7
1 አሳ ደኦይ ሳአ ቦላ ዎልቃማ ባፀ ግደነዬ?
እያ ላይꬃይ ኡነ ኦꬅያ አሳ ደኦ መላ ግደነዬ?
2 ዉልያ አዋ አሞትያ ጋቻ መላ፥
ዎይኮ ባ ዳሞዝያ ኤካናዉ ናግያ ኦሳንቾዳ፥
3 ሄሳዳ ታዉ መላ አጌናት
መቶ ቃማት እመትዶሶና።
4 ታኒ ዝንእያ ዎደ አዉደ ባርካንድናሻ ጋይስ፤
ሽን ቃማይ ታዉ አዱቄስ፤
ሳእ ዎንታና ጋካናዉ ሂፃን ሽረታ ሽረታ ዎꬋይስ።
5 ታ አሳተꬃይ ጉፁንትስ፤
ታ ማዱንꬃይ ጊሽ ጎጌስ።
6 ታ ላይꬃይ ዶርዘ ሞቀፐ አꬍድ ኤለሴስ፤
ኡፋይስ ባይናሽን ታ ላይꬃይ ዉሬስ።
7 አቤት ፆሳዉ፥ ታ ላይꬃይ እስ ሸምፖ መላ ግደይሳ ቆፓ!
ታ አይፈይ ዛሪድ ኬሀባ በኤና።
8 ሀእ በኤይ ዛሪድ በኤና፤
ታና ኮያና ሽን ዛር ደመና።
9 ሻር ላለትድ ꬋየይሳዳ፥
ዱፎ ዎꬍያ አስ ስሚድ ከየና።
10 ባ ሶ ስሚድ ዬና፤
እያ ኤርያ አሳይካ ዶጌስ።
11 “ሄሳ ግሾ፥ ታ ስእ ጊከ፤
ታ አያና ኡንኤተꬃ ኦዳና፤
ታ ሸምፑዋ ጫመተꬃ ግሾ ዙዙማና።
12 ሄሳ መላ ኔኒ ታና አይስ ናጋይ?
ታ ነዉ አባ ዎይኮ አባን ደእያ ኢታ ዶአ ጋድዬ?
13 ‘ታ ሂፃይ ታና ምንꬃና፤
ታ አርሳይ ታና ዙዙንꬃፈ ሸምፕሳና!’ ጋዳ ቆፓስ፤
14 ሽን ኔኒ ታና አሙሆን ያሽሳሳ፤
ቆንጨꬃን ታና ዳጋንꬃሳ።
15 ታኒ ሀ ዋየይ ኩምዳ አሳተꬃ ቶካዳ ዳናፐ፥
ሱለታዳ ሀይቅያኮ ዶሳይስ።
16 ታኒ ታ ደኡዋ ሻተታስ፤ ዳናዉ ኮይከ፤
ታ ላይꬃይ እስ ሸምፖ መላ ግድያ ግሾ ታና አጋርክ።
17 ነ እያ ግታያዳ ፄላናዉ አስ አይቤ?
ነ እያዉ ቆፓናዉ አስ አይቤ?
18 ዎንታ ዎንታ ነ እያ ፆሞሳሳ፤
ዎደን ዎደን ነ እያ ፓጫሳ።
19 ነ ታ ቦላ አይፈ ዎይሳ አግኪ?
ጩቹ ምትያ ዎደ ታዉ እምኪ?
20 አቤት አሰ ካለይሶ፥
ታ ናጋራ ኦꬅን ነና አይ ቆህዴ?
ነ አይስ ታና ጫዳ ኦይካይ?
ነዉ ታ ቶሆ ግዳድናዬ?
21 ታ ናቁዋ አይስ አግኪ?
ታ ናጋራ አይስ አቶ ጊኪ?
ታ ዱፎ ገልያ ዎደይ ጋክስ፤
ነ ታና ኮያና፥ ሽን ህዛፐ ደማካ” ያግስ።