ሄሳ ግሾ፥ ታ ዙዙማናፐ አትሽን፥ ስእ ጊከ፤

ታ ሸምፑዋ ሴላ ከሳና።

ታ ባላ ታዉ ኦዳፐ አትሽን፥ ታ ቦላ ፕርዶፋ።

ታና ኡንኤꬃናዉ በሲ?

ነ ኩሸን መꬍዳ ኡራ ካይስ ዎጌ?

ኔኒ አስ ፄለይሳዳ ፄላዬ?

ታ ናጋራ አይስ ካላይ?

ነ ኩሸፐ ታና ኦንካ አሻናዉ ዳንዳኦናይሳ ነ ኤራሳ።

ሽን ሀእ ሄ ኩሸይ ስሚድ ታና መንꬄስ።

ያትን፥ ሀእ ታና ዛራዳ ባና ኦꬃናዉ ኮያይ?

መቃ ማꬃዳ እርክስዳይ ነና ግድኪ?

ሻያንነ መቀꬃን ዋፃዳሳ።

ነ ናጎይ ታና ፓፃ ዎꬅስ።

ታና ቆሀናዉ ቆፓዳ ደኤይሳ ታ ኤራይስ።

ታ ናጋራ ኦꬅኮ ሴሮና አꬋካ።

ታ ፅሎ ግድኮካ ጬቀታናዉ ዳንዳእከ።

ዋየን ዎꬃዳሳ።

ታና ቆሀናዉ ነ ማላልስያ ዎልቃ ዛራ ዛራ በሳሳ።

ነ ሀንቁዋ ታ ቦላ ዳርሳሳ፤

ታና ኦላናዉ ኦራꬃ ኦላንቾታ ጊግሳሳ።

ኦንካ ታና በኦና ሀይቅዳኮ ታው ሎኦሽን!

ዎይኮ ታ አየ ኡሎፐ ከያሸ ዱፎ ገልዳኮ ሎኦሽን!

ሀ ጉꬃ ላይꬃን ኡፋይታና መላ ታና አጋርክ!

ሌልዳ ꬉማ ቢታ ጋኮና ደእሽን፥

22 እያ ፖኦይ ꬉማ ግድዳ በሳነ ሀይቆይ ካዎትዳ በሳ፥

ማር ባይና በሳነ ሌልዳ ꬉማ ቢታ ቦና ደእሽን፥

ታና አጋርክ!”