19
የሱሲ ቶሸትስ
(ማቶ 27:27-32፤ ማር 15:15-21)
1 ሄሳፈ ጉየ፥ ጵላፆስ የሱሳ ጋራፍስስ። 2 ዎታዳረት አጉንꬃ ካላቻ መꬍድ እያ ሁጰን ዎꬅዶሶና። ቃስ ዞኦ ማኦ እያ ማይዝዶሶና። 3 እያኮ ሺቅድ፥ “አይሁደ ካዋዉ፥ መርናዉ ካዎታ” ያግድ እያ ባቅዶሶና።
4 ጵላፆስ ቃስካ ካረ ከይድ፥ አይሁደታኮ፥ “ሄኮ፥ ታኒ እያፐ አይ ኢታካ ደማቦናይሳ ህንተ ኤራና መላ እያ ህንተኮ ካረ ከሳና” ያግስ። 5 ሄሳፈ ጉየ፥ የሱሲ አጉንꬃ ካላቻ ባ ሁጰን ዎꬅድ፥ ዞኦ ማኦ ማእድ፥ ካረ ከይስ። ጵላፆስ አይሁደታኮ፥ “ኡራ ሀይሳ በእተ” ያግስ።
6 ካህነ ሀላቃትነ ፆሳ ኬꬃ ናገይሳት እያ በእዳ ዎደ፥ ባንታ ቃላ ꬎቁ ኦꬅድ፥ “ማስቃልያ ቦላ ካቃ! ካቃ!” ያግዶሶና።
ጵላፆስ ኤንታኮ፥ “ህንተ እያ ኤፍድ፥ ማስቃልያ ቦላ ካቅተ። ታኒ እያፐ አይ ኢታካ ደማብከ” ያግስ።
7 አይሁደት ዛሪድ፥ “ኑስ ህገይ ደኤስ። እ ባና ፆሳ ናአ ኦꬅዳ ግሾ ኑ ህግያꬆ እ ሀይቃናዉ በሴስ” ያግዶሶና።
8 ጵላፆስ ሄሳ ስእዳ ዎደ ካሰይሳፈ ዳሮ ያይስ። 9 ቃስካ ጵላፆስ ባ ኦሶ ኬꬅ ስም ገልድ የሱሳኮ፥ “ኔኒ አዉፐ ያዲ?” ያግድ ኦይችስ። ሽን የሱሲ እያዉ አይኮካ ዛርቤና። 10 ሄሳ ግሾ፥ ጵላፆስ፥ “ታዉ ኦድኪ? ነና ብላናዉ ዎይኮ ማስቃልያ ቦላ ካቃናዉ ታዉ ማት ደኤይሳ ኤርኪ?” ያግስ።
11 የሱሲ፥ “ፆሳይ ነዉ ማታ እምቦናባ ግድያኮ ታ ቦላ ማት ነዉ ዴናሽን። ሄሳ ግሾ፥ ታና ነዉ አꬅድ እምዳይስ አꬍያ ናጋራ ኦꬅስ” ያግስ።
የሱሲ ሀይቆ ፕርደትስ
(ማቶ 27:15-31፤ ማር 15:6-20፤ ሉቃ 23:13-25)
12 ጵላፆስ ሄሳ ስእዳ ዎደ የሱሳ ብላናዉ ኦገ ኮይስ። ሽን አይሁደት ባንታ ቃላ ꬎቁ ኦꬅድ፥ “ኔኒ እያ ብልያባ ግድኮ ካዋ ቄሳረ ባጋ ግዳካ። ባና ካዎ ግያ ኦንካ ቄሳረ ሞርከ” ያግዶሶና።
13 ጵላፆስ ሄሳ ስእድ የሱሳ ካረ ከስስ። ያትድ፥ “ሎቸ ሹች” ጌተትያ በሳን ፕርዳ ኦይድያን ኡትስ። እብራወꬆ ዶናን ሄ በሳይ “ጋባተ” ጉሱ። 14 ሄ ጋላሳይ ፓስካ ባኣለ ቦንቻናዉ ጊገተꬃ ጋላስ። ሳአይ ኡሱፑን ሳተ ሄራ። ጵላፆስ አይሁደታኮ፥ “ህንተ ካዋ ሀይሳ በእተ” ያግስ።
15 አይሁደት ባንታ ቃላ ꬎቁ ኦꬅድ፥ “ድጋ! ድጋ! ማስቃልያ ቦላ ካቃ” ያግዶሶና።
ጵላፆስ ዛሪድ፥ “ህንተ ካዋ ታኒ ማስቃልያ ቦላ ካቃናይሳ ኮዬቲ?” ያግድ ኦይችስ።
ካህነ ሀላቃት፥ “ቄሳረፐ ሀራ ካዎይ ኑስ ባዋ” ያግዶሶና።
16 ሄሳፈ ጉየ፥ ኤንቲ የሱሳ ማስቃልያ ቦላ ካቃና መላ ጵላፆስ ኤንታዉ አꬅድ እሚስ።
የሱሲ ካቀትስ
(ማቶ 27:32-44፤ ማር 15:21-32፤ ሉቃ 23:26-43)
ኤንቲ የሱሳ ኦይክድ ኤፍዶሶና። 17 የሱሲ ባ ማስቃልያ ቶክድ፥ “ሁጰ ጉገ” ጌተትያ በሳ ብስ። “ሁጰ ጉገ” ጉሳይ እብራወꬆ ዶናን “ጎልጎታ” ጉሱ። 18 ኤንቲ ሄ በሳን ማስቃልያ ቦላ የሱሳ ካቅዶሶና። ቃስ እያራ ሀራ ናምኡ አሳታ፥ እሱዋ ያ ባጋራ ሀንኩዋ ሀ ባጋራ ማስቃልያ ቦላ ካቅዶሶና። 19 ጵላፆስ፥ “አይሁደታ ካዋ፥ ናዝረተ የሱሳ” ግያ ፁፈ ፃፍድ ማስቃልያ ቦላ ዎꬅስ። 20 የሱሲ ማስቃልያ ቦላ ካቀትዳ በሳይ ካታማስ ማታን ደእያ ግሾ፥ ዳሮ አይሁደት ሄ ፁፍያ ናባብዶሶና። ፁፈይ ፃፈትዳይ እብራወꬆ ዶናን፥ ላትነ ዶናንነ ግርከ ዶናና። 21 ሄሳ ግሾ፥ ካህነ ሀላቃት ጵላፆሳኮ፥ “ ‘ሀ አደይ ባና አይሁደ ካዎ ያግስ’ ጋዳ ፃፋፐ አትሽን፥ ‘አይሁደ ካዎ’ ጋዳ ፃፎፓ” ያግዶሶና።
22 ያትን፥ ጵላፆስ፥ “ታ ፃፍዳይሳ ፃፋስ” ያግድ ዛርስ።
23 ዎታዳረት ማስቃልያ ቦላ እያ ካቅዳፐ ጉየ፥ እያ ማኡዋ ኤክድ፥ ኦይዱ በሳን ሻክድ፥ እሶ እሶ ኤክዶሶና። የዳ ማኤትያ እያ አዱሳ ማኡዋ ኤክዶሶና። 24 ዎታዳረት፥ “ኦና ጋካኔኮ፥ ሳማ የጋናፐ አትሽን፥ ማኡዋ ፔꬎኮ” ያግዶሶና። ሄስ ሀንዳይ ጌሻ ማፃፋን፥
“ታ ማኡዋ ሻክ ኤክዶሶና፤
ታ አዱሳ ማኡዋ ቦላካ ሳማ የግዶሶና”
ጌተትዳይስ ፖለታና መላሳ። ማዝ 22:18. ሄሳ ግሾ፥ ዎታዳረት ሄሳ ኦꬅዶሶና።
25 ሽን የሱሳ ማስቃልያ ማታን እያ አይያ፥ እያ አየ ምችያ፥ ቀልዮጰ ማችያ ማይራማነ ማግደላ ማይራማ ኤቅዶሶና። 26 የሱሲ ባ አይዉነ እ ዶስያ ታማረይ ያን ኤቅዳይሳታ በእድ፥ ባ አየኮ፥ “ታ አየ፥ ነ ናኣ ሀይሳ በአ” ያግስ።
27 ሄሳፈ ጉየ፥ ሄ ታማርያኮ፥ “ነ አይዉ ሀኖ በአ” ያግስ። ሄ ታማረይ እዮ ሄ ዎደፐ ዶምድ ባራ ዳና መላ ሶ ኤፍስ።
የሱሳ ሀይቁዋ
(ማቶ 27:45-56፤ ማር 15:33-41፤ ሉቃ 23:44-49)
28 ሄሳፈ ጉየ፥ የሱሲ ኡባይ ሀእ ፖለትዳይሳ ኤርድ፥ ጌሻ ማፃፋን ፃፈትዳይስ ፖለታና መላ “ታና ሳሜስ” ያግስ። ማዝ 69:21፤ 22:15.
29 ሄ በሳን እስ ፁጋ ኩመꬃ ጫላ ዎይነይ ደኤስ። ኤንቲ እስፖንጀ ሄ ዎይንያን የግድ፥ ህሶጰ ምꬃ ፄራን ዎꬅድ፥ የሱሳ ዶናኮ ሺሽዶሶና። 30 የሱሲ ዎይንያ ጋንፅ በእድ፥ “ፖለትስ” ያግስ።
ሄሳፈ ጉየ፥ ባ ሁጵያ ዝቅ ኦꬅድ ባ ሸምፑዋ እሚስ።
31 ሄ ጋላሳይ ጊገተꬃ ጋላስ ግድያ ግሾነ ዎንተꬃ ጋላሳይ ቦንቾ ሳምባታ ግድያ ግሾ፥ አሳታ አሀይ ማስቃልያ ቦላ ሳምባታ ጋላስ ፔኦና መላ ኤንታ ቶሁዋ መንꬅድ፥ ማስቃልያፐ ዎꬍሳና መላ አይሁደት ጵላፆሳ ዎስዶሶና። 32 ሄሳ ግሾ፥ ዎታዳረት ብድ፥ የሱሳራ ካቀትዳ ናምኡ አሳታ ቶሁዋ መንꬅዶሶና። 33 ሽን የሱሳኮ ይዳ ዎደ እ ሀይቅዳይሳ በእድ፥ እያ ቶሁዋ መንꬅቦኮና። 34 ሽን ዎታዳረታፐ እሶይ እያ ምያ ቶራን ጫድን ኢራካ ሱꬅነ ሃꬅ ጎግስ። 35 ህንተ አማናና መላ ሄሳ በእዳይስ ማርካትስ። እያ ማርካተꬃይካ ቱማ። ቃስ እ ኦደይስ ቱማ ግደይሳ ኤሬስ። 36 ሄስ ሀንዳይ ጌሻ ማፃፋይ፥ “እያ መቀꬃታፐ እሶይካ መቀና” ግዳይስ ፖለታና መላሳ። ከሳ 12:46፤ ታይቦ 9:12፤ ማዝ 34:20. 37 ቃስካ ጌሻ ማፃፋይ ሀራ በሳን፥ “ኤንቲ ባንታ ጫድዳይሳ በአና” ያጌስ። ዛካ 12:10፤ ቆን 1:7.
የሱሲ ሞገትስ
(ማቶ 27:57-61፤ ማር 15:42-47፤ ሉቃ 23:50-56)
38 ሄሳፈ ጉየ፥ አርማተ ካታማፐ ይዳ ዮሰፍ የሱሳ አሀ ኤካናዉ ጵላፆሳ ዎስስ። ዮሰፍ አይሁደታስ ያይዳ ግሾ ቆሳን የሱሳ ካለይሳ።
ጵላፆስ፥ “ኤካ” ያግስ። ሄሳ ግሾ፥ ዮሰፍ ብድ የሱሳ አሀ ኤክስ። 39 ቃስ ንቆድሞስ ሄሳፈ ካሰ የሱሳኮ ቃማ ይዳይስ፥ ካርበነ ጎዳረ ኡꬃራ ዋላከትዳ ሀስታማነ እስ ክሎ ግራመ ግድያ ሽቶ ኤክድ ዮሰፋራ ይስ። ዮሀ 3:1-2. 40 ሄ ናምኡ አሳት የሱሳ አሀ ኤክድ፥ አይሁደት አሀ ፃፅያ ማራን፥ ሽቶራ፥ ሞጎ አፍላን ፃፅዶሶና። 41 የሱሲ ማስቃልያ ቦላ ካቀትዳ በሳን ዳሮ አታክልተይ ደኤስ። ሄ አታክልትያ ግዶን ሹቻፈ ዎጨትድ ኦሰትዳ ቡሮ ኦንካ ሞገትቦና ኦራꬃ ዱፎይ ደኤስ። 42 ሄ ጎንጎሎይ ማታን ደእያ ግሾነ አይሁደት ሳምባታስ ጊገትያ ጋላስ ግድያ ግሾ፥ የሱሳ አሀ ያን ሞግዶሶና።