3
እዮባ ሃሳያ
1-2 ሄሳፈ ጉየ፥ እዮብ ባ ዶና ዶይድ፥ ባ የለትዳ ጋላሳ ሀይሳዳ ያግድ ባድስ።
3 “ታኒ ቃንꬃትዳ ቃማይነ
የለትዳ ጋላሳይ ባደትዳባ ግዶ!
4 ሄ ጋላሳይ ꬉማን ላመቶ!
ሳሎ ፆሳይ ሄ ጋላሳ ቆፖፎ፤
እያ ቦላ ፖኦይካ ፖኦፖ።
5 ሳካና ꬉምነ ጫጋን እያ ጎዞ፤
እያ ሻሪ ካሞ፤
እያ ፖኡዋ ꬉም ቆሶ።
6 ሄ ጋላሳ ቃማ ሳካና ꬉም ኦይኮ።
ላይꬃ ግዶን ደእያ ጋላሳታን ታይበቶፎ፤
አጌናታ ታይቦንካ ገሎፖ።
7 ሄ ቃማይ ማይኖ፤
ኡፋይሳ እልልስ እያን ስኤቶፎ።
8 ሌዋታነ*ሌዋታነ፦ ሃꬃን ደእያ ዎልቃማ ዶአ። ደንꬃናዉ ዳንዳኤይሳትነ
ጋላሳታ ባደይሳት ሄ ጋላሳ ባዶ።
9 ሄ ቃማን ባካል ፖኦፖ፤
ፖኦ ናግድ ደሞፎ፤
ዎንታ ፃልቀይ እያዉ ዶሎፖ።
10 ሄ ጋላሳይ ታኒ ታ አየ ኡሎን ቃንꬃቶና መላነ
ሀ ዋይያ በኦና መላ አሽቦና ግሾ ባደትዳይሳ ግዶ።
11 “ታኒ ታ አየ ኡሎን ሃꬃ ግድዳ ግዳርክና!
ታ አየ ኡሎፐ የለታ ዎꬍዳ መላ ሀይቅዳ ግዳርክና!
12 ታ አይያ ታና አይስ ባ ክኦን ኤካደሻ?
ባ ꬋንꬃካ ታና አይስ ꬋንꬃደሻ?
13 ሄ ዎደ ታኒ ሀይቅዳባ ግድያኮ፥
ሀእ ታኒ ሸምፓዳ ꬍስካና ሽን!
14 ሀእ ላለትዳ በሳታ ባንታዉ ኬፅዳ፥
ሀ ሳኣ ካዎታራነ ዞረይሳታራ፥
15 ኤንታ ኬꬃን ዎርቃይነ ብራይ ኩምዳ ሀላቃታራ
እስፈ ዱፎን ዝንአናሽን!
16 ዎይኮ ቦሻ ግድድ የለትዳ ናአዳ፥
ጋላሳ ፖኦ በእቦና ዮጋ ናአዳ ቢታ ግዶን አይስ ቆሰታብክና?
17 ዱፎን ኢታት ባንታ ኢታ ኦሶ አጎሶና፤
ያን ዳቡራንቾት ሸምፖሶና።
18 ሄ በሳን ቃሾ አሳት ሸምፕድ ኡፋይቶሶና፤
ኤንታ ኡንኤይሳታ ዋሱዋ ያን ስኦኮና።
19 ግትነ ጉꬅ ያን ደኤስ፤
አይለትካ አይለተꬃፈ ያን ላአ ከዮሶና።
20 “መቶን ደኤይሳታስ፥
ሸምፖይ ጫመትዳይሳታስ፥
ፖኦይ አይስ እመትዴ?
21 ሀይቆ አሞትድ ደሞናይሳታስ፥
ቆትድ ዎꬅዳ ሻሎፐ አꬅድ ኮየይሳታስ፥
ደኦይ አይስ እመትዴ?
22 ዱፎ ጋክያ ዎደ ኡፋይተይሳታስ፥
ደኦይ አይስ እመትዴ?
23 ኦገይ ꬋይዳ ኡራስ፥
ፆሳይ እያ ዩሹዋ ድርዳ ኡራስ፥
ፖኦይ አይስ እመትዴ?
24 ኦለይ ታዉ ካꬅ ግድስ፤
ታ ዋሶይ ጎግያ ሃꬅ ግድስ።
25 ታኒ ያይዳባይ ታ ቦላ ጋክስ፤
ታኒ ዳጋምዳባይ ታዉ ሀንስ።
26 ታዉ መቶፐ አትሽን፥
ሳሮይ፥ ዎፕነ ሸምፖይ ባዋ” ያግስ።