1 “ታኒ ሄሳ ህንተ አማኖይ ꬋዮና መላ ህንተዉ ኦዳስ። 2 ኤንቲ ህንተና አይሁደ ዎሳ ኬꬃታፐ ከስ የዳና። ሄሳዳካ፥ ህንተና ዎꬍያ ኦንካ ፆሲ ኮያባ ኦꬅያ ዳንያ ዎደይ ያና። 3 ኤንቲ ሄሳ ህንተ ቦላ ኦይ ታና ዎይኮ አዋ ኤሮና ግሾሳ። 4 ሽን ኤንቲ ሄሳ ህንተ ቦላ ኦꬅያ ዎደይ ጋክያ ዎደ ታኒ ህንተዉ ኦድዳይሳ ህንተ አኬካና መላ ታኒ ህንተዉ ሀይሳ ኦዳስ።

“ስንꬃታዳ ታኒ ሀይሳ ህንተዉ ኦዶና ጋምእዳይ ታ ህንተራ ደእያ ግሾሳ። 5 ሽን ሀእ ታኒ ታና ኪትዳይሳኮ ባይስ፤ ህንተፈ ኦንካ፥ ‘አዉ ባይ?’ ግድ ታና ኦይቸይ ባዋ። 6 ሽን ታኒ ሄሳ ኦድዳ ግሾ፥ ህንተ ዎዛናን ዳሮ አዛኖይ ደኤስ። 7 ሽን ታኒ ህንተዉ ቱማ ኦዳይስ፤ ታኒ ቢኮ ህንተዉ ሎኦ። አይስ ጊኮ፥ ታኒ ቦና እፅኮ ምንይስ ህንተኮ ዬና። ሽን ታኒ ቢኮ እያ ህንተኮ የዳና። 8 ምንይስ ይድ፥ ናጋራባ፥ ፅሎተꬃባነ ፕርዳባ ሀ አላምያ አሳ ኤርሳና። 9 ናጋራባይ፥ አሳይ ታና አማኖና ግሾሳ። 10 ፅሎተꬃባይ፥ ታኒ አዋኮ ብያ ግሾነ ህንተ ታና ዛር በኦና ግሾሳ። 11 ፕርዳባይ፥ ቃስ አላምያ ሃረይስ ፕርደትዳ ግሾሳ።

12 “ታኒ ህንተዉ ኦድያባይ ዳሮባይ ደኤስ፥ ሽን ሀእ ህንተዉ ገለና። 13 ቱማ አያናይ ያ ዎደ ህንተና ቱማተꬃ ኡባኮ ካለꬃና። እ ስእዳባ ኦዴስፐ አትሽን፥ ባፐ አይብባካ ኦደና። ቃስ ስንꬃፈ ያናባ ህንተዉ እ ኦዳና። 14 እ ታዉ ደኤይሳፈ ኤክድ ህንተዉ ኦድያ ግሾ እ ታና ቦንቻና። 15 አዋስ ደእያባ ኡባይ ታባ፤ ‘ምንይስ ታዉ ደኤይሳፈ ኤክድ ህንተዉ ኦዳና’ ታኒ ግዳይ ሄሳሳ።

16 “ጉꬃ ዎደፐ ጉየ ታና በኤከታ፤ ቃስ ጉꬃ ዎደፐ ጉየ ህንተ ታና በአና” ያግስ።

17 እያ ታማረታፐ እሶት እሶት ባንታ ግዶን፥ “ጉꬃ ዎደፐ ጉየ ህንተ ታና በኤከታ፤ ቃስ ጉꬃ ዎደፐ ጉየ ህንተ ታና በአና፤ ቃስካ ታኒ አዋኮ ባይስ ጉሳይ ዎይ ጉሴ?” ያግዶሶና። 18 “ጉꬃ ዎደፐ ጉየ ገይስ ዎይ ጉሴ? እ አይ ኦደትያኮ ኑስ ኤረተና” ያግዶሶና።

19 ኤንቲ ባና ኦይቻናዉ ኮየይሳ የሱሲ ኤርድ፥ “ታኒ፥ ‘ጉꬃ ዎደፐ ጉየ ታና በኤከታ፤ ቃስ ጉꬃ ዎደፐ ጉየ ህንተ ታና በአና’ ግዳይሳስ ህንተ እሶይ እሱዋ ኦይቼቲ? 20 ታኒ ህንተዉ ቱማ ኦዳይስ፤ ህንተ ዬካናነ አፉፃና፥ ሽን ሀ አላመይ ኡፋይታና። ሀእ ህንተ አዛናና፥ ሽን ህንተ አዛኖይ ኡፋይሳን ላመታና። 21 እስ ማጫስያ ናአ የላና ሀንያ ዎደ ባ የሎ ዎደይ ጋክዳ ግሾ ህርጋዉሱ። ሽን ናአ የልዳፐ ጉየ ናእ ሀ አላምያን የለትዳ ኡፋይሳ ግሾ ባ ኡንኣ ዶጋዉሱ። 22 ሄሳዳካ፥ ህንተካ ህንተ ዎዛናን አዛኔታ፥ ሽን ታኒ ህንተና ዛራዳ በአና። ህንተ ዎዛናይ ዳሮ ኡፋይታና፤ ሄ ኡፋይሳ ኦንካ ህንተፈ ኤከና።

23 “ሄ ጋላስ ህንተ ታና አይብባካ ዎሰከታ። ታኒ ህንተዉ ቱማ ኦዳይስ፤ ህንተ ታ ሱንꬃን ዎስያባ ኡባ አዋይ ህንተዉ እማና። 24 ሀእ ጋካናዉ ታ ሱንꬃን አይብባካ ዎስበከታ። ህንተ ኡፋይሳይ ፖሎ ግዳና መላ ፆሳ ዎስተ፤ ህንተ ኤካና።

25 “ታኒ ሀእ ጋካናዉ ህንተዉ ሌምሶን ኦዳስ፥ ህዛፐ ታኒ ሌምሶን ኦዶና ዎደይ ያና። ሽን አዋባ ታኒ ህንተዉ ቆንጨን ኦዳና። 26 ሄ ጋላስ ህንተ ታ ሱንꬃን አዋ ዎሳና፤ ህንተ ግሾ ታኒ አዋ ዎስከ። 27 አይስ ጊኮ፥ አዋይ ባ ሁጰን ህንተና ዶሴስ። ህንተ ታና ዶስያ ግሾነ ታኒ አዋ ማታፐ ይዳይሳ አማንዳ ግሾ፥ እ ህንተና ዶሴስ። 28 ታኒ አዋ ማታፐ ሀ አላምያ ያስ፤ ቃስ አላምያ አጋዳ አዋኮ ባና” ያግስ።

29 እያ ታማረት ዛሪድ፥ “ሄኮ፥ ሀእ ኔኒ ቆንጨን ኦዳሳ፤ ሌምሶን አይኮካ ኦዳካ። 30 ኔኒ ኡባባ ኤረይሳ ኑኒ ሀእ ኤሮስ፤ ቃስ ነና ኦንካ ኦይቻና መላ ኔኒ ኮያካ። ሄስ ኑና ኔኒ ፆሳፈ ኪተትዳይሳ አማንꬄስ” ያግዶሶና።

31 ያትን፥ የሱሲ ዛሪድ ኤንታኮ፥ “ሀእ አማነቲ? 32 ሄኮ፥ ህንተ፥ ህንተ ሶ ህንተ ሶ ላለትያ ዎደይነ ታ ፃላላ የግ አግድ ባቃትያ ዎደይ ያና፤ ሀእካ ይክችስ። ሽን አዋይ ታራ ደእያ ግሾ ታኒ ታ ፃላላ ግድከ። 33 ህንተ ታራ ደእሸ ሳሮይ ህንተዉ ዳና መላ ታኒ ሄሳ ኦዳስ። አላመን ደእሸ ህንተ ዋየታና። ሽን ምንተ፤ ታኒ አላምያ ፆናስ” ያግስ።