20
የሱሳ ሀይቆፐ ደንዱዋ
(ማቶ 28:1-8፤ ማር 16:1-8፤ ሉቃ 24:1-12)
1 ዎጋ ዎደ ዎንታ ቡሮ ጌዮና ደእሽን፥ ማግደላ ማይራማ፥ የሱሲ ሞገትዳ ዱፉዋ ባዳ ሹቻይ ሄ ዱፉዋ ዶናፐ ደንድዳይሳ በአሱ። 2 ስሞን ጰፅሮሳኮነ የሱሲ ዶስያ ሀንኮ ታማርያኮ ዎፃ ባዳ፥ “ዱፉዋፐ ጎዳ ኤፍዶሶና፤ እያ አዉን ዎꬅዳኮ ኑ ኤሮኮ” ያጋሱ።
3 ሄሳ ግሾ፥ ጰፅሮስነ ሀንኮ ታማረይ ከይድ ዱፉዋ ብዶሶና። 4 ናምአይካ እስፈ ዎፅዶሶና፥ ሽን ሀንኮ ታማረይ ጰፅሮሳፐ አꬍድ ስንꬃትድ ዱፉዋ ጋክስ። 5 ሄ ታማረይ ሆክድ፥ ሞጎ አፍላ በእስ፥ ሽን ዱፉዋን ዎꬍቤና። 6 ስሞን ጰፅሮስ እያ ካል ይድ፥ ዱፉዋን ዎꬍድ ሞጎ አፍላይ ያን ደኤይሳ በእስ። 7 ቃስ የሱሳ ሁጰን ፃፀትዳ አፍላይ ፃፀትዳ መላ ዱማ እስ በሳን ደኤይሳ በእስ። ሄ አፍላይ ዱማ ደኤስፐ አትሽን፥ ሞጎ አፍላራ እስፈ ዴና። 8 ሄ ዎደ፥ ስንꬃትድ ዱፉዋ ጋክዳ ሀንኮ ታማረይ ገል በእድ አማንስ። 9 የሱሲ ሀይቆፐ ደንዳናዉ በሰይሳ ኦድያ ጌሻ ማፃፋ ቃላ ኤንቲ ቡሮ አኬክቦኮና። 10 ሄሳፈ ጉየ፥ እያ ታማረት ባንታ ሶ ስም ብዶሶና።
የሱሲ ማግደላ ማይራምስ ቆንጭስ
(ማቶ 28:9-10፤ ማር 16:9-11)
11 ሽን ማይራማ ሄ ዱፉዋ ዶናን ኤቃዳ ዬካሸ ሆካዳ ዱፉዋ ግዶ ፄላሱ። 12 ቦꬃ ማኦ ማእዳ ናምኡ ኪታንቾት የሱሳ አሀይ ዝንእዳ በሳን እሶይ ሁጰሶራ ሀንኮይ ቶሆሶራ ኡትዳሽን በአሱ። 13 ኤንቲ ኢኮ፥ “ማጫሰተ፥ አይስ ዬካይ?” ያግድ ኦይችዶሶና።
እያ፥ “ኤንቲ ታ ጎዳ ኤፍዶሶና፤ ኤንቲ አዉን ዎꬅዳኮ ታኒ ኤርከ” ያጋሱ።
14 ሄሳ ግዳፐ ጉየ፥ እያ ጉየ ስማ ፄልያ ዎደ፥ የሱሲ ያን ኤቅዳይሳ በአሱ። ሽን እ የሱሳ ግድዳይሳ ኤራቡኩ። 15 የሱሲ ኢኮ፥ “ማጫሰተ፥ አይስ ዬካይ? ኦና ኮያይ?” ያግድ ኦይችስ።
ማይራማ አታክልተ ኦሳንቹዋ ዳንን፥ “ጎዳዉ፥ ነ ኤክዳባ ግድኮ፥ እያ አዉን ዎꬅዳኮ ታዉ ኦዳርኪ። ታኒ እያ ኤካና” ያጋሱ።
16 የሱሲ ኢኮ፥ “ማይራመ” ያግስ።
እያ እያኮ ስማዳ፥ እብራወꬆ ዶናን “ረቡን” ያጋሱ። ሄሳስ ብርሸꬃይ “አስታማርያዉ” ጉሱ።
17 የሱሲ ኢኮ፥ “ታኒ ቡሮ ታ አዋኮ ቦና ግሾ፥ ታና ኦይኮፋ። ሽን ታ እሻታኮ ባዳ፥ ‘ታኒ ታ አዋኮነ ህንተ አዋኮ፥ ታ ፆሳኮነ ህንተ ፆሳኮ፥ ስማና ግስ’ ጋዳ ኤንታዉ ኦዳ” ያግስ።
18 ማግደላ ማይራማ ጎዳ በእዳይሳነ እዉ ሄሳ እ ኦድዳይሳ ባዳ እያ ታማረታስ ኦዳሱ።
የሱሲ ባ ታማረታስ ቆንጭስ
(ማቶ 28:16-20፤ ማር 16:14-18፤ ሉቃ 24:36-49)
19 ዎጋ ዎደ ኦማርስ፥ እያ ታማረት አይሁደታስ ያይድ ካርያ ጎርድድ ሺቅ ኡትዳሽን፥ የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ። 20 ሄሳ ግድ ስሚድ ባ ኩሽያነ ባ ምያ ኤንታ በስስ። እያ ታማረት ጎዳ በእዳ ዎደ ዳሮ ኡፋይትዶሶና። 21 የሱሲ ዛሪድ ኤንታኮ፥ “ሳሮይ ህንተዉ ግዶ፤ ታ አዋይ ታና ኪትዳይሳዳ ታንካ ህንተና ኪታይስ” ያግስ። 22 ሄሳ ግዳፐ ጉየ፥ ኤንታ ቦላ ኡፉ ግድ ፑንስ። ቃስ፥ “ጌሻ አያና ኤክተ። 23 ህንተ አቶ ግዳ አሳ ናጋራይ አቶ ጌተታና። ህንተ አቶ ጎናይሳታ ናጋራይ አቶ ጌተተና” ያግስ። ማቶ 16:19፤ 18:18.
የሱሳነ ቶማሳ
24 ሽን ታማነ ናምኡ ታማረታፐ እሶይ፥ ድድሞሳ ጌተትያ ቶማስ፥ የሱሲ ይዳ ዎደ ኤንታራ ዴና። 25 ሄሳ ግሾ፥ ሀንኮ እያ ታማረት ቶማሳኮ፥ “ኑኒ ጎዳ በእዳ” ያግዶሶና።
ሽን ቶማስ ኤንታኮ፥ “ምስማረን እ ጫደትዳ እያ ኩሽያን ደእያ ቤታ በኦናነ ሄ ቤታ ታ ብራን ቦቾና፥ ቃስ ታ ኩሽያ እያ ምየን የዳ በኦና አማንከ” ያግስ።
26 ሳምንታፈ ጉየ፥ የሱሳ ታማረት ቃስካ ሶን ሺቅድ ኡትዶሶና፤ ቶማስካ ኤንታራ ደኤስ። ካረይ ጎርደትድ ደእሽን የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ። 27 ሄሳፈ ጉየ፥ የሱሲ ቶማሳኮ፥ “ታ ኩሽያ ነ ብራን ቦቻዳ በአ። ቃስ ነ ኩሽያ ታ ምይያን የዳ በአ። ኔኒ ስꬎፓ፥ አማና” ያግስ።
28 ቶማስ ዛሪድ፥ “ታ ጎዳዉ፥ ታ ፆሳዉ” ያግስ።
29 ያትን የሱሲ፥ “ኔኒ ታና በእዳ ግሾ አማናዳሳ፥ ሽን ታና በኦና አማንዳይሳት አንጀትዳይሳታ” ያግስ።
30 የሱሲ ሀ ማፃፋን ፃፈትቦና ሀራ ዳሮ ማላታታ ባ ታማረታ ስንꬃን ኦꬅስ። 31 ሽን የሱሲ እ ክርስቶሳ፥ ፆሳ ናኣ ግደይሳ ህንተ አማናና መላነ አማንድ እያ ሱንꬃን ደኦ ደማና መላ ሃይስ ፃፈትስ።