1 አሳ ኡባይ ዮርዳኖሰ ፕንዳፐ ጉየ ጎዳይ እያሱኮ፥ 2 “እስ እስ እስራኤለ ኮቻፈ እስ እስ አስ ኤካዳ ታማነ ናምኡ አሳታ ዶራ። 3 ሄ አሳት ዮርዳኖሰ ሻፋ ግዶን ካህነት ኤቅዳ በሳፈ ታማነ ናምኡ ሹቻታ ኤካና መላነ ሄ ሹቻታ ሀች ህንተ ዱንካንድ አቅያ በሳን ዎꬃና መላ ኦዳ” ያግስ።

4 እያሱይ እስራኤለ ዘረꬃታፐ ዶረትዳ ታማነ ናምኡ አሳታ ፄግስ። 5 ኤንታኮ፥ “ጎዳ ህንተ ፆሳ ጫቆ ታቦተይ ደእያ በሳ ጉየ ዮርዳኖሰ ሻፋ ገልድ፥ እስ እስ እስራኤለ ዘረꬃታ ታይቦን ኡባይ እስ እስ ሹች ህንተ ሀሸን ቶክተ። 6 ሀ ሹቻት፥ ጎዳይ ሀች ኦꬅዳባ ህንተና ቆፍስያ ማላታ ግዳና። ዎንቶ ህንተ ናይት፥ ‘ሀ ሹቻት አይብሴ?’ ያግድ ኦይችያ ዎደ፥ 7 ህንተ ዛሪድ፥ ‘ጎዳ ጫቆ ታቦተይ ፕንያ ዎደ ዮርዳኖሰ ሃꬃይ ጎገꬅ አግስ። ሄሳ ግሾ፥ ሀ ሹቻት ሀ በሳን ሀንዳባ እስራኤለ አሳ ኡባ ዎደ ቆፍስያባ ግዳና’ ” ያግስ።

8 ሄ አሳት እያሱይ ኪትዳይሳዳ ኦꬅዶሶና። ጎዳይ እያሱስ ኦድዳይሳዳ፥ እስራኤለ ዘረꬃታ ታይቦን ዮርዳኖሰ ሻፋፐ ታማነ ናምኡ ሹቻታ ኤፍድ፥ ኤንቲ አቅያ በሳን ዎꬅዶሶና። 9 እያሱይ፥ ካህነት ዮርዳኖሰ ሻፋን ጫቆ ታቦትያ ቶክድ፥ ኤቅዳ በሳን ታማነ ናምኡ ሹቻታ ኤስስ። ሄ ሹቻት ሀች ጋካናዉ ያን ደኦሶና። 10 ሙሰይ እያሱ ኪትዳይሳ መላ፥ ጎዳይ እያሱ ኪትዳባ ኡባይ ፖለታና ጋካናዉ፥ ጫቆ ታቦትያ ቶክዳ ካህነት ዮርዳኖሰ ሻፋን ኤቅድ ጋምእዶሶና። አሳይ ኤለስድ ሻፋ ፕንዶሶና። 11 አሳ ኡባይ፥ ፕንዳፐ ጉየ፥ ጎዳ ጫቆ ታቦትያ ቶክዳ ካህነት አሳፐ ስን አꬍድ ካለꬅዶሶና። 12 ሙሰይ ኪትዳይሳዳ፥ ሮቤላነ ጋዳ ኮቻት፥ ቃስ ምናሰ ኮቻፈ ባጋይ ኦላስ ዳንጨትድ፥ አሳፐ ስንꬃትድ ፕንዶሶና። 13 ዳሮተꬃን ኦይታሙ ሙኩሉ ግድያ ኦላንቾት፥ ጎዳ ስንꬃን፥ እያርኮ ማታን ደእያ ደንባን ኦለታናዉ ሺቅዶሶና። 14 ሄ ጋላስ፥ ጎዳይ እያሱ እስራኤለ አሳ ኡባ ስንꬃን ꬎቁ ꬎቁ ኦꬅስ። ኤንቲ ሙሰ ቦንችዳይሳዳ እያሱካ እያ ደኦ ላይꬃ ኡባን ቦንችዶሶና።

15 ጎዳይ እያሱኮ፥ 16 “ጫቆ ታቦትያ ቶክዳ ካህነት ዮርዳኖሰ ሻፋፐ ከያና መላ ኦዳ” ያግስ። 17 እያሱይ ካህነት ዮርዳኖሰ ሻፋፐ ከያና መላ ኦድስ። 18 ጎዳ ጫቆ ታቦትያ ቶክዳ ካህነት ዮርዳኖሰ ሻፋፐ ከይዶሶና። ኤንታ ቶሆይ መላ ቢታ የꬍዳ ዎደ ኤለስድ፥ ዮርዳኖሰ ሃꬃይ ባ በሳ ስሚድ፥ ካሰ ጎገይሳዳ ጋፃ ጋክድ ጎገꬅ ኦይክስ።

19 አሳይ ኮይሮ አጌናን ታማንꬆ ጋላሳን ዮርዳኖሰ ሻፋ ፕንድ፥ እያርኮስ ዶሎሀ ባጋን ደእያ ጋልጋላን ዱንካንዶሶና። 20 እያሱይ ዮርዳኖሰ ሻፋፐ ኤከትዳ ታማነ ናምኡ ሹቻታ ጋልጋላን ኤስድ፥ 21 እስራኤለ አሳኮ ሀይሳዳ ያግስ፤ “ዎንቶ ህንተ ናይት፥ ‘ሀ ሹቻት አይብሴ?’ ያግድ ህንተና ኦይችያ ዎደ፥ 22 ‘እስራኤለ አሳይ ዮርዳኖሰ ሻፋ መላ ቢታራ የꬍድ ፕንዳይሳ ቆፍስያባ’ ያግድ ኦዴታ። 23 ኑኒ ፕናና ጋካናዉ፥ ጎዳይ፥ ኑ ፆሳይ ዞኦ አባ ካሰ ኑ ስንꬃን መልስዳይሳዳ፥ ህንተካ ፕናና ጋካናስ፥ ጎዳይ፥ ህንተ ፆሳይ ዮርዳኖሰ ሻፋ ህንተ ስንꬃን መልስዳይሳ ኦድተ። 24 ሄሳ ግሾ፥ ቢታን ደእያ አሳ ኡባይ፥ ጎዳ ዎልቃይ አይ መላ ግቴኮ ኤራና፤ ህንተካ ጎዳ፥ ህንተ ፆሳ፥ መርናዉ ቦንቻና” ያግስ።