1 ናወ ናአይ እያሱይ፥ ቢታ ዎች በእያ ናምኡ አሳታ ሴፅማ *ሴፅማ ሀ ቃላይ እብራወꬆ ዶናን ሶቃላ ጉሱ። ጌተትያ በሳፈ ቆሳን ኪትሸ፥ “ብድ ቢታ ዎችተ፤ ቃስ እያርኮ ካታማ ዱማይድ ዎችተ” ያግድ ኪትስ።

ኤንቲ ብድ፥ ራቦ ጌተትያ ላይማተꬃን አቅያ አሰ ሶ አቃናዉ ገልዶሶና። 2 እያርኮ ካዎይ፥ “እስራኤለ አሳፐ ኪተትዳይሳት ሀ ቢታ ዎቻናዉ ሀች ቃማ ይዶሶና” ግያ ኦዳ ስእስ።

3 ያትን፥ እያርኮ ካዎይ ራብኮ፥ “ነ ሶ ገልዳ አሳት ቢታ ዎቻናዉ ይዳ አስ ግድያ ግሾ፥ ኤንታና ከሳዳ እማ” ያግድ ኪትስ።

4 ሽን ማጫስያ ሄ ናምኡ አሳታ ቆታዳ፥ “ኤ አሳት ታኮ ይዶሶና፥ ሽን ኤንቲ አዉፐ ይዳኮ ታ ኤርከ። 5 ኦማርስ ካታማ ፐንግያ ጎርዳና ሀንያ ዎደ፥ ኤንቲ ከይድ ብዶሶና። ኤንቲ አዉ ብዳኮ ታ ኤርከ። ኤለስድ ኤንታ ህንተ ካልኮ፥ ኦይካና” ያጋዳ ኤንታዉ ኦዳሱ። 6 ሽን እያ አሳታ ዳሳ ቦላ ከሳዳ ታልባ ጮይና ግዶን ቆሳሱ። 7 ያትን፥ ካዎይ ኪትዳ አሳት ዎቸይሳታ ኮይሸ፥ ዮርዳኖሰ ሻፋ ፕንꬅያ ኦግያ ጋካናዉ ብዶሶና። ኤንቲ ካታማፐ ቡሮ ከይዳ መላ ካታማ ፐንገይ ጎርደትስ።

8 ዎቸይሳት ꬍስካናፐ ካሰታዳ፥ እያ ኤንታኮ ከያዳ፥ 9 ሀይሳዳ ያጋሱ፤ “ጎዳይ ሀ ቢታ ህንተዉ እምዳይሳ ታ ኤራይስ። ጋሶይካ፥ ህንተፈ ደንድዳይሳን ግታ ያሻን አሳ ኡባይ ትልእስ። 10 ግብፀ ቢታፈ ህንተ ከይዳ ዎደ፥ ጎዳይ ህንተ ስንꬃን ዞኦ አባ ዋት መልስዳኮ ኑ ስእዳ። ቃስ ዮርዳኖሰ ሻፋፐ ዶሎሀ ባጋራ ደእያ አሞረ ካዎታ ናምአታ፥ ስሆናነ ኦገ ህንተ ዋትድ ዎꬍዳኮነ ኤንታ ካታማ ዋትድ ꬋይስዳኮ ኑ ስእዳ። 11 ኑኒ ሄሳ ስእዳ ዎደ፥ ኑ ዎዛናይ ያሻን ትልእስ። ህዛ፥ ህንተ ጎዳይ፥ ፆሳይ ሳሉዋካ ሳኣካ ሃረይስ እያ ግደይሳ ኑ ኤርዳ። 12 ሄሳ ግሾ፥ ታ ህንተዉ ኬህዳይሳዳ ህንተ ታ አዋ ሶ አሳስ ኬሀናዳ ጎዳ ሱንꬃን ጫቅተ። ሄሳስ አማንꬅያ ማላ ታዉ እምተ። 13 ታ አዋነ ታ አይዉ፥ ታ እሻታነ ታ ምቸታ ኤታ ሶ አሳ ኡባ ዎꬎኮ ግድ ጫቅተ” ያጋሱ።

14 ሄ አሳት ዛሪድ፥ “ኑ ነዉ ጫቅዳ ጫቁዋ ፖሎና እፅኮ፥ ፆሳይ ኑና ዎꬎ። ኑ ኦꬅያባ ነ አሳስ ቆንጭሶና እፅኮ፥ ጎዳይ ሀ ቢታ ኑስ እምያ ዎደ፥ ኑኒ ነዉ አማነታናነ ኬሀና” ያግዶሶና።

15 ራኣብ ኬꬃይ ካታማ ግምበ ድርሳራ ኦይከትድ ኬፀትዳ ግሾ፥ ማስኮትያራ ዎዶሮ ዱገ የዳዳ፥ ኤንታና ዱገ ዎꬍሳሱ። 16 ራኣባ ኤንታኮ፥ “ህንተና ኮየይሳት ደሞና መላ ደርያኮ፥ ብድ ኤንቲ ስማና ጋካናዉ ያን ሄꬑ ጋላስ ቆሰትተ። ያን ስሚድ፥ ህንተ ብያ በሳ ባናዉ ዳንዳኤታ” ያጋሱ።

17-18 አሳት ዛሪድ፥ “ኑኒ ሀ ቢታ ኦይካናዉ ገልያ ዎደ፥ ሀ ዞኦ ዎዶሩዋ ነ ኑና ዎꬍስዳ ማስኮትያን ቃቾና እፅኮነ ነ አዋ፥ ነ አይዉ፥ ነ እሻታነ ነ ሶ አሳ ኡባ ነ ሶ ሺሾና እፅኮ፥ ነ ኑና ጫቅስዳ ጫቆይ ኑስ ጎመ ግደና። 19 ኦንካ ነ ሶፐ ካረ ከይድ ሀይቅኮ፥ ሄስ እያ ጎመ። ኑኒ ሄሳስ ኦይሸቶኮ። ኔራ ሶን ደእሸ ኦንካ ቆሄትኮ፥ እያ ሱꬃ ጎመይ ኑና ጋኮ። 20 ሽን ኑ ኦꬅያባ ኔን አሳስ ቆንጭስኮ ኔን ኑና ጫቅስዳ ጫቆይ ኑስ ጎመ ግደና” ያግዶሶና።

21 እያ ዛራዳ፥ “ህንተ ቃላዳ ሀኖ” ጋዳ ኤንታ ሞይዛሱ። ኤንቲ ብዳፐ ጉየ፥ ሄ ዞኦ ዎዶሩዋ ማስኮትያን ቃቻሱ።

22 ኤንቲ ደርያኮ ብድ፥ ኤንታ ኮየይሳት እያርኮ ስማና ጋካናዉ ያን ሄꬑ ጋላስ ቆሰትዶሶና። ኤንታ ኮየይሳት ኦገ ኡባን ኮይዶሶና፥ ሽን ደምቦኮና። 23 ሄሳፈ ጉየ ሄ ናምኡ አሳት ደርያፐ ዎꬍዶሶና። ዮርዳኖሰ ፕንድ፥ ናወ ናኣ እያሱኮ ይድ፥ ባንታና ጋክዳባ ኡባ ኦድዶሶና። 24 ኤንቲ እያሱኮ፥ “ጎዳይ ቱማ ሄ ቢትዉ ኑስ አꬅድ እምስ። ቃስ ሄ ቢታን ደእያ አሳ ኡባይ፥ ኑስ ያይድ ትልእዶሶና” ያግዶሶና።