34
1 ቃስካ ኤልሁይ ሀይሳዳ ያግስ፤
2 “ህንተኖ፥ ጭንጫቶ ታ ሃሳያ ስእተ፤
ህንተኖ፥ ኤራንቾቶ ታና ሀይዝተ።
3 እንፃርስ ማልኦ ካꬅ ሻክ ኤረይሳዳ፥
ሀይꬅ ኦዳ ሻክድ ኤሬስ።
4 አነ ኑኒ ሱረባ ሻክድ፥
ሎኦባ ታማርድ ኤሮስ።
5 “እዮብ፥ ‘ታኒ ፅሎ፤
ሽን ፆሲ ታና ሱረ ፕርዳ ድግስ።
6 ታኒ ቱማ ሽን ዎርዳንቾ ግዳስ፤
ታናን ባል ባዋ ሽን፥
ፓፆና ማዱንꬅ ማዱንፅስስ’ ያግስ።
7 እዮባዳ ፆሳ ቦላ፥
ቀልቅስያ አስ ደኢ?
8 እ ኢታ ኦይሳታራ ላገቴስ፤
ናጋራንቾታራ ሄመቴስ።
9 እ፥ ‘አስ ፆሰ ኡፋይሳና ግድ ኦꬅያባይ
አይኮካ ማደና’ ያጌስ።
10 “ሄሳ ግሾ፥ ህንተኖ፥ አኬካንቾ አሳቶ ስእተ፥
ኢታ ኦሶይ ፆሳፈ፥
ኡባ ዳንዳእያ ፆሳፈ ባላ ኦሶይ ሃኮ።
11 ፆሳይ አሳስ እያ ኦሱዋዳ እሜስ፤
እያ ኦግያዳ እያዉ ቃንፄስ።
12 ፆሳይ ቱማ ኢታ ኦና፤
ኡባ ዳንዳእያ ፆሳይ ሱረ ፕርዳ ጌላየና።
13 ሳአ ቦላ እያዉ ማታ እምዳይ ኦኔ?
ቢታ ኡባ ቦላ እያ ሹምዳይ ኦኔ?
14 ፆሳይ ባ አያናነ ባ ደኦ ሸምፑዋ
ዛሪድ ባኮ ኤክያኮ፥
15 አሾ ማእዳ ኡባይ እስፈ ꬋያና፤
አስ ቢታ ስማናሽን።
16 “ነዉ አኬክ ደእኮ ሀይሳ ስአ፤
ታ ሃሳያ ሀይዛ።
17 ሱረ ፕርዳ እፀይ ሃራናዉ ዳንዳኢ?
ኔኒ ፅሎነ ዎልቃማ ፆሳ ፕርዳይ?
18 ፆሳይ ካዎታኮ፥ ‘ህንተ ፓꬆናይሳታ’፤
ቃስ ቢታ ሃረይሳታኮ፥ ‘ህንተ ኢታ’ ያጌስ።
19 ኤንቲ ኡባይ እያ ኩሸ ኦሶታ ግድያ ግሾ፥
ሀላቃታ ሶምኦ ፄልድ ማደና፤
ዱረታ ማንቆታፐ አꬅድ ፄለና።
20 ኤንቲ ግድ ብላሄ አኬኮና ሀይቃና፤
ኡባይ ኮኮርሸ ꬋያና፤
ዎልቃማት አሳ ኩሸይ ቦቾና ክቻና።
21 “ፆሳይ አሳ ሄመꬃ ፄሌስ፤
እያ ታንጎ ኡባ ዎቼስ።
22 ኢታ ኦይሳታ፥
ገንꬃናዉ ዳንዳእያ ሳካና ꬉም ባዋ።
23 አሳይ እያ ስን ፕርዳስ ሺቃና መላ፥
ፆሳይ ቃፃሮ እመና።
24 ኦይሽ ባይና ዎልቃማታ መንረꬄስ፤
ኤንታ በሳን ሀራታ ሹሜስ።
25 እ ኤንታ ኦሱዋ ኤርያ ግሾ፥
ኤንታ እስ ቃማን ማታፐ ዎꬅድ ꬋይሴስ።
26 ኤንታ ኢታተꬃ ግሾ፥
ናጋራንቾታ አሳ ስንꬃን ሴሬስ።
27 ሄሳ እ ኦይ፥
ኤንቲ እያ ካሎና እፅዳ ግሾነ
እያ ኪታ አግዳ ግሾሳ።
28 ኤንቲ ማንቆታ ኡንኤꬅድ ፆሳኮ ዋሳና መላ ኦꬅዶሶና፤
ፆሳይ ማንቆታ ዋሱዋ ስእስ።
29 ፆሳይ ስእ ጊኮ እያ ኦነ ሞታናይ?
እ ባ ሶምኡዋ ቆስኮ እያ በአናይ ኦኔ?
እ አሳፐነ ካዎተꬃፈ ቦላ።
30 ሄስ ሀንዳይ ጌላይ ደርያ ሃሮና መላነ
ኤንታ ስንꬃን ፅሄ ዎꬆና መላሳ።
31 “አስ ፆሳኮ ያግያኮ ሎኦ፤
ካሰ ታ ናጋራ ኦꬅዳባ ግድኮ ዛራዳ ኦꬅከ።
32 ታ በኦናይሳ ታና ታማርሳ፤
ናጋራ ኦꬅዳባ ግድኮ ዛራዳ ኦꬅከ።
33 ያትን ኔኒ ፓፅከ ጋሸ፥
ነ ዶሰይሳ መላ ፆሳይ ነዉ ዎይታነዬ?
ህዛ ቆፋ ቃቻናይ ነናፐ አትሽን፥ ታና ግድከ፤
ሄሳ ግሾ፥ ነ ኤረይሳ ታዉ ኦዳ።
34 አኬካ አሳይ ሀይሳዳ ያጎሶና፤
ጭንጫት ያጎሶና፤
35 ‘እዮብ ኤር ባይና ኦደቴስ፤
ኢያ ኦዳን አይፈይ ባዋ።’
36 እዮብ ኢታ አሳዳ ዛሮ እምዳ ግሾ፥
ዉርሰꬅ ጋካናዉ ፓጨትዳ ግዴረነ!
37 እ ባ ናጋራ ቦላ ጌላተꬅ ጉጅስ፤
ኑ ስንꬃን ፆሳ ቦላ ቀልቅስስ፤
ፆሳ ቦላ ዳሮ ኦደትስ” ያግስ።