1 ፓስካ ቦንችያ ጋላሳይ ጋካናፐ ስንꬃትድ ሀ አላምያ አግድ አዋኮ ብያ ዎደይ ጋክዳይሳ የሱሲ ኤርስ። ሀ አላምያን ደእያ ባ አሳ ኡባ ዎደ ዶስስ፤ ዉርሰꬅ ጋካናዉካ ኤንታ ዶስስ።

2 የሱሳራነ እያ ታማረታራ እስፈ ካሆ ሞሶና። ሄሳፈ ካሰ ፃላሄይ ስሞና ናኣ አስቆሮታ ይሁድ የሱሳ አꬅድ እማናዳ እያ ዎዛናን ኢታ ቆፋ ዎꬅስ። 3 የሱሲ አዋይ ኡባባ እያ ኩሸን ዎꬅዳይሳ፥ እ ፆሳ ማታፐ ይዳይሳነ ስሚድ እያኮ ባናይሳ ኤርስ። 4 የሱሲ ጋይታ ቦላፈ ደንድድ ቦላ ባጋ ማኡዋ ቃር ዎꬅድ፥ ፖፃ ኤክድ ባ ፄሳን ማርፃፍስ። 5 ሄሳፈ ጉየ፥ ሃ ሜቻ ሚሸን ትግድ፥ ባ ታማረታ ቶሁዋ ሜጭስ፤ ቃስ ባ ፄሳን ዳንጭዳ ፖፃን ቁችስ።

6 የሱሲ ስሞና ጰፅሮሳኮ ያ ዎደ ጰፅሮስ፥ “ጎዳዉ፥ ነ ታ ቶሁዋ ሜጫኔ?” ያግስ።

7 የሱሲ ዛሪድ እያኮ፥ “ታኒ ኦይሳ ነ ሀእ ኤራካ፥ ሽን ጉየፐ አኬካና” ያግስ።

8 ያትን፥ ጰፅሮስ፥ “ነ ታ ቶሁዋ ኡባራካ ሜጫካ” ያግስ።

የሱሲ እያኮ፥ “ታኒ ነ ቶሁዋ ሜጮና እፅኮ ነዉነ ታዉነ እስፈተꬅ ባዋ” ያግስ።

9 ጰፅሮስ የሱሳኮ፥ “ጎዳዉ፥ ያትኮ፥ ታ ቶሁዋ ፃላላ ግዶናሽን ታ ኩሽያነ ታ ሁጵያ ሜጫ” ያግስ።

10 የሱሲ ዛሪድ፥ “ቦላ ሜጨትዳ ኦንካ ቶሆፐ ሀራባ ሜጨታናዉ ኮሸና፤ እያዉ ኡባሶይ ጌሽ። ህንተ ጌሽ፥ ሽን ኡባይ ጌሽ ግደከታ” ያግስ። 11 የሱሲ ባና አꬅድ እማና ኡራይ ኦነኮ ኤርያ ግሾ፥ “ህንተ ኡባይ ጌሽ ግደከታ” ያግስ።

12 ኤንታ ቶሁዋ ሜጭዳፐ ጉየ፥ የሱሲ ባ ማኡዋ ዛር ማእስ። ስም ጋይታ ቦላ ኡትድ ኤንታኮ፥ “ታኒ ህንተዉ ኦꬅዳይሳ አኬከቲ?ሉቃ 22:27. 13 ህንተ ታና አስታማረነ ጎዳ ጌታ፤ ታኒ ህንተ ገይሳ ግድያ ግሾ ሎኦ ግደታ። 14 ታኒ ህንተዉ ጎዳነ አስታማረ ግዳሸ ህንተ ቶሁዋ ሜጭኮ ህንተካ እሶይ እሱዋስ ሄሳዳ ኦꬃናዉ በሴስ። 15 ህዛ፥ ታኒ ህንተዉ ኦꬅዳይሳዳ ህንተካ ኦꬃና መላ ህንተዉ ሌምሶ ግዳስ። 16 ታኒ ህንተዉ ቱማ ኦዳይስ፤ አይለይ ባ ጎዳፐ፥ ኪተትዳይስ ኪትዳይሳፈ አና።ማቶ 10:24፤ ሉቃ 6:40፤ ዮሀ 15:20. 17 ህንተ ሄሳ ኤርድ ኦꬅያባ ግድኮ አንጀትዳይሳታ።

18 “ታኒ ህንተና ኡባ ጊከ፤ ታኒ ዶርዳይሳታ ኤራይስ። ሽን ጌሻ ማፃፋን፥ ‘ታ ባርስዳይስ ታ ኩሽያ ሳፅስ’ ጌተትዳይስ ቱማ ግዳናዉ በሴስ። ማዝ 41:9. 19 ‘ታኒ ታና ግደይሳ’ ህንተ አማናና መላ ሄስ ሀናናፐ ስንꬃታዳ ህንተዉ ኦዳይስ። 20 ታኒ ህንተዉ ቱማ ኦዳይስ፤ ታኒ ኪትዳ ኦናካ ሞክያ ኡራይ ታና ሞኬስ። ታና ሞክያ ኦንካ ታና ኪትዳይሳ ሞኬስ” ያግስ። ማቶ 10:40፤ ማር 9:37፤ ሉቃ 9:48፤ 10:16.

21 የሱሲ ሄሳ ኦድዳፐ ጉየ፥ ባ ዎዛናን ዳሮ ኡንኤትድ፥ “ታኒ ህንተዉ ቱማ ኦዳይስ፤ ታና ህንተፈ እሶይ አꬅድ እማና” ግድ ቆንጭስድ ኦድስ።

22 እ ኦደባ ኦድያኮ እያ ታማረታስ ኤረቶና እፅን እሶይ እሱዋ ፄልዶሶና። 23 እያ ታማረታፐ እሶይ፥ የሱሲ ዶሰይስ፥ የሱሳ ማታን ኡትስ። 24 ሄሳ ግሾ፥ ስሞን ጰፅሮስ እያ ቃምኦትድ፥ “እ ኦና ግያኮ አነ ኦይቻ” ያግስ።

25 ሄሳ ግሾ፥ ሄ ታማረይ የሱሳኮ ሺቅድ ሀይꬃን፥ “ጎዳዉ፥ እ ኦኔ?” ያግስ።

26 የሱሲ ዛሪድ፥ “ታኒ ኡይꬃ ዎፀን ቱሻዳ ባርሰይሳ” ያግስ። ቃስ ኡይꬃ መንꬅ ኤክድ፥ ዎፀን ቱሽድ፥ ስሞና ናኣ አስቆሮታ ይሁዳ ባርስስ። 27 ይሁድ ኡይꬃ ባርዳፐ ጉየ፥ ፃላሄይ ኤለስድ ይሁዳን ገልስ። የሱሲ እያኮ፥ “ኔኒ ኦꬃናዉ ቆፕዳባ ኤለሳዳ ኦꬃ” ያግስ። 28 ሽን ጋይታ ቦላ ኡትዳይሳታፐ ኦንካ የሱሲ ሄሳ አይስ እያኮ ግዳኮ ኤርቤና። 29 ይሁድ ሚሸ ኦይክያ ግሾ፥ እያ ታማረታፐ እሶት እሶት የሱሲ እያ፥ “ፓስካ ቦንችያ ጋላሳስ ባንታዉ ኮሽያባ ሻማ ዎይኮ ማንቆታስ ሙፃታ እማ ግስ” ያግድ ቆፕዶሶና።

30 ይሁድ ኡይꬃ ባርዳ መላ ኤለስድ ካረ ከይስ። ሄ ዎደ ሳእ ቃማ።

31 ይሁድ ካረ ከይዳፐ ጉየ፥ የሱሲ፥ “ሀእ አሳ ናአይ ቦንቸትስ፤ ፆሳይካ እያ ባጋራ ቦንቸትስ። 32 ፆሳይ እያ ባጋራ ቦንቸትኮ እ ባ ሁጰን አሳ ናኣ ቦንቻና፤ ቃስ እ ሄሳ ኤለስድ ኦꬃና። 33 ታ ናይቶ፥ ታኒ ህንተራ ዳሮ ዎደ ጋምእከ። ህንተ ታና ኮያና፥ ሽን ታኒ አይሁደታስ ኦድዳይሳ መላ፥ ‘ህንተ ታኒ ብያ በሳ ባናዉ ዳንዳኤከታ።’ዮሀ 7:34. 34 ታኒ ህንተዉ እምያ ኦራꬃ ኪታይ ሀይሳ፤ እሶይ እሱዋ ዶስተ። ታኒ ህንተና ዶስዳይሳዳ ህንተ እሶይ እሱዋ ዶሳናዉ በሴስ። ዮሀ 15:12፥ 17፤ 1 ዮሀ 3:23፤ 2 ዮሀ 5. 35 ህንተ እሶይ እሱዋራ ዶሰትኮ ህንተ ታ ታማረ ግደይሳ አሳ ኡባይ ኤራና” ያግስ።

36 ስሞን ጰፅሮስ የሱሳኮ፥ “ጎዳዉ፥ ኔኒ አዉ ባይ?” ያግስ።

የሱሲ ዛሪድ፥ “ታኒ ብያ በሳ ኔኒ ሀእ ካላናዉ ዳንዳአካ፥ ሽን ጉየፐ ታና ካላና” ያግስ።

37 ጰፅሮስ፥ “ጎዳዉ፥ ታኒ ነና ሀእ ካላናዉ አይስ ዳንዳእክና? ታኒ ነ ግሾ፥ ሀይቃናዉካ ጊጋ ኡታስ” ያግስ።

38 የሱሲ ዛሪድ፥ “ታ ግሾ ሀይቃናዉ ቱማ ጊጋ ኡታዲ? ታኒ ነዉ ቱማ ኦዳይስ፤ ኩቶይ ዋሳናፐ ስን ኔኒ ታና ሄꬑ ቶሆ ካዳና” ያግስ።