1 ዮርዳኖሰ ሻፋፐ ዉሎሀ ባጋን ደረይ ዳርያ ቢታንነ ጋꬋን መደትራነ አባፈ ብድ ልባኖሰ ጋካናዉ ደእያ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ካዎት ኡባይ፥ ጋየ አሳይ ፆነትዳይሳ ስእዳ ዎደ፥ 2 እያሱነ እስራኤለታ ኦላናዉ እስፈ ሺቅድ ዞረትዶሶና።

3 ጋባኦና አሳይ እያሱይ እያርኮ ቦላነ ጋየ ካታማ ቦላ ኦꬅዳባ ስእድ፥ 4 እያሱ ጭማናዉ ኮይዶሶና። ኤንቲ ሽንቀ ቃችድ፥ ጭማ ዎይነ ኦጎሮነ ጩርቃ ቃርፂቴ ሀረ ቦላ ጫንድ፥ እያሱኮ አሰ ኪትዶሶና። 5 ኪተትዳ አሳት ዉርዳ ጫማ አꬅዶሶና፤ ፔትዳ አፍላ ማእዶሶና፤ ኤንቲ ኦይክዳ ሽንቀይካ መልዳባነ መቀርትዳባ። 6 ኤንቲ እስራኤለ አሳይ ዱንካንዳ ጉታ ጋልጋላ ብድ፥ እያሱኮነ እስራኤለ አሳኮ፥ “ኑኒ ሃሆ ጋደፐ ይዳ። ኑ ይዳይ ህንተራ ጫቀትድ ሳሮ ዳናሳ” ያግዶሶና።

7 ያትን፥ እስራኤለ አሳይ ጋባኦነ አሳኮ፥ “ህንተ ኑ ማታን ደእያ አሰኮሽ? ኑ አይብን ኤርድ ህንተራ ጫቀታኔ?” ያግዶሶና።

8 ኤንቲ እያሱኮ፥ “ኑ ነ አይለታ” ያግድ ዛርዶሶና።

እያሱይ ዛሪድ፥ “ህንተ ኦናንቴ? አዉፐ ይደቲ?” ያግድ ኦይችስ።

9 ኤንቲ ዛሪድ፥ “ኑኒ ነ አይለት ጎዳይ ህንተ ፆሳይ ግብፀን ኦꬅዳይሳ ስእዳ ግሾ፥ ዳሮ ሃሆ ጋደፐ ይዳ። 10 ቃስ ዮርዳኖሰ ሻፋፐ ሄፍንꬃን ዉሎሀ ባጋን ደእያ ናምኡ አሞረ ካዎታ፥ ሀሰቦና ካዋ ስሆናነ አስታሮተን ደእያ ባሳነ ካዋ ኦገ ቦላ እ ኦꬅዳይሳ ኑ ስእዳ። 11 ኑ ቢታ ጭማትነ ኑ ቢታን ደእያ ኡባይ፥ ኦገስ ሽንቀ ጊግስ ኦይክድ ብድ ኤንታራ ጋሄትድ፥ ኤንታኮ፥ ‘ኑ ህንተ አይለታ፤ ኑ ይዳይ ህንተራ ጫቀትድ ሳሮ ዳናሳ’ ያግተ።

12 “ኑ ኦይክዳ ሽንቅያ በእተ። ኑ ሶፐ ኤክድ ከይያ ዎደ ሆኦ፥ ሽን ሀእ መልዳይሳነ ፑሉምዳይሳ በእተ። 13 ሀ ዎይንያ ኦጎሮታን ኑ ኩንꬅያ ዎደ ኦራꬅ፥ ሽን ሀእ ዳከትዳይሳ በእተ። ኦግያ ሃሆተꬃፈ ደንዶይሳን ኑ ማኦይነ ኑ ጫማይ ዉርስ” ያግዶሶና። 14 ሽን ጎዳ ሸንያ ኦይቾና ደእሸ፥ እስራኤለ አሳይ ኤንታ ሽንቅያፈ ጉꬃራ ኤክዶሶና። 15 ያትን፥ እያሱይ ህንተና ዎꬎኮ ግድ ሳሮ ጫቆ ኤንታራ ጫቀትስ። እስራኤለ ጭማትካ ሄ ጫቁዋ መንꬆኮ ግድ ጫቅዶሶና።

16 ኤንታራ ጫቅዳ ሄꬓንꬆ ጋላሳን ሄ አሳት ኤንታ ቢታን ደኤይሳነ ኤንታዉ ሾሮ ግደይሳ እስራኤለ አሳይ ስእዶሶና። 17 እስራኤለ አሳይ ሄꬑ ጋላስ ሄመትድ፥ ሄ አሳት ደእያ ካታማታ ጋክዶሶና። ኤንታ ካታማት ጋባኦና፥ ካፍራ፥ ባሮተነ ቅርያት-ይኣርማ ጌተትድ ፄገቶሶና። 18 ሽን እስራኤለ ጭማት ኤንታዉ ጎዳ፥ እስራኤለ ፆሳ ሱንꬃን ጫቅዳ ግሾ፥ እስራኤለ አሳይ ኤንታ ዎꬍቦኮና። ያትን፥ አሳ ኡባይ ጭማታ ቦላ ዙዙምዶሶና። 19 ሽን እስራኤለ ጭማት፥ “ኑ ኤንታዉ ጎዳ እስራኤለ ፆሳ ሱንꬃን ጫቅዳ ግሾ፥ ሀእ ኤንታ ቦቻናዉ ዳንዳኦኮ። 20 ኑኒ ኤንታዉ ሀይሳዳ ኦꬃና፤ ኑኒ ኤንታዉ ጫቅዳ ጫቁዋ መንꬅን ጎዳ ሀንቆይ ኑ ቦላ ዮናዳ ኤንታ ዎꬎኮ። 21 ኤንቲ ደኦ ጊተ። ግዶሽን እስራኤለ አሳ ኡባስ ምꬅነ ሃ ሺሸይሳታ ግዶ” ያግዶሶና። ሄሳ ግሾ፥ ጭማት ባንታ ጫቁዋ ናግዶሶና።

22 እያሱይ ጋባኦና አሳ ፄግድ፥ “ኑ ማታን ደእሸ፥ ‘ኑኒ ዳሮ ሃሆ ቢታፈ ይዳ’ ግድ፥ ኑና አይስ ጭምደቲ? 23 ህንተ ሄሳ ኦꬅዳ ግሾ፥ ባደትዳይሳታ። ህንተ መርናዉ ታ ፆሳ ኬꬃን ምꬅነ ሃ ሺሽያ አይለ ግዳና” ያግስ።

24 ኤንቲ ዛሪድ፥ “ኑኒ ነ አይለት፥ ጎዳይ ህንተ ፆሳይ ሀ ቢታን ደእያ አሳ ኡባ ꬋይስድ፥ ቢታ ህንተዉ እማናዉ ባ አይልያ ሙሰስ ኦድዳይሳ ስእዳ። ሄሳ ግሾ፥ ህንተዉ ባብድ ሀይሳ ኦꬅዳ። 25 ሀእ ኑኒ ነ ኩሸን ደኦስ። ነዉ ሎኦነ ሱረ ዳንድ በንትዳባ ኦꬃ” ግድ ዛርዶሶና። 26 እያሱይ እስራኤለ አሳይ ኤንታ ዎꬎና መላ አሽስ። 27 ሄ ጋላስ እያሱይ፥ ጋባኦና አሳታ እስራኤለታስነ ጎዳይ ዶርዳ በሳን ደእያ እያ ያርሾ በሳስ ሃነ ምꬅ ሺሽያ አስ ግዳና መላ ኦꬅስ። ጋባኦና አሳት ሀች ጋካናዉ ሄሳ ኦꬆሶና።