ታ ግያባ ኡባ ሀይዛ።

ታ ቃላት ታ እንፃርሳ ፄራን ደኦሶና።

ታ ኤረይሳ ታ እንፃርሳይ ቱማተꬃን ኦዴስ።

ኡባ ዳንዳእያ ፆሳ ሸምፖይ ታዉ ደኦ እሚስ።

ነና ጊግሳዳ ታራ ፓላማ።

ታንካ ኡርቃፈ መታስ።

ታኒ ነና ናቅከ።

ኔ ዶናፐ ከይዳ ቃላታ ሀይዛስ።

ታኒ ፅሎነ ናጋራ ኦꬃቦና አስ።

እ ታና ባ ሞርከዳ ታይቤስ።

ታ ታንጎ ኡባ እ ዎቼስ” ያጋዳሳ።

ታ ነዉ ኦዳይስ፥ ፆሳይ አሳፐ አꬌስ።

አይስ እያራ ፓላማይ?

ፆሳይ ዱማ ዱማ ኦገራ ኦዴስ።

ꬍስኮ ኤይድ ደእያ ዎደ፥

ፆሲ አሙሆንነ ቆንጨꬃን ኦዴስ።

ባ ሴራን ኤንታ ዳጋንꬄስ።

ኦቶሮ አሳፐ ድጌስ።

ሀይቆፐካ ናጌስ።

እያ መቀꬃ ጋርሳን ቃንፆና ሳሆ የድድ ሴሬስ።

ዳሮ ማልኦ ካꬅ እያ ሻቴስ።

እያ አሳተꬃይ መልን መቀꬅ ታይበቴስ።

እያ ደኦይ ሀይቆ ኪታንቾታኮ ማቴስ።

ሙኩሉን ታይበትያ ኪታንቾታፐ

እሶይ እያ ማዳናዉ ዳንዳኤስ።

ታኒ እያ ዎዝያባ ደማስ፤

እያ አጋጋ’ ያግድ ሀይቆስ ኦዴስ።

እያ ያላጋተꬃ ዎልቃይ እያዉ ስማና።

ፆሳይ እያ ዎሳ ስአና፤

ፆሳይ እያዉ እያ ፅሎተꬃ ዛርያ ግሾ፥ እ ኡፋይሳን ፆሳ ጎይናና።

‘ታኒ ናጋራ ኦꬃስ፤ ሱረባ ጌላያስ፤

ሽን ፆሳይ ታ ሀኑዋ ታዉ ቃንፅቤና።

ሀእ ፓፃ ደአዳ ፖኦ በአይስ’ ያጋና።

ዛር ዛር ኦꬄስ።

እያ ሸምፑዋ ዱፎፐ አሼስ።

አነ ነ ስእ ጋ፤ ታኒ ኦደታና።

ታኒ ነ ፅሎ ግደይሳ በአናዉ ኮያይስ።

ታ ነና ጭንጫተꬅ ታማርሳና” ያግስ።