1 የሱሲ ሄሳ ኦድዳፐ ጉየ ፑደ ሳሎ ፄልድ፥ ሀይሳዳ ያግስ፦ “አዋዉ፥ ሳተይ ጋክስ፤ ነ ናአይ ነና ቦንቻና መላ ኔኒ ነ ናኣ ቦንቻ። 2 ኔኒ እያዉ እምዳ ኡባስ እ መርና ደኡዋ እማና መላ አሳ ኡባ ቦላ እያዉ ማታ እማዳሳ። 3 መርና ደኦይ፥ ነና፥ እስ ቱማ ፆሳነ ነ ኪትዳ የሱስ ክርስቶሳ ኤሮ። 4 ኔኒ ታ ኦꬃና መላ እምዳ ኦሱዋ ፖላዳ ነና ሳአን ቦንቻስ። 5 ሀእካ፥ አዋዉ፥ አላመይ መታናፐ ስን ነ ማታን ታዉ ደእያ ቦንቹዋን ታና ቦንቻ።

6 “አላምያ አሳፐ ኔኒ ታዉ እምዳይሳታ ነና ኤርሳስ። ኤንቲ ነይሳታ፤ ኔኒ ኤንታ ታዉ እማዳሳ። ኤንቲ ነ ቃላስካ ኪተትዶሶና። 7 ኔኒ ታዉ እምዳ ኡባባይ ኔፐ ይዳይሳ ኤንቲ ሀእ ኤሮሶና። 8 ኔኒ ታዉ እምዳ ቃላ ታኒ ኤንታዉ እማስ፤ ኤንትካ ሄ ቃላ ኤክዶሶና። ታኒ ነ ማታፐ ይዳይስ ቱማ ግደይሳ ኤርድ ኔኒ ታና ኪትዳይሳካ አማንዶሶና።

9 “ታኒ ኤንታዉ ዎሳይስ። ኤንቲ ነይሳታ ግድያ ግሾ ኔኒ ታዉ እምዳ አሳስ ዎሳይስፐ አትሽን፥ አላምያስ ዎስከ። 10 ታዉ ደእያ ኡባባይ ነባ፤ ነዉ ደእያ ኡባይካ ታባ። ታኒ ኤንታ ባጋራ ቦንቸታስ። 11 ታኒ ህዛፐ ጉየ አላምያን ደእከ፤ ኤንቲ አላመን ደኦሶና። ታኒ ሀእ ኔኮ ባይስ። ጌሻ አዋዉ፥ ሀ ኔኒ ታዉ እምዳይሳት ኔራነ ታራ እስኖ ግድዳይሳዳ ኤንቲ እስኖ ግዳና መላ ኤንታ ነ ታዉ እምዳ ነ ሱንꬃን ናጋ። 12 ታኒ ኤንታራ ሳአን ደአሸ፥ ነ ታዉ እምዳ ነ ሱንꬃ ዎልቃን ኤንታ ናጋስ። ጌሻ ማፃፋይ ግዳይስ ፖለታና መላ ꬋዮይ በሲያ ኡራፐ አትሽን፥ ኤንታፈ ሀር ኦንካ ꬋይቤና።ማዝ 41:9፤ ዮሀ 13:18.

13 “ሀእ ታኒ ኔኮ ባይስ። ታ ኡፋይሳይ ኤንታ ዎዛናን ፖሎ ግዳና መላ ሀይሳ ታኒ አላመን ደአሸ ኦዳይስ። 14 ታኒ ኤንታዉ ነ ቃላ እማስ። ታኒ አላምያፐ ግዶናይሳዳ፥ ኤንትካ አላሚያፐ ግዶና ግሾ፥ አላመይ ኤንታ እፅስ። 15 ኔኒ ፃላሄፐ ኤንታ ናጋና መላፐ አትሽን፥ አላመፐ ከሳና መላ ዎስከ። 16 ታኒ አላመፐ ግዶናይሳዳ ኤንትካ አላመፐ ግዶኮና። 17 ኔኒ ነ ቱማተꬃን ኤንታ ነባ ኦꬃ፤ ነ ቃላይካ ቱማ። 18 ኔኒ ታና አላምያ ኪትዳይሳዳ ታንካ ኤንታ አላምያ ኪታስ። 19 ቃስ ኤንቲ ቱማ ነባ ግዳና መላ ኤንታ ግሾ ታኒ ታ ሁጵያ ነዉ እማይስ።

20 “ታኒ ኤንታ ፃላላስ ግዶናሽን ኤንቲ ቃላ ኦድን፥ ታና አማናናይሳታስካ ዎሳይስ። 21 ኤንቲ ኡባይ እስኖ ግዳና መላ ታኒ ዎሳይስ። አዋዉ፥ ነ ታናን ደኤይሳዳ፥ ቃስ ታ ነናን ደኤይሳዳ ኤንቲ ኑናን ዳና መላ ዎሳይስ። ሄ ዎደ ኔኒ ታና ኪትዳይሳ አላመይ አማናና። 22 ኔንነ ታኒ እስኖ ግደይሳዳ፥ ኤንቲ እስኖ ግዳና መላ፥ ኔኒ ታና ቦንችዳይሳዳ፥ ታንካ ኤንታ ቦንቻስ። 23 ታኒ ኤንታን፥ ኔኒ ታናን ደኤይሳዳ ኤንቲ ፖሎ እስኖ ግዳና መላ ነና ዎሳይስ። ሄስካ፥ ነ ታና ኪትዳይሳነ ነ ታና ዶስዳ ዶሱዋን ኤንታ ሲቅዳይሳ አላመይ ኤራን መላሳ።

24 “አዋዉ፥ ኔኒ ታዉ እምዳይሳት ታኒ ደእያሱዋን ታራ ዳና መላ ኮያይስ። አላመይ መታናፐ ስን ኔኒ ታና ዶስዳ ግሾ፥ ታዉ እምዳ ታ ቦንቹዋ ኤንቲ በአና።

25 “ጌሻ አዋዉ፥ አላመይ ነና ኤረና፥ ሽን ታኒ ኤራይስ። ቃስ ኔኒ ታና ኪትዳይሳ ሀይሳቲ ኤሮሶና። 26 ኔኒ ታና ሲቅዳ ሲቆይ ኤንታናን ዳና መላ፥ ቃስ ታኒ ኤንታናን ግዳና መላ፥ ታኒ ነ ሱንꬃ ኤንታ ኤርሳስ፤ ስንꬃስካ ኤርሳና” ያግስ።