1 ጎዳይ እያሱኮ፥ “ያዮፋ፤ ህርጎፋ፤ ኦላንቾታ ኡባ ኔራ ኤካዳ፥ ጋየ ካታማ ኦላናዉ ከያ። ጋየ ካዋ፥ እያ አሳ፥ እያ ካታማነ እያ ቢታ ታ ነ ኩሸን አꬃዳ እማስ። 2 ኔን እያርኮ ቦላነ እያ ካዋ ቦላ ኦꬅዳይሳዳ ጋየ ቦላነ እያ ካዋ ቦላ ኦꬃና። ሽን ህንተ ሀእ ኦልድ ድእያ ሻሎነ መሄ ህንተዉ ኤክተ። ካታማፐ ጉየ ባጋራ ቆፖና መንꬃ ገላናዉ ጊገታ።”

3 ሄሳ ግሾ፥ እያሱይነ ኦላንቾት ኡባይ፥ ጋየ ካታማ ኦላናዉ ደንድዶሶና። እያሱይ ባ ኦላንቾታ ግዶፈ ሀስታሙ ሙኩሉ ግድያ ምኖ ኦላንቾታ ዶርድ ቃማ የድሸ፥ 4 ኤንታና ሀይሳዳ ያግድ ኪትስ፤ “ብድ ካታማፐ ጉየ ባጋራ ቆሰትድ ናግተ። ካታማፐ ሃክድ ቦናሽን፥ መንꬅ ገላናዉ ጊግድ ናግተ። 5 ታነ ታራ ደእያ አሳ ኡባይ፥ ካታማኮ ሺቃና። ሄ ዎደ ጋየ ካታማ አሳይ ኑና ኦላናዉ ያ ዎደ ካሰይሳዳ ኑ ኤንታ ስንꬃፈ ጉየ ስሚድ ባቃታና። 6 ኤንቲ ከሰይሳዳ ኑ ኤንታ ስንꬃፈ ባቃትያ ዳንን፥ ኑፐ ባቃቶሶና ግድ፥ ካታማፐ ኑ ኤንታ ሃሳና ጋካናዉ ኑና ካላና። 7 ሄ ዎደ ህንተ ቆሰትዳ በሳፈ ከይድ ካታማ ኦይክተ። ጎዳይ ህንተ ፆሳይ ካታማ ህንተ ኩሸን አꬅድ እማና። 8 ካታማ ኦይክዳፐ ጉየ፥ ጎዳይ ኪትዳይሳ መላ ታማን ፁግተ። ታ ህንተና ኪታስ” ያግስ።

9 ሄሳፈ ጉየ እያሱይ ኦላንቾታ ኪትስ። ኤንቲ ብድ ጋየ ካታማፐ ዉሎሀ ባጋን ቤተለፐነ ጋየፐ ግዶን ቆሰትድ ናግዶሶና። ሽን እያሱይ ሄ ቃማ አሳራ አቅስ።

10 ዎንተꬃ ጋላስ ጉራ እያሱይ ደንድድ፥ ኦላንቾታ ፄግስ። ያትድ፥ እነ እስራኤለ ጭማት ኦላንቾታ ካለꬅድ ጋየ ካታማ ብዶሶና። 11 እያራ ደእያ ኦላንቾት ኡባይ፥ ስን ብድ ጋየ ካታማ ማትድ፥ ካታማፐ ፑደሀ ባጋን ዱንካንዶሶና። ኤንታፈነ ጋየ ካታማፐ ግዶን ዛንጋር ደኤስ። 12 እያሱይ እቻሹ ሙኩሉ ኦላንቾታ ዶርድ፥ ካታማፐ ዉሎሀ ባጋራ፥ ቤተለፐነ ጋየፐ ግዶን ቆስድ ዎꬅስ። 13 ኦላንቾታፐ ባጋ ካታማፐ ፑደሀ ባጋራ፥ ቃስ ካታማ መንꬅድ ገላና ኦላንቾታ ዉሎሀ ባጋራ በሰ በሰ ኦይꬅስ። ሄ ቃማ እያሱይ ሄ ዛንጋራን አቅስ።

14 ጋየ ካታማ ካዎይ ሄሳ በእዳ ዎደ፥ ባ ኦላንቾታ ኡባ ኤክድ፥ እስራኤለ አሳራ ኦለታናዉ ደምባ ቢታ ከይዶሶና። ሽን ካዎይ ካታማፐ ጉየ ባጋራ ቆሰት ኡትዳ ኦላንቾት ደኤይሳ ኤርቤና። 15 እያሱይነ እስራኤለ አሳ ኡባይ ፆነትዳባ ዳንድ፥ ኤንታ ስንꬃፈ መላ ቢታ ስሚድ ባቃትዶሶና። 16 ጋየ ካታማን ደእያ አሳ ኡባይ፥ ኤንታ የደꬃናዉ ፄገረት ከይድ፥ እያሱ ጎድሸ ካታማፐ ሃክድ ብዶሶና። 17 ጋየ ዎይኮ ቤተለን ደእያ አሳ ኡባይ፥ እስራኤለ አሳ የደꬃናዉ ካታማ የግድ ከይን ካታማ ፐንገያ ናግያ አስ ꬋይዳ ግሾ፤ ዶያ አትስ።

18 ሄሳፈ ጉየ ጎዳይ እያሱኮ፥ “ነ ቶራ ጋየ ካታማ ቦላ ደንꬃ። ታኒ ጋየ ካታማ ነ ኩሸን አꬃዳ እማና” ያግስ። ያትን እያሱይ ባ ቶራ ካታማ ቦላ ደንꬅስ። 19 እያሱይ ባ ቶራ ደንꬅዳ ዎደ ቆሰትዳ ኦላንቾት ባንታ በሳፈ ደንድድ፥ ካታማ ገል ኦይክድ፥ ኤለስድ ታማን ፁግዶሶና።

20 ጋየ ካታማ አሳይ ጉየ ስሚድ ፄልያ ዎደ፥ ካታማ ጩያይ ሳሎ ደንድሽን በእዶሶና። መላ ቢታ ባቃትዳ እስራኤለ አሳይ፥ ባንታና የደꬅያ አሳ ቦላ ጉየ ስምዳ ግሾ፥ ኤንቲ አዉ ባጋራካ ከስ ኤካናዉ ዳንዳእቦኮና። 21 እያሱነ እያራ ደእያ አሳ ኡባይ፥ ቆሰት ኡትዳ ኦላንቾት ካታማ ኦይክዳይሳነ ጩያይ ሳሎ ደንድዳይሳ በእዳ ዎደ ጉየ ስሚድ፥ ጋየ ካታማ አሳ ዎꬍዶሶና። 22 ካታማ ገልድ ኦይክዳ ኦላንቾትካ ካታማፐ ኤንታ ቦላ ከይዶሶና። ያትን፥ ጋየ አሳይ እስራኤለ ኦላንቾታን ኡባ ባጋራ ተቀትዳ ግሾ፥ እሶይካ አቶና ዎይኮ ከስ ኤኮና ኡባ ዎꬍድ ዉርስዶሶና። 23 ሽን ጋየ ካታማ ካዋ ደእድ፥ እያሱኮ ኤህዶሶና።

24 እስራኤለ አሳይ ጋየ ካታማ አሳ ኤንታና የደꬅዳ በሳን ማሻን ዎꬍድ ኦንግዳፐ ጉየ፥ ኡባይ ጉየ ካታማ ስሚድ፥ ካታማን አትዳ አሳ ኡባ ማሻን ዎꬍዶሶና። 25 ሄ ጋላስ ጋየ ካታማን ሀይቅዳ አደይነ ማጭ ታማነ ናምኡ ሙኩላ። 26 እያሱይ ጋየ ካታማን ደእያባ ኡባ ኦንጋና ጋካናዉ ካታማ ቦላ ደንꬅዳ ቶራ ዱገ ዎꬅቤና። 27 ሽን ጎዳይ እያሱ ኪትዳይሳ መላ እስራኤለ አሳይ ሄ ካታማ መህያነ ሻሉዋ ባንታዉ ድእዶሶና። 28 እያሱይ ጋየ ካታማ ፁግስ፤ ሄ ካታማይ ሀች ጋካናዉ ላለꬃ ዶረነ አስ ባይና በሲ ግድድ አትስ። 29 እያሱይ፥ ጋየ ካታማ ካዋ ዎꬍድ ኦማርስ ጋካናዉ ምꬃ ቦላ ካቅስ። አው ዉልያ ዎደ፥ እያ አሀ ካታማ ገልያ ፐንገን የጋና መላ ኦꬅስ። እያ ቦላ ዳሮ ሹቻ ኬልዶሶና፤ ሄ ኬላ ሹቻይ ሀች ጋካናዉ ሄ በሳን ደኤስ።

30 ሄሳፈ ጉየ፥ እያሱይ ኤባላ ደርያ ቦላ ጎዳስ እስራኤለ ፆሳስ ያርሾ በሲ ኬፅስ። 31 ጎዳ አይለይ ሙሰይ እስራኤለ አሳ ኪትዳይሳዳነ ህገ ማፃፋን ፃፈትዳይሳዳ፥ ያርሾ በሳ ማሰትቦናነ ብራት ቦችቦና ሹቻፈ ኬፅድ፥ እያ ቦላ ጎዳስ ፁሳ ያርሾነ እስፈተꬃ ያርሾ ያርሽዶሶና። 32 እያሱይ፥ እስራኤለ አሳ ስንꬃን፥ ሙሰ ህግያ ሹቻ ቦላ ዛሪድ ፃፍስ። 33 እስራኤለ አሳ አንጃና መላ ጎዳ አይለይ ሙሰይ ኪትዳይሳዳ እስራኤለ አሳ ኡባይ፥ አሳ ጋደ አሳታ፥ ኤንታ ጭማት፥ ኤንታ ሹማትነ ዳይናት ኡባይ፥ ጎዳ ጫቆ ታቦትያ ቶክዳ ሌወ ኮቸ ግድዳ ካህነታ ስንꬃን ኡሻቻ ባጋንነ ሀድርሳ ባጋን ኤቅዶሶና። ኤንታፈ ባጋይ ጋርዛና ዙማ ስንꬃን፥ ቃስ ባጋይ ኤባላ ደርያ ስንꬃን ኤቅዶሶና። ዛረ 11:29፤ 27:11-14. 34 ህገ ማፃፋን ፃፈትዳይሳዳ፥ እያሱይ ህገ ቃላ ኡባ፥ አንጁዋነ ባደꬃ ናባብስ። 35 ሙሰይ ኪትዳ ህግያ እያሱይ፥ እስራኤለ አሳ ኡባስ፥ ማጫሳስ፥ ናይታስነ፥ አሳ ጋደ አሳስ እስ ቃላካ አሾና ናባብስ።