32
ኤልሁ ሃሳያ
1 እዮብ፥ “ታኒ ፅሎ አስ” ግዳ ግሾ፥ ሀ ሄꬑ አሳት እያዉ ዛሮ እሞ አጋግዶሶና። 2 እዮብ ፆሳፈ አꬅድ ባና ፅሎ ኦꬅዳ ግሾ፥ ራማ ያራፐ ግድዳ ቡዛ ቢታፈ ይዳ ባርከላ ናአይ ኤልሁይ እዮባ ቦላ ሀንቀትስ። 3 ኤንቲ እያ ጮ ባላ ግድ ፕርድድ፥ እያዉ በሲያ ዛሮ እማናዉ ዳንዳእቦና ግሾ ኤልሁይ ሀ ሄꬑ ላገታ ቦላካ ሀንቀትስ። 4 ኤልሁይ ኤንታፈ ካሎትያ ግሾ ኤንቲ ኡባይ ሃሳያ ዉርሳና ጋካናዉ ናግስ። 5 ሀ ሄꬑ አሳት እዮባስ በሲያ ዛሮ እማናዉ ዳንዳእቦናይሳ በእድ እ ዳሮ ይሎትስ።
6 ቡዛ ቢታፈ ይዳ ባርከላ ናአይ ኤልሁይ ሀይሳዳ ያግድ ሃሳያ ዶምስ።
“ታኒ ህንተፈ ናአታይስ፤
ህንተ ታፐ ባይራተታ፤
ሄሳ ግሾ፥ ታኒ ታ ቆፋ ህንተዉ ኦዳናዉ ያያስ።
7 ታኒ፥ ‘ጭማት ኦደቶ፤
ባንታ ዳሮ ላይꬃን ደምዳ ጭንጫተꬃ ታማርሶና’ ” ጋዳ ቆፓስ።
8 ሽን አሳ ግዶን አቅድ ጭንጫተꬅ እመይ፥
ኡባ ዳንዳእያ ፆሳ አያና።
9 አሰ ጭንጫ ኦይ ጭማተꬅ ግደና፥
ዎይኮ አሳስ አኬካ እመይ ላይꬃ ዳሮተꬅ ግደና።
10 ሄሳ ግሾ፥ ስእተ፤
ታካ ታ ቆፋ ህንተዉ ኦዳና።
11 ህንተ ሃሳያ ዎደ፥
ታኒ ስእ ጋዳ ሀይዛስ፤
ህንተ ኦዳና ቃላ ኮይሽን ናጋስ።
12 ህንተ ገይሳ ኡባ ዉርሳዳ ስአስ፤
ሽን ህንተፈ ኦንካ እዮባ ባላ ግድ አማንꬅበና፤
ህንተፈ ኦንካ እያ ፓላማስ በሲያ ዛሮ እምቤና።
13 እዮባ ኦዳስ ካልስያ ዛሮ እማናዉ ዳንዳኤይ፥
ፆሰፈ አትሽን፥ አሰ ግዶና ግሾ፥
ህንተ፥ “ኑስ ጭንጫተꬅ ደኤስ” ጎፕተ።
14 እዮብ ፓላምዳይ ታራ ግዶናሽን ህንተራ፤
ታኒ ህንተ ኦዳዳ እያዉ ዛሮ እምከ።
15 ኤንቲ ዳጋምድ፥
ጋናባ ꬋይዳ ግሾ፥
ዛሮ እማናዉ ዳንዳእቦኮና።
16 ያትን ኤንቲ ኦደትያባ ꬋይድ ስእ ግድ ኤቅኮ፥
ታኒ ናጋናዉ ኮሺ?
17 ግደና፥ ታኒ ኦድያባይ ደኤስ፤
ታካ ታ ቆፋ ቆንጭሳና።
18 ታ ኦዳናባይ ዳሮይ ደእያ ግሾ፥
ታ ግዶን ደእያ አያናይ ታና ኦዳ ግድ ሱጌስ።
19 ታ ጋꬃይ ጎዘትዳ ማናጨዳ፥
ዎይኮ ማልአንቶ ዎይነ ኡሽ ኩምዳ ኦጎሮዳ
ꬉቃና ሀኔስ።
20 ታ ኦዳዳ ከሳናዉ በሴስ፤
ታ ዶና ዶያዳ ዛሮ እማናዉ ኮሼስ።
21 ሀ ኦዳን ታኒ ኦናካ ማድከ፥
ዎይኮ ኦናካ ጮ ሳቢከ።
22 አሰ ጮ ሳቢያባይ ታዉ ኤረተና፤
ታ ሄሳ ኦꬅያኮ ታና መꬍዳይስ ፕርዳናሽን።