1 ሀራ ጋላስ ኪታንቾት ጎዳ ስንꬃን በንታናዉ ይዶሶና፤ ፃላሄይካ ቃስ ኤንታራ እስፈ እያ ስንꬃን በንታናዉ ይስ። 2 ጎዳይ ፃላህያኮ፥ “ኔኒ አዉፐ ያዲ?” ያግስ።

ፃላሄይ ጎዳኮ፥ “ታኒ ሳአ ኡባን ያነ ሃነ ዩያሸ ጋምአስ” ያግስ።

3 ጎዳይ ፃላህያኮ፥ “ኔኒ ታ አይልያ እዮባ ሎይꬃዳ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ። ጋሶይ ባይና ታኒ እያ ꬋይሳና መላ ነ ታና ደንꬅንካ ሀእ ጋካናዉ እ ባ ሱረተꬃን ምንድ ኤቅስ” ያግስ።

4 ፃላሄይ ዛሪድ፥ “ነ ሸምፖይ አቶ” አስ ገይሳዳ አስ ባ ሸምፑዋ ግሾ ባዉ ደእያባ ኡባ እሜስ። 5 ሽን፥ “ኔኒ ነ ኩሽያ የዳዳ እያ አሳተꬃ ቦችያኮ፥ እ ነና ቱማ ሶምኦን ባዳና” ያግስ።

6 ጎዳይ ፃላህያኮ፥ “ኤሮ ሎኦ፥ እያ ዎꬎፓፈ አትሽን፥ እያ ቦላ ነ ኮይዳባ ኦꬃናዉ ዳንዳኣሳ” ያግስ።

7 ሄሳፈ ጉየ፥ ፃላሄይ ጎዳ ስንꬃፈ ከይድ፥ እዮባ ቶሆፐ ሁጰ ጋካናዉ ኢታ ማዱንꬃን ካኤታና መላ ኦꬅስ። 8 እዮብ ብዶ ቦላ ኡትድ ኮንአን ባና ጎድስ።

9 እያ ማችያ፥ “ሀእ ጋካናዉካ ኔኒ ነ ሱረተꬃ ምንꬃ ኦይካዲ? ፆሳ ባዳዳ ሀይቃጋ” ያጋሱ።

10 እዮብ ዛሪድ፥ “ኔኒ ኤያ ማጫሳዳ ዋናዳ ኦደታይ? ኑኒ ፆሳፈ ሎኦባ ኤክ ጋምእድ፥ ኢታባይ ጋክያ ዎደ ኤኮኮዬ?” ያግስ።

ሀ ዋየ ኡባን እዮብ ፆሳ ቦላ ኢታባ ኦደትቤና።

11 ሄꬑ እዮባ ላገት፥ ተማና ቢታፈ ኤልፋዝ፥ ሹሀ ቢታፈ በልዳዶስነ ናእማ ቢታ አስ ግድዳ ሶፋር እዮባ ቦላ ጋክዳ መቱዋ ስእዳ ዎደ እያዉ ቃታናዉነ ምንꬃናዉ እስፈ እያኮ ይዶሶና። 12 ኤንቲ እያ ሃሆን ኤቅድ ፄልያ ዎደ እ እዮባ ግደይሳ ኤርቦኮና። ጉየፐ እያ ግደይሳ ኤርዳ ዎደ ባንታ ቃላ ꬎቁ ኦꬅድ ዬክዶሶና፤ ባንታ ማኡዋ ፔꬍድ፥ ባንታ ሁጰን ባና ቆልዶሶና። 13 ኤንቲ እያራ ላፑን ጋላስነ ላፑን ቃማ ቢታን ኡትዶሶና። ኤንቲ እያ ዋየይ ኬህ ዳሮ ግደይሳ በእዳ ግሾ ኦንካ እያ ኦድስቤና።