ግሾ ህዛፐ ጉየ ህንተራ ዳሮ ኦደትከ። ታና እ አይኮካ ኦꬃናዉ ዳንዳኤና። 31 ሽን ታኒ አዋ ዶሰይሳ አላመይ ኤራና መላ ታ አዋይ ታና ኪትዳይሳ ኡባ ኦꬃይስ። ደንድተ፤ ሀይሳፈ ቦስ።