8
ባልዳዶሳ ሃሳያ
1 ሹሀ ቢታፈ ይዳ በልዳዶስ ዛሪድ፥
2 “ኔኒ ሄሳ አዉደ ጋካናዉ ኦደታይ?
ነ ዶናፐ ከያ ቃላይ ዎልቃማ ጎተ መላ።
3 ኡባ ዳንዳእያ ፆሳይ ፅሎ ፕርደኔ?
4 ነ ናይት ፆሳ ቦላ ናጋራ ኦꬅዳ ግሾ፥
እ ኤንታ ኤንታ ናጋራ ግሾ ሴርስ።
5 ሽን ኔኒ ፆሳኮ ስምኮ፥
ኡባ ዳንዳእያ ፆሳ ዎስኮ፥
6 ኔኒ ጌሽነ ሱረ ግድኮ፥
እ ነ ግሾ ደንድድ ነና ማዳና፤
እ ካሰ ነ ደኡዋ ዛሪድ ዎይታና።
7 ነ ዶመꬃይ ጉꬃ ዳንኮካ፥
ነ ዉርሰꬃይ ዳሮ አꬍድ ዳራና።
8 ካሰ የለታ አነ ኦይቻ፤
ኑ ማይዛት አይ ታማርዳኮ ፕልጋዳ ደማ።
9 ኑኒ ዝነ ናይታ አይባካ ኤሮኮ፤
ኑ ሀ ሳአን ደእያ ላይꬃይ ኩያ መላ።
10 ኤንቲ ነና ታማርሰይነ ነዉ ኦደይ፥
ባንታ ዎዛናን ዎꬅዳባፐ ግደነዬ?
11 ጫረይ ባይና በሳን ፓልክ ዶላናዉ ዳንዳኢ?
ሃꬅ ባይና በሳን ማይረይ ጭልአናዉ ዳንዳኢ?
12 ቡሮ ድጭድ ቃንፀቶና ደእሸ፥
ጭልኦ ማታፐካ ኤሶን መሌስ።
13 ፆሳ ዶግያ አሳ ኡባ ዉርሰꬃይ ሄሳ መላ፤
ፆሰ ኤሮና አሳ ኡፋይሳይ ꬋያና።
14 እ አማነትያባይ መቅያባ፤
እ ጬቀትያባይካ ሻንጎ ሃዳ መላ።
15 እ ባ ሻንጎ ሃዳ ቦላ ዘምፓና፥ ሽን ኤቀና፤
እ እያ ኦይካና፥ ሽን ዱፅ ዎꬋና።
16 እ አዋ ዎደ ሃ ኡይድ ጭልእያ አታክልተ መላ፤
ባ ፃጱዋ ቢታ ኡባን የድዳ ምꬃ መላ።
17 ባ ፃጱዋ ኬላን የዴስ፤
ግታ ሹቻ ቦላ ባ ፃጱዋ ፃፄስ።
18 ሽን እ ባ በሳፈ ሾደትኮ፥
ሄ በሳይ፥ ‘ታ ነና በአብከ’ ያጋና።
19 ኢታ አሳታ ኡፋይሳይ ሄሳ መላ፤
ሀራት ይድ ኤንታ በሳ ኦይካና።
20 “ፆሳይ ቦረይ ባይና አሳ የግ አገና፤
ኢታ ኦይሳታ ማደና።
21 እ ዛሪድ ነና ሚቻናነ እልልሳና።
22 ነና እፀይሳት ዬላ ማአና፤
ኢታታ ኬꬃይ ꬋያና” ያግስ።