1 የሱሲ ዎሳ ኦንግዳፐ ጉየ፥ ባ ታማረታራ ቀድሮና ዛንጋራ ፕንድ፥ ሄ በሳን ደእያ አታክልትያ ግዶ ገልዶሶና። 2 የሱሲ ኡባ ዎደ ባ ታማረታራ ያን ሺቅያ ግሾ የሱሳ አꬅድ እምዳ ይሁድ ሄ በሳ ኤሬስ። 3 ሄሳ ግሾ፥ ይሁድ ፓኖሰ፥ ፆምፐ፥ ቶራነ ጎንዳለ ኦይክዳ ዳሮ ዎታዳረታ፥ ካህነ ሀላቃትነ ፋርሳወት ኪትዳ ፆሳ ኬꬃ ናግያ ዎታዳረታ ካለꬅ ኤክድ፥ ሄ በሳ ብስ።

4 የሱሲ ባና ጋካና ሀንያባ ኡባ ኤርድ፥ ጋፃ ከይድ፥ “ኦና ኮዬቲ?” ያግስ።

5 ኤንቲ ዛሪድ፥ “ናዝረተ የሱሳ ኮዮስ” ያግዶሶና።

እ ዛሪድ፥ “ታኒ የሱሳ” ያግስ።

የሱሳ አꬅድ እምዳ ይሁድ ያን ኤንታራ ኤቅስ። 6 እ፥ “ታኒ የሱሳ” ግዳ ዎደ ኤንቲ ጉየ ሺቅድ፥ ሳአን ኩንድዶሶና። 7 የሱሲ ቃስካ፥ “ኦና ኮዬቲ?” ያግድ ኦይችስ።

ኤንቲ፥ “ናዝረተ የሱሳ ኮዮስ” ያግዶሶና።

8 እ ዛሪድ፥ “ታኒ የሱሳ ግደይሳ ህንተዉ ኦዳስ። ህዛ፥ ህንተ ታና ኮያባ ግድኮ ሀይሳታ የድተ” ያግስ። 9 እ ሄሳ ግዳይ፥ “አዋዉ፥ ኔኒ ታዉ እምዳይሳታፐ ሀር አቶሽን እሱዋካ ꬋይሳብከ” ግዳይስ ፖለታና መላሳ።

10 ስሞን ጰፅሮሳስ ማሻይ ደኤስ። እ ሄ ማሻ ሾድድ ካህነ ሀላቃ አይልያስ ኡሻቻ ሀይꬃ ሾጭድ፥ ቃንፅ የግስ። ሄ አይልያ ሱንꬃይ ማልኮሳ። 11 የሱሲ ጰፅሮሳኮ፥ “ነ ማሻ ሾሁዋን ዛራ። ታ አዋይ ታዉ እምዳ ፁአፐ ታኒ ኡዮናባ ነዉ ዳኒ?” ያግስ። ማቶ 26:39፤ ማር 14:36፤ ሉቃ 22:42.

12 ሮመ ዎታዳረትነ ኤንታ ሀላቃይ ፆሳ ኬꬃ ናግያ ዎታዳረታራ እስፈ የሱሳ ኦይክድ ቃችዶሶና። 13 ኮይሮ የሱሳ ሃናኮ ኤፍዶሶና። ሃን ሄ ላይꬅ ካህነ ሀላቃ ግድያ ቃያፋ ቦሎ። 14 ቃያፍ፥ “አሳ ኡባ ግሾ፥ እስ አስ ሀይቅኮ ሎኦ” ግድ ካሰ አይሁደታ ዞርዳይሳ። ዮሀ 11:49-50.

15 ስሞን ጰፅሮስነ ሀራ እስ ታማረይ የሱሳ ካልድ ብዶሶና። ካህነ ሀላቃይ ሄ ሀራ ታማርያ ሎይꬅ ኤሬስ። ሄሳ ግሾ፥ እ የሱሳራ ካህነ ሀላቃ ዛባ ገልስ። 16 ሽን ጰፅሮስ ካረራ ድርሳ ፐንገን ኤቅስ። ካህነ ሀላቃይ ኤርያ ሀራ ታማረይ ካረ ከይድ፥ ፐንግያ ናግያ ናኤስ ኦድድ፥ ጰፅሮሳ ጋꬅ ገልስስ። 17 ፐንግያ ናግያ ናእያ ጰፅሮሳኮ፥ “ኔኒ፥ ሄ አድያ ታማረታፐ እሱዋ ግድኪ?” ያጋሱ።

ጰፅሮስ ዛሪድ፥ “አካይ፥ ታኒ ግድከ” ያግስ።

18 ሳአይ ሜግያ ግሾ፥ አይለትነ ናገይሳት ፂፋ ታማ ኤꬅድ፥ ካዮሶና። ጰፅሮስካ ኤንታራ ኤቅድ ታማ ካዬስ።

19 ካህነ ሀላቃይ የሱሳ፥ እያ ታማረታባነ እያ ትምርትያባ ኦይችስ። 20 የሱሲ ዛሪድ፥ “ታኒ አሳ ኡባስ ቆንጨን ኦዳስ። ታኒ አይሁደ ኡባይ ሺቅያ አይሁደ ዎሳ ኬꬃንነ ፆሳ ኬꬃን ኡባ ዎደ ታማርሳስ። ጌማን አይኮካ ኦዳብከ። 21 ያትን፥ ኔኒ ታና አይስ ኦይቻይ? ታ ኦድሽን ስእዳ አሳ ኦይቻ። ሄ አሳይ ታኒ ኦድዳይሳ ኤሮሶና” ያግስ።

22 የሱሲ ሄሳ ግዳ ዎደ፥ ሄ በሳን ኤቅዳ ዎታዳረታፐ እሶይ የሱሳ ባቅድ፥ “ካህነ ሀላቃስ ሀይሳዳ ዛራይ?” ያግስ።

23 የሱሲ ዛሪድ፥ “ታኒ ኢታባ ኦድዳባ ግድኮ ሀይሳን ደእያ አሳ ኡባ ስንꬃን ኦዳ። ሽን ታኒ ቱማ ኦድዳባ ግድኮ ታና አይስ ባቃይ?” ያግስ።

24 ሄሳ ግሾ፥ ሃን፥ የሱሲ ቃሸትዳ መላ ካህነ ሀላቃ ቃያፋኮ የድስ።

25 ጰፅሮስ ያን ኤቅድ፥ ታማ ካይሽን፥ ሀራት እያኮ፥ “ኔኒ ሀ አድያ ታማረታፐ እሱዋ ግድኪ?” ያግስ።

ጰፅሮስ ዛሪድ፥ “አካይ፥ ታኒ ግድከ” ያግድ ካድስ።

26 ካህነ ሀላቃ አይለታፐ እሶይ፥ ጰፅሮስ ሀይꬃ ቃንፅዳ አድያ ዳቦይ፥ ጰፅሮሳኮ፥ “ታኒ ነና እያራ አታክልትያ ግዶን በአብክና?” ያግድ ኦይችስ።

27 ጰፅሮስ ቃስካ ካድስ፤ ኤለስድ ኩቶይ ዋስ አግስ።

28 ዎንታ ጉራ፥ ኤንቲ የሱሳ ቃያፋ ሶፐ ደርያ ሃረይሳ ኦሶ ኬꬅ ኤክ ኤፍዶሶና። አይሁደት ፓስካ ባኣለ ካꬃ ማናዉ ባንታና ቱንሶና መላ ደርያ ሃረይሳ ኦሶ ኬꬃ ገልቦኮና። 29 ሄሳ ግሾ፥ ጵላፆስ ኤንታኮ ካረ ከይድ፥ “ሀ አድያ አይስ ሞተቲ?” ያግስ።

30 ኤንቲ፥ “እ ኢታ ኦꬆናባ ግድያኮ ኑኒ እያ ኔኮ ኤሆኮ” ያግዶሶና።

31 ጵላፆስ ዛሪድ፥ “ህንተ እያ ኤክ ኤፍድ፥ ህንተ ህገይ ገይሳዳ እያ ቦላ ፕርድተ” ያግስ።

አይሁደት፥ “ኦናካ ዎꬍያ ማት ኑስ ባዋ” ያግዶሶና፤ 32 ሄስ ሀንዳይ የሱሲ አይ መላ ሀይቆ ሀይቃነኮ ኤርሳናዉ ኦድዳይስ ፖለታናሳ። ዮሀ 3:14፤ 12:32.

33 ጵላፆስ ባ ኦሶ ኬꬃ ዛር ገልድ፥ የሱሳ ፄግድ፥ “ኔኒ አይሁደ ካዎ?” ያግድ ኦይችስ።

34 የሱሲ ጵላፆሳ፥ “ሀ ኦይሻ ኔኒ ኔፐ ኦይቻየ ዎይኮ ሀራ አስ ነዉ ታባ ኦድዴ?” ያግስ።

35 ጵላፆስ ዛሪድ፥ “ታ አይሁደ አሴ? ነ አሳይነ ካህነ ሀላቃት ነና ታዉ አꬅድ እምዶሶና። ነ አይ ኦꬃዲ?” ያግስ።

36 የሱሲ፥ “ታ ካዎተꬃይ ሀ አላምያና ግደና። እ ሀይሳን ግድያኮ ታ አይሁደታ ሀላቃታስ አꬋዳ እመቶና መላ ታ አይለት ታዉ ኦለታና። ሽን ታ ካዎተꬃይ ሀ አላምያና ግደና” ያግስ።

37 ሄሳ ግሾ፥ ጵላፆስ የሱሳኮ፥ “ያትን፥ ኔኒ ካዎዬ?” ያግድ ኦይችስ።

የሱሲ ዛሪድ፥ “ቱማ ታ ካዎ ግደይሳ ነ ጋዳሳ። ታኒ የለትዳይነ ሀ አላምያ ይዳይ ቱማተꬃስ ማርካታናሳ። ቱማ ባጋ ግድዳ ኦንካ ታኒ ገይሳ ስኤስ” ያግስ።

38 ጵላፆስ፥ “ቱም አይቤ?” ያግስ።

ጵላፆስ ሄሳ ግዳፐ ጉየ አይሁደታኮ ካረ ከይድ፥ “ታኒ እያፐ አይ ኢታካ ደማብከ። 39 ሽን ፓስካ ባኣለ ጋላስ፥ እስ አሰ ህንተዉ ቃሾፐ ብልያ ሜዘይ ደኤስ። ታኒ ህንተዉ አይሁደታ ካዋ ብላና መላ ኮዬቲ?” ያግስ።

40 ኤንቲ ዛሪድ፥ ባንታ ቃላ ꬎቁ ኦꬅድ፥ “ባርባና ብላፈ አትሽን፥ እያ ግደና” ያግዶሶና። ሽን ባርባን ፓንጋ።