1 ዎንተꬃ ጋላስ፥ ዎንታ ጉራ እያሱይነ አሳይ ሴፅማ ጌተትያ በሳፈ ደንድድ፥ ዮርዳኖሰ ሻፋ ብድ፥ ፕኖና ያን ዱንካንዶሶና። 2 ሄꬑ ጋላሳፐ ጉየ፥ ሀላቃት ኤንቲ ዱንካንዳ ጉታ ገልድ፥ 3 “ሌወ ኮቸ ግድዳ ካህነት ቶክዳ፥ ጎዳ፥ ህንተ ፆሳ ጫቆ ታቦትያ ህንተ በእዳ ዎደ ዱንካንዳ ጉታፐ ደንድድ ኤንታ ካልተ። 4 ህንተ ካሰ ሀ ኦግያራ ብድ ኤሮና ግሾ፥ ህንተ ባና ኦግያ ኤንቲ በሳና። ሽን ጫቆ ታቦትያኮ ሺቆፕተ። ህንተ ግዶንነ ጫቆ ታቦትያ ግዶን ናምኡ ሙኩሉ ዋꬋ ግድያ ሃሆተꬅ ደኦ” ያግድ ኦድዶሶና።

5 እያሱይ አሳኮ፥ “ጎዳይ ዎንቶ ህንተ ግዶን ማላልስያባ ኦꬃና ግሾ፥ ህንተናተꬃ ጌሽተ” ያግስ። 6 ቃስ ካህነታስ፥ “ጫቆ ታቦትያ ቶክድ፥ አሳፐ ስን አꬍተ” ያግድ ኪትስ። ካህነት ጫቆ ታቦትያ ቶክድ፥ አሳፐ ስን አꬍዶሶና።

7 ጎዳይ እያሱኮ፥ “ታኒ ሙሰራ ግድዳይሳዳ፥ ኔራካ ግዳናይሳ አሳ ኡባይ ኤራና መላ ሀች እስራኤለ ኡባ ስንꬃን ነና ꬎቁ ꬎቁ ኦሶ ዶማና። 8 ኔን፥ ጫቆ ታቦትያ ቶክያ ካህነታስ፥ ‘ዮርዳኖሰ ሻፋ ዶና ጋክያ ዎደ ሃꬃ ግዶ ገልድ ኤቅተ’ ጋዳ ኪታ” ያግስ።

9 እያሱይ እስራኤለ አሳኮ፥ “ሃ ይድ ጎዳ፥ ህንተ ፆሳ ቃላ ስእተ። 10 ደኦ ፆሳይ ህንተ ግዶን ደኤይሳ ህንተ ኤራናይ፥ ካናነታ፥ ህተታ፥ ህወታ፥ ፓርዘታ፥ ገርገሰታ፥ አሞረታነ ያቡሰታ ህንተ ስንꬃፈ እ ጎድድ ከሰይሳና። 11 ቢታ ኡባ ጎዳ ጫቆ ታቦተይ ህንተፈ ስንꬃትድ፥ ዮርዳኖሰ ሻፋ ፕናና። 12 ህዛ ታማነ ናምኡ እስራኤለ ዘረꬃታፐ እስ እስ አስ ዶርተ። 13 ቢታ ኡባ ጎዳ ጫቆ ታቦትያ ቶክዳ ካህነታ ቶሆይ ዮርዳኖሰ ሃꬃ የꬍያ ዎደ ሃꬃይ ኤቃና። ቆሞፈ ዱገ ጎግያ ዮርዳኖሰ ሃꬃይ እስ ቦላ ሺቅድ ዶረታና” ያግስ።

14 አሳይ ዮርዳኖሰ ሻፋ ፕናናዉ ዱንካንዳ ጉታፐ ደንድያ ዎደ፥ ጫቆ ታቦትያ ቶክዳ ካህነት አሳ ስንꬃን ቦሶና። 15 ካꬅ ሺሽያ ዎደ ዮርዳኖሰ ሻፋይ መꬋይሳዳ ክፅኮካ፥ ጫቆ ታቦትያ ቶክዳ ካህነት ዮርዳኖሰ ሻፋ ጋክድ፥ ኤንታ ቶሆይ ሃꬃ ጋፃ የꬍዳ ዎደ፥ 16 ቆሞፈ ዱገ ጎግያ ሃꬃይ ኤቅስ። ዛርታና ማታን ደእያ አዳማ ካታማ ጋካናዉ ሺቅድ ዶረትስ። ዱገ ማፅነ አባኮ ጎግያ ሃꬃይ ኤቅስ። ያንን፥ አሳይ እያርኮ ካታማ ፕንዶሶና። 17 እስራኤለ አሳይ መላ ቢታራ ፕንድ ዉራና ጋካናዉ ጎዳ ጫቆ ታቦትያ ቶክዳ ካህነት ዮርዳኖሰ ሻፋ ግዶን መላ ቢታን ኤቅዶሶና።