1 እያሱይ እያርኮ ካታማ ኦል ꬋይስድ፥ እያ ካዋ ዎꬍዳይሳዳ፥ ጋየ ካታማ ኦል ꬋይስድ፥ እያ ካዋ ዎꬍዳይሳ የሩሳላመ ካዎይ አዶን-ፀደቅ ስእስ። ቃስ ጋባኦና አሳይ እስራኤለ አሳራ ሳሮ ዳናዉ ጫቀትዳይሳ ስእስ። 2 ጋባኦን ሀንኮ ካዎ ካታማታዳ ግታ ካታማ፤ ሄ ካታማይ ጋየ ካታማፐ አꬌስ፤ እያን ደእያ አደትካ ምኖ ኦላንቾ ግደይሳ ኤርያ ግሾ፥ አዶንፀደቅነ እያ አሳይ ዳሮ ያይዶሶና። 3 ሄሳ ግሾ፥ የሩሳላመ ካዎይ አዶን-ፀደቅ፥ ከብሮና ካዋ ሆሀማስ፥ ያርሙታ ካዋ ፕራማስ፥ ላክሶ ካዋ ያፍአስነ፥ ኤግሎና ካዋ ዳብራስ ሀይሳዳ ያግድ ኪትስ፤ 4 “ጋባኦና አሳይ እያሱራነ እስራኤለ አሳራ ሳሮ ደአናዉ ጫቅዳ ግሾ፥ ኤንታ ኦላናዉ ይድ ታና ማድተ” ያግስ። 5 ሀ እቻሹ አሞረ ካዎት ባንታ ኦላንቾታ እስፈ ጋꬅድ፥ ጋባኦና ኦልዶሶና።

6 ጋባኦና አሳይ ጋልጋላን ዱንካንዳ እያሱኮ፥ “ኑና ነ አይለታ አጎፋ፤ ኤለሳ ያዳ ኑና አሻ። ደረይ ዳርያ ቢታን ደእያ አሞረ ካዎት ኡባይ ኑና ኦላናዉ ባንታ ኦላንቾታ እስኖ ኦꬅዳ ግሾ፥ ነ ኑና ማዳ” ያግድ ኪትዶሶና።

7 ሄሳ ግሾ፥ እያሱይ፥ ባራ ደእያ ኦላንቾታነ ምኖ አሳታ ኡባ፥ ጋልጋላፐ ኤክድ ብስ። 8 ጎዳይ እያሱኮ፥ “ኤንታዉ ባቦፋ፤ ታኒ ኤንታ ነ ኩሸን አꬃዳ እማስ። ኤንታፈ እስ አስካ ኔራ ኤቀታናዉ ዳንዳኤና” ያግስ። 9 እያሱይ ጋልጋላፐ ቃማ ኩመꬅ ሄመትሸ አቅድ፥ ጋባኦነ አሳይ ቆፖና ደእሽን ኤንታ ቦላ ኦላ ደንꬅስ። 10 ጎዳይ እስራኤለ አሳ ስንꬃን ኤንታዉ ዎዛና ካሀ ꬋይስስ። እስራኤለ አሳይ ኤንታ ጋባኦናን ዎꬍዶሶና። እስራኤለት ኤንታ ቤት-ሆሮና ኤፍያ ኦግያ ኦይꬅድ ጎድሸ፥ አዜቃነ ማቀዳ ጋካናዉ ጎድዶሶና። 11 ኤንቲ ቤት-ሆሮናፐ ዱገ አዜቃ ኤፍያ ኦግያራ እስራኤለ አሳ ስንꬃፈ ባቃትሽን፥ ጎዳይ ግታ ሻቻ ሹቹ ሳሎፐ ኤንታ ቦላ ቡክስስ። እስራኤለ አሳይ ዎꬍዳ አሳፐ፥ ሻቻይ ዎꬍዳ አሳይ ዳሮ።

12 ጎዳይ እስራኤለ አሳስ አሞረታ፥ አꬅድ እምዳ ጋላስ፥ እስራኤለ አሳይ ስእሽን፥ እያሱይ፥

13 እስራኤለ አሳይ ባንታ ሞርከታ ፆናና ጋካናዉ፥ አዋይ ዉሎና ኤቅስ፤ አጌናይካ ባ ደእያ በሳፈ ቃፅቤና።

ሄስ ያሻራ ማፃፋን ፃፈትስ። አዋይ ሳሎስ ግዶን ቃፆና ኤቅስ፤ እስ ጋላስ ኩመꬅ አዋይ ዉሎና ጋምእስ። 14 ጎዳይ አሳ ቃላ ስእዳ ሄ ጋላሳ መላ ጋላስ ሀይሳፈ ካሰካ ሀይሳፈ ስንꬃንካ ዴና። ቱማካ ጎዳይ እስራኤለ አሳስ ኦለትስ። 15 ሄሳፈ ጉየ፥ እያሱይነ እያ ኦላንቾት ባንታ ዱንካንዳ ጉታ ጋልጋላ ስምዶሶና።

16 ሄ እቻሹ አሞረ ካዎት ባቃትድ፥ ማቀዳ ጎንጎሉዋን ቆሰትዶሶና። 17 እቻሹ ካዎት፥ ማቀዳ ጎንጎሉዋን ቆሰትድ ደእሽን ደምዳይሳ እያሱስ ኦድዶሶና።

18 እያሱይ ዛሪድ፥ “ግታ ሹቻታ ጎንዶርስድ፥ ጎንጎሉዋ ዶና ጎርድተ፤ ኤንታ ናጋና መላ አሰ ያን ዎꬅተ። 19 ሽን ህንተ ያን ጋምኦፍተ፤ ኤንቲ ባንታ ካታማ ገልድ አቶና መላ ህንተ ሞርከታ ጎድድ ኤንታ ዎꬍተ። ጎዳይ ህንተ ፆሳይ ኤንታ ህንተ ኩሸን አꬅድ እምስ” ያግስ። 20 ጉꬃ አሳት ባቃትድ ባንታ ግምበትዳ ካታማ ገልድ አትኮካ፥ እያሱይነ እስራኤለ አሳይ አሳ ኡባ ዎꬍዶሶና። 21 ሄሳፈ ጉየ፥ እስራኤለ አሳ ኡባይ ሳሮን ስሚድ፥ እያሱይ ዱንካንድ ደእያ ጉታ ማቀዳ ይዶሶና። ሄ ዎደፐ ዶምድ ኦንካ እስራኤለ አሳ ቦላ እስ ቃላካ ኦደታናዉ ፃልዳ አስ ባዋ።

22 ሄሳፈ ጉየ፥ እያሱይ፥ “ጎንጎሉዋ ዶና ዶይድ፥ ሄ እቻሹ ካዎታ ከስድ፥ ታዉ ሀ ኤክድ ዪተ” ያግስ። 23 ጎንጎሉዋ ዶና ዶይድ፥ የሩሳላመ ካዋ፥ ከብሮና ካዋ፥ ያርሙታ ካዋ፥ ላክሶ ካዋነ ኤግሎና ካዋ እያኮ ኤህዶሶና። 24 ኤንቲ ሄ ካዎታ እያኮ ኤህዳ ዎደ፥ እያሱይ እስራኤለ አሳ ኡባ ባኮ ፄግድ፥ ባራ ብዳ ቶራ ሞጮናታኮ፥ “ሃ ይድ፥ ህንተ ቶሁዋ ሀ ካዎታ ቆꬍያን ዎꬅተ” ያግስ። ኤንቲ ይድ ኪተትዳይሳዳ ኦꬅዶሶና። 25 እያሱይ ኤንታኮ፥ “ህንተ ኦለትያ ህንተ ሞርከታ ቦላ ጎዳይ ሀይሳዳ ኦꬃና ግሾ፥ አይኮይ ባዋ ያዮፍተ፤ ምንተ” ያግስ።

26 እያሱይ ሄ እቻሹ ካዎታ ዎꬍድ፥ እቻሹ ምꬃ ቦላ ካቅስ፤ ኤንታ አሀይ ኦማርስ ጋካናዉ ያን ፔእስ። 27 አው ዉልያ ዎደ እያሱይ፥ “አሀ ዎꬍስድ፥ ኤንቲ ካሰ ቆሰትዳ ጎንጎሉዋን ሆልተ። ያትድ፥ ሄ ጎንጎሉዋ ዶና ግታ ሹቻን ጎርድተ” ያግድ ኪትስ። ሄ ሹቻት ሀች ጋካናዉ ያን ደኦሶና።

28 ሄ ጋላስ እያሱይ ማቀዳ ካታማ ኦይክስ፤ ካታማ ካዋካ ዎꬍስ፤ ካታማን ደእያ አሳ ኡባ እስ አስካ አሾና ꬋይስስ። እያርኮ ካታማ ካዋ ቦላ ኦꬅዳይሳዳ፥ ማቀዳ ካታማ ካዋ ቦላ ኦꬅስ።

29 ያፐ ስሚድ፥ እያሱይነ እያ ኦላንቾት ኡባይ ማቀዳፐ ብድ ልብና ካታማ ኦልዶሶና። 30 ጎዳይ ሄ ካታማነ ካታማ ካዋ ኤንታ ኩሸን አꬅድ እምስ። እያሱይ ካታማን ደእያ አሳፐ እሱዋካ አሾና ማሻን ዎꬍስ። እያርኮ ካታማ ካዋ ቦላ ኦꬅዳይሳዳ ልብና ካታማ ካዋ ቦላ ኦꬅስ።

31 እያሱይነ እያ ኦላንቾት ልብና ካታማፐ ላክሶ ካታማ ብድ፥ ሄ ካታማ ኦልዶሶና። 32 ጎዳይ ላክሶ ካታማ እስራኤለ አሳ ኩሸን አꬅድ እምን፥ እያሱይ ሄ ካታማ ዩሹዋ ተቅድ ናምአንꬆ ጋላሳን ኦይክስ። ልብና ካታማን ኦꬅዳይሳዳ ላክሶ ካታማን ደእያ አሳ ኡባ ማሻን ዎꬍስ። 33 ሄ ዎደ፥ ገዘራ ካዎይ ሆራም፥ ላክሶ ካዋ ማዳናዉ ይስ፥ ሽን እያሱይ እያነ እያ ኦላንቾታ ꬋይስስ፤ ኤንታፈ እስ አስካ አትቤና።

34 ሄሳፈ ስሚድ፥ እያሱይነ እያ ኦላንቾት ኡባይ ላክሶ ካታማፐ ኤግሎና ካታማ ብድ፥ ሄ ካታማ ዩሹዋ ተቅድ ኦልዶሶና። 35 ሄ ጋላስ ኤግሎና ካታማ ኦይክድ፥ ላክሶ ካታማን ኦꬅዳይሳዳ ማሻን አሰ ኡባ ዎꬍዶሶና።

36 ያት ስሚድ፥ እያሱይነ እያ ኦላንቾት ኤግሎናፐ ከብሮና ብድ፥ ከብሮና ኦልዶሶና። 37 ሄ ካታማነ እያ ዩሹዋን ደእያ ጉꬃ ካታማታ ኦይክድ እያን ደእያ አሳነ ካዋ ዎꬍዶሶና። እያሱይ ኤግሎናን ኦꬅዳይሳዳ ሄ ካታማ ቦላካ ኦꬅስ።

38 ሄሳፈ ጉየ፥ እያሱይነ እያራ ደእያ እስራኤለ ኦላንቾት ጉየ ስሚድ ዳብራ ካታማ ኦልዶሶና። 39 ሄ ካታማነ እያ ዩሹዋን ደእያ ጉꬃ ጉታታ ኦይክድ፥ እያን ደእያ አሳነ ካዋ ዎꬍዶሶና። እያሱይ ከብሮናነ ልብና ካታማታ ቦላ ኦꬅዳይሳዳ ዳብራ ቦላ ኦꬅስ።

40 እያሱይ ሄ ቢታን ደእያ ካታማታ ኡባ ኦይክስ። ደረይ ዳርያ ቢታን፥ ነገበ ጋꬋን፥ ሎቡዋነ ኤንታ ካዎታ ኡባ ኦይክስ። ጎዳይ እስራኤለ ፆሳይ እያ ኪትዳይሳዳ፥ ቢታ ቦላ ደእያ አስ እሱዋካ አሾና ኡባ ዎꬍድ ꬋይስስ። 41 እያሱይ ቃደስ-ባርነፈ ብድ ጋዛ ጋካናዉ ቃስ ጎሸና ቢታፈ ብድ ጋባኦና ጋካናዉ ደእያ ኡባ ኦልድ ፆንስ። 42 ጎዳይ፥ እስራኤለ ፆሳይ፥ እስራኤለታስ ኦለትዳ ግሾ እያሱይ ሀ ካዎታነ ኤንታ ቢታ ኡባ ኦልድ ኦይክስ። 43 ሄሳፈ ጉየ፥ እያሱይነ እስራኤለ ኦላንቾት ባንታ ዱንካንዳ ጉታ ጋልጋላ ስምዶሶና።