እዮባ ማፃፋ
ጋꬃ ቆፋ
እዮባ ማፃፋን በእያ ታርከይ፥ ዳሮ ዋየነ መቶይ ጋክዳ እስ ፅሎ አሳ ታርከ። እዮብነ እያ ላገት ሄ ዋይያ ጋሶን ባንታዉ ስኤትዳባ ግንፆን ቆንጭስዳ ሄꬑ ኦዳታ በኦስ።
እዮባ ላገት እዮባ ጋክዳ መቱዋባ፥ በንፐ ኤርያ ባንታ አማኑዋ ዎጋን ዘምፕድ ቆፋ እሞሶና። ሄሳ ግሾ ኤንቲ፥ “ፆሳይ ፅሎ አሳስ ሎኦባ እሜስ፤ ሽን ኢታ አስ ሴሬስ። እዮባ ሀ ዋየ ኡባይ ጋክዳይ፥ እ ናጋራ ኦꬅዳ ግሾሳ” ያጎሶና። እዮብ ጌሽነ ፅሎ አስ ግድዳ ግሾ፥ ሄሳ መላ ሴር በሲያ አሰ ግደና። ግዶሽን፥ ሄሳ መላ ዋየይ እያ አይስ ጋክዳኮ እዮብ ኤራናዉ ዳንዳእቤና። እዮባ አማኖይ ቃፆና እፅኮካ፥ ሱረ ፕርዳ እምድ፥ ባና ላአ ከሳና መላነ በን እያ ደኡዋኮ ዛራና መላ፥ ምንꬅድ ፆሰ ዎስስ።
ፆሳይ ኦይችዳ ኦይሻስ እዮብ ዛሮ እማናዉ ዳንዳኦና እፅኮካ፥ እያ አማኖ ምኖተꬃ ናሽድ፥ ባ ዎልቃነ ጭንጫተꬃ ማላልስያ ኦገን ቆንጭስስ። ሄሳፈ ጉየ፥ እዮብ ፆሳይ ግታ ግደይሳነ ጭንጫ ግደይሳ ኤርድ፥ ምኖተꬅነ ሀንቆይ ኩምዳ ቃላታ ኦደትዳ ግሾ ቂሮትድ ማሮታ ኦይችስ።
ዉርሰꬃን እዮብ በን ደኡዋኮ ስምዳይሳነ እያ አቁዋ ካሰይሳፈ ዳኮ ዳርስዳይሳ ኦዴስ። እዮባ ላገት እያ ጋክዳ መቶይ አዉራ ይዳኮ ኤንታዉ ገልቦና ግሾ፥ ፆሳይ ኤንታ ቦላ ሀንቀትስ። ሜዘ አማኖ ቆፋፐ አꬅድ ፆሳይ ግታ ግደይሳ ኤርዳይ እዮባ ፃላላ።
ማፃፋ አይፈ ቆፋታ
እዮባ ጋክዳ መቱዋነ ዋይያ (1:10—2:13)
እዮባነ እዮባ ላገታ ኦዳ (3:1—31:40)
ኮይሮ ሃሳያ (4:1—14:22)
ናምአንꬆ ሃሳያ (15:1—21:34)
ሄꬓንꬆ ሃሳያ (22:1—31:40)
ኤልሁ ሃሳያ (32:1—37:24)
ፆሳይ እዮባስ ዛሮ እሚስ (38:1—42:6)
ፆሳይ እዮባ ዛሪድ ኡባባን አንጅስ (42:7-17)
1
እዮባ ፓጨተꬃ
1 ኡፀ ቢታን እዮባ ጌተትያ እስ አስ ደኤስ፤ እ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ። 2 እያዉ ላፑን አደ ናይትነ ሄꬑ ማጫ ናይት ደኦሶና። 3 እያዉ ላፑን ሙኩሉ ዶርሳት፥ ሄꬑ ሙኩሉ ግማለት፥ እቻሹ ፄቱ ዋꬃ ቦራት፥ እቻሹ ፄቱ ማጫ ሀረትነ ዳሮ አይለት ደኦሶና። ዶሎሀ ባጋ ቢታን ደእያ አሳ ኡባፈ እ አꬍዳ ዱረ አስ።
4 እያ አደ ናይት ባንታ ሶን ሶን ግብራ ጊግስድ፥ ባንታ ሄꬑ ምቸታ ፄግድ እስፈ ሞሶናነ ኡዮሶና። 5 ግብራ ጋላሳት ፖለትያ ዎደ እዮብ ባ ናይታ ፄግስድ፥ “ኦን ኤር ታ ናይት ባንታ ዎዛናን ፆሰ ባድድ ናጋራ ኦꬆና አጎኮና” ግድ ዎንታ ጉራ ደንድድ፥ ኤንታና ጌሻናዉ ባ ናይታ እሱዋ እሱዋ ሱንꬃ ፄግድ ፁሳ ያርሾ ያርሼስ። እዮብ ሄሳ ኡባ ዎደ ኦꬄስ።
እዮባ ኮይሮ ፓጨተꬃ
6 እስ ጋላስ ኪታንቾት ጎዳ ስንꬃን በንታናዉ ይዶሶና፤ ፃላሄይካ ቃስ ኤንታራ ይስ። 7 ጎዳይ ፃላህያኮ፥ “ኔኒ አዉፐ ያዲ?” ያግስ።
ፃላሄይ፥ “ታኒ ሳአ ኡባን ያነ ሃነ ዩያሸ ጋምአስ” ያግድ ዛርስ።
8 ጎዳይ ፃላህያኮ፥ “ያትን፥ ኔኒ ታ አይልያ እዮባ ሎይꬃ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ” ያግስ።
9 ፃላሄይ ዛሪድ፥ “ቱማ እዮብ ፆሳስ ጮ ያዪ? 10 እያነ እያ ሶ አሳ፥ እያዉ ደእያባ ኡባ ኔኒ ድራዳ ናጋብኪ? እ ኦꬅያ ኦሶ ኡባ ኔኒ አንጅዳ ግሾ እያ መሄ ዉደይ ቢታ ኡባ ቦላ ዳርስ። 11 ሽን ኔኒ ነ ኩሽያ የዳዳ፥ እያዉ ደእያ አቁዋ ኡባ ሾጭያኮ፥ ቱማ እ ነና ሶምኦን ባዳና” ያግስ።
12 ጎዳይ ፃላህያኮ፥ “ኤሮ ሎኦ፥ እያዉ ደእያባ ኡባይ ነ ኩሸና፥ ሽን እያ ቦቾፋ” ያግስ። ሄሳፈ ጉየ፥ ፃላሄይ ጎዳ ስንꬃፈ ከይድ ብስ።
13 እስ ጋላስ እዮባ አደ ናይትነ ማጫ ናይት ባንታ ባይራ እሻ ሶን ሞሶናነ ዎይነ ኡሽ ኡዮሶና። 14 እስ ኪተትዳ አስ እዮባኮ ይድ፥ “ኑኒ ቦራታ ዋፅድ ጎይሽን፥ ሀረትካ ኑ ማታን ምሽን፥ 15 ሳባ ቢታ አሳት አኬኮና ይድ ኦላ ከስድ፥ ኡባ ቦንቅድ ኤክዶሶና፤ ቃስ አይለታካ ማሻን ዎꬍዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
16 እ ቡሮ ኦድሽን ሀራ አስ ይድ፥ “ሳሎፐ ታም ዎꬍድ ዶርሳታነ ሄመይሳታ ምስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
17 እ ቡሮ ኦድሽን ሀራ አስ ይድ፥ “ካልዳወት ሄꬑ ጩጋን ሻከትድ ይድ፥ ኑና ኦልድ ግማለታ ኡባ ኤክ ብዶሶና፤ አይለታካ ማሻን ዎꬍዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
18 እ ቡሮ ኦድሽን፥ ሀራ አስ ይድ፥ “ነ አደ ናይትነ ማጫ ናይት ባንታ ባይራ እሻ ሶን ምሼነ ዎይነ ኡሽ ኡይሼ ደእሽን፥ 19 ዎልቃማ ጎተይ አኬኮና መላ ቢታፈ ደንድድ፥ ኬꬃ ሾጭን፥ ኬꬃይ ኤንታ ቦላ ኩንድድ ናይታ ዎꬍስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
20 ሄሳፈ ጉየ፥ እዮብ ደንድድ፥ ካዮስ ባ ማኡዋ ፔꬍስ፤ ባ ሁጵያ ቡሉስስ፤ ቢታን ጉፋንድ ጎይንሸ፥
21 “ታኒ ታ አየ ኡሎፐ ካሎ የለታስ፤
ሀይቃሸካ ታኒ ካሎ ባና፤
ጎዳይ እሚስ፤ ጎዳይ ዛሪድ ኤክስ፤
ጎዳ ሱንꬃይ ጋላተቶ” ያግስ።
22 ሀ ኡባንካ እዮብ ናጋራ ኦꬅቤና፤ ፆሳ ቦላ ኢታባ ኦደትቤና።