1 እስራኤለ አሳይ ድገትዳባ ቦችድ፥ ጎዳስ ኪተቶና እፅዶሶና። ይሁዳ ኮቸ ግድዳ ካርማ ናአይ፥ ዘብዳ ናኣ ናአይ፥ ዛራ ናአይ አካን፥ ድገትዳባታፐ ኤክድ እስራኤለ ቦላ ጎዳ ሀንቁዋ ደንꬅስ።

2 እስራኤለ አሳይ እያርኮ ማታን ዱንካንድ ደእሽን፥ እያሱይ ቤት-አዌና ማታን ቤተለፐ ዶሎሀ ባጋን ደእያ ጋየ ካታማነ እያ ሄራ ፆሞስድ ያና መላ ጉꬃ አሳታ ኪትስ። ኪተትዳ አሳት ብድ፥ ጋየ ካታማ ፆሞስዶሶና።

3 ኤንቲ እያሱኮ ስሚድ ይድ፥ “ጋየ ካታማ ኦላናዉ አሳ ኡባይ ባናዉ ኮሸና፤ ናምኡ ዎይኮ ሄꬑ ሙኩሉ ኦላንቾት ቢኮ ግዳና። ያን ጉꬃ አስ ደእያ ግሾ፥ አሳ ኡባይ ዳቡራናዉ በሰና” ያግዶሶና። 4 ያትን፥ ሄꬑ ሙኩሉ ግድያ አሳት ኦላናዉ ጋየ ካታማ ብዶሶና። ሽን እስራኤለት ጋየ ካታማ አሳ ስንꬃፈ ባቃትዶሶና። 5 ጋየ ካታማ አሳይ እስራኤለ አሳፐ ሀስታማነ ኡሱፑን አሳ ዎꬍድ፥ ካታማ ድርሳ ፐንግያፈ ዶምድ፥ ሸባርመ ጋካናዉ እስራኤለ አሳ ዎꬍሸ ጎድዶሶና። እስራኤለ አሳ ዎዛናይ ትልእድ፥ ሃ ግድስ።

6 ያንን፥ እያሱይነ እስራኤለ ጭማት አዛንድ፥ ባንታ ማኡዋ ዳክዶሶና። ጎዳ ታቦትያ ስንꬃን ኦማርስ ጋካናዉ ጉፋንዶሶና። ባንታ ሁጰን ብዶ ቆልዶሶና። 7 ያትን፥ እያሱይ፥ “ሀይእ ጎዳ ፆሳዉ፥ ዮርዳኖሰ ሻፋ ፕንꬃዳ ነ ኑና ኤህዳይ አሞረታስ ኑና አꬃ እማናሴ? ዮርዳኖሰፐ ሄፍንꬃን ደእዳኮ ኑስ ሎኦሽን። 8 አቤት ጎዳዉ፥ እስራኤለ አሳይ ፆነትድ፥ ባንታ ሞርከታ ስንꬃፈ ባቃትኮ፥ ታ ዎይጎ? 9 ካናነትነ ሀ ቢታን ደእያ አሳ ኡባይ፥ ሄሳ ስእድ፥ ኑና ተቅድ፥ ቢታፈ ꬋይሳና። ያትን፥ ነ ግታ ሱንꬃ ግሾ ነ ኦꬃናይ አይቤ?” ያግስ።

10 ጎዳይ እያሱኮ፥ “አይስ ጉፋናዲ? ደንዳ ኤቃ። 11 እስራኤለ አሳይ ቆህዶሶና፤ ታ ኤንታና ኪትዳ ኪታ ናጎና እፅድ፥ ጫቁዋ መንꬅዶሶና። ኤንቲ ድገትዳባፐ ኤክዶሶና፤ ካይሶትዶሶና፤ ዎርዶትዶሶና፤ ቃስ ሄ ሚሽያ ባንታ ሚሽያራ ዋላክዶሶና። 12 ሄሳ ግሾ፥ እስራኤለ አሳይ ባንታ ሞርከታ ስንꬃን ኤቃናዉ ዳንዳእቦኮና። ኤንቲ ꬋያናዉ በሲያ ግሾ፥ ባንታ ሞርከታ ስንꬃፈ ጉየ ስሚድ ባቃትዶሶና። ህንተ ግዶፈ ꬋያናዉ በሲያባ ህንተ ꬋይሶና እፅኮ፥ ህዛፐ ታ ህንተራ ግድከ።”

13 ባዳ አሳ ጌሻ። ጎዳይ፥ እስራኤለ ፆሳይ፥ “ህንተ ኤካናዉ በሶናባ ኤክዳ ግሾ፥ ዎንቶስ ህንተናተꬃ ጌሽተ” ያጌስ ጋዳ ኦዳ። እስራኤለ አሳዉ፥ ሄሳ ህንተ ግዶፈ ድጎና እፅኮ፥ ህንተ ሞርከታ ስንꬃን ኤቃናዉ ዳንዳኤከታ። 14 ዎንቶ ዎንታ፥ ህንተ ዛርያን ዛርያን ሺቅተ። ጎዳይ ሻክያ ዛረይ ባ ኮቻን ኮቻን ሺቆ። ጎዳይ ሻክያ ኮቻይ ባ ሶ አሳን አሳን ሺቆ፤ ቃስ ጎዳይ ሻክያ ሶ አሳይ፥ እሶይ እሶይ ባዉ ሺቆ። 15 ድገትዳባ ኤክዳ ኡራይ ጎዳ ጫቁዋ መንꬅዳይነ እስራኤለ አሳ ቆህዳይ እያ ግድያ ግሾ፥ እነ እያዉ ደእያባ ኡባይ ታማን ፁገቶ።

16 እያሱይ ዎንተꬃ ጋላስ ጉራ ደንድድ፥ ኮቻን ኮቻን እስራኤለ አሳ ሺሽን፥ ጎዳይ ይሁዳ ኮቻይ ባላ ግደይሳ በስስ። 17 እያሱይ ይሁዳ ኮቻ ሺሽን፥ ጎዳይ ዛራሀ ኮቻይ ባላ ግደይሳ በስስ። ዛራሀ ኮቻ ሺሽን፥ ጎዳይ ዛብዳ ሶ አሳይ ባላ ግደይሳ በስስ። 18 ዛብዳ ሶ አሳይ እሶይ እሶይ ባዉ ሺቅን፥ ዉርሰꬃን ጎዳይ ዛብዳ ናአ ናኣ፥ ካርማ ናኣ አካን ባላ ግደይሳ ቆንጭስስ። 19 እያሱይ አካናኮ፥ “ታ ናአዉ፥ ጎዳ፥ እስራኤለ ፆሳ ቦንቻ፤ አነ ነ ኦꬅዳባ ታዉ ቆሶና ኦዳ” ያግስ።

20 አካን ዛሪድ፥ “ኤ ቱማ፥ ታኒ ጎዳ እስራኤለ ፆሳ ናቃስ። ታኒ ኦꬅዳይ ሀይሳ፤ 21 ኑኒ ድእድ ኤክዳ ሚሽያ ግዶፈ እስ ሎኦ ሳናኦራ ቢታ ካባ፥ ናምኡ ክሎ ግድያ ብራታ ብራነ ባጋ ክሎ ግድያ ዎርቃ በአዳ አሞታስ፤ ኤካስ። ያታዳ ታ ዱንካንያ ግዶን ቢታ ቦካዳ ብራ ጋርሳራ ዎꬃዳ ሞጋስ።”

22 ያትን፥ እያሱይ አሰ ኪትስ። ኤንቲ ዎፅ ብድ ዱንካንያ ግዶን ብራ ጋርሳራ ዎꬅድ ሞግዳ ሚሸታ ደምዶሶና። 23 ኪተትድ ብዳ አሳት ሄ ሚሸታ ዱንካንያፐ እያሱኮነ እስራኤለ አሳ ኡባኮ ኤህድ፥ ጎዳ ስንꬃን ዎꬅዶሶና።

24 ያትን እያሱይነ እስራኤለ አሳ ኡባይ፥ አካና፥ ብራ፥ ካባ፥ ዎርቃ፥ እያ አደ ናይታነ እያ ማጫ ናይታ፥ እያ መህያ፥ እያ ሀረታ፥ እያ ዶርሳታ፥ እያ ዱንካንያነ እያዉ ደእያባ ኡባ መቶ ዛንጋራ ጌተትያ በሳ ኤፍዶሶና። 25 እያሱይ አካናኮ፥ “ሀ መቱዋ ኑ ቦላ አይስ ኤሀዲ? ጎዳይ ሀች ነ ቦላ መቶ ኤሀና” ያግስ።

ያትን እስራኤለ አሳ ኡባይ፥ አካናነ እያ ሶ አሳ ሹቻን ጫድ ዎꬍድ፥ እያዉ ደእያባ ኡባራ ዎል ጋꬅድ ታማን ፁግዶሶና። 26 ኤንቲ አካና ቦላ ሀች ጋካናዉ በንትያ ዳሮ ሹች ኬልዶሶና። ያትን፥ ጎዳይ ባ ኤፅያ ሀንቁዋፈ ስምስ። ሀች ጋካናዉ ሄ በሳይ መቶ ዛንጋራ *መቶ ዛንጋራ፦ እብራወꬆ ዶናን አኮራ ዛንጋራ ጌተቴስ። ጌተትድ ፄገቴስ።