1 ሀዞራ ካዎይ ያብን፥ እስራኤለታ ፆኑዋ ስእዳ ዎደ ማዶና ካዋ ዮባባስ፥ ሽምሮና ካዋስ፥ አዝፋ ካዋስ፥ 2 ፑደሀ ገዘን ደእያ ካዎታስ፥ ከነሬታ አባፈ ዱገሀ ባጋን ዮርዳኖሰ ዛንጋራን ደእያ ካዎታስ፥ ናፋት-ዶራፐ ዉሎሀ ባጋራ ጋꬋን ደእያ ካዎታስ ኪታ የድስ። 3 ቃስ ዶሎሀነ ዉሎሀ ባጋን ደእያ ካናነታስ፥ አሞረታስ፥ ህተታስ፥ ፓርዘታስ፥ ደረይ ዳርያ ቢታን ደእያ ያቡሰታስነ ምፅጳን አርሞና ዙማፐ ጋርሳን ደእያ ህወታስ ኪትስ። 4 ኤንቲ ኡባይ፥ ባንታ ኦላንቾታ፥ ፓራታነ ፓራ ጋረታ እስፈ ጋꬅድ ይዶሶና። ኤንታ ታይቦይ አባ ጋፃን ደእያ ሻፈ መላ። 5 ሄ ካዎት ኡባይ ባንታ ዎልቃ እስፈ ጋꬅድ፥ እስራኤለታ ኦላናዉ መሮመ ሃꬃ ማታን ዱንካንዶሶና።

6 ጎዳይ እያሱኮ፥ “ነ ኤንታዉ ባቦፋ፤ ታኒ ዎንቶ ሀኖደ ኤንታ ኡባ ዎꬋዳ እስራኤለ አሳስ አꬃ እማና። ኔን ኤንታ ፓራታ ጋድያ ቃንፃና፤ ኤንታ ፓራ ጋረታካ ታማን ፁጋና” ያግስ። 7 እያሱይነ እያ ኦላንቾት ኡባይ ኤንቲ ቆፖና ደእሽን መሮመ ሃꬃ ማታን ኤንታ ቦላ ከይድ ኦልዶሶና። 8 ጎዳይ ኤንታና እስራኤለታ ኩሸን አꬅድ እምስ። እስራኤለት ኤንታ ኦልድ፥ ግታ ስዶናነ ማስሮታ ጋካናዉ፥ ቃስ ዶሎሀ ባጋን ደእያ ምፅጳ ዛንጋራ ጋካናዉ ኤንታና የደꬅዶሶና። ኤንታፈ እስ አስካ አሾና ኡባ ዎꬍዶሶና። 9 እያሱይ፥ ጎዳይ ኪትዳይሳዳ ኡባ ቦላ ኦꬅስ፤ ኤንታ ፓራታ ጋድያ ቃንፅስ፤ ኤንታ ጋረታ ፁግስ።

10 ያትድ፥ እያሱይ ጉየ ስሚድ፥ ሀዞራ ኦል ኦይክድ፥ ካዉዋካ ማሻን ዎꬍስ። ሄ ዎደ ሀዞራ ካዎተꬃይ ሀራ ካዎተꬃ ኡባስ ሁጰ። 11 እስራኤለ አሳይ ሀዞራን ደእያ አሳ ኡባ ማሻን ዎꬍዳ ግሾ ሸምፖራ አትዳ አስ ባዋ። ሄ ካታማይ ታማን ፁገትስ።

12 ጎዳ አይለይ ሙሰይ ኪትዳይሳዳ፥ እያሱይ ሄ ካታማታነ ኤንታ ካዎታ ኡባ ድእስ። እስ አስካ አሾና አሳ ኡባ ማሻን ዎꬍስ። 13 ግዶሽን፥ እያሱይ ፁግዳ ሀዞራ ካታማፐ አትሽን፥ ዞዘ ቦላ *ዞዘ ቦላ፦ ሄስ መꬎ ዞዘ ግዶናሽን ካታማት ኦላን ላለትን ካሰ ቢታ ደንꬆናሽን እያ ቦላ ኬፅሽን ዶረትድ ዞዘ ግድስ ጉሱ። ኬፀትዳ ካታማታ እስራኤለ አሳይ ፁግቦኮና። 14 እስራኤለ አሳይ ሄ ካታማታፐ ቦንቅዳ፥ ሚሽያነ መሄ ኡባ ባንታዉ ኤክዶሶና። እስ አስካ አሾና አሳ ኡባ ማሻን ዎꬍዶሶና። 15 ጎዳይ ባ አይልያ ሙሰ ኪትዳይሳዳ፥ ሙሰይ እያሱ ኪትስ፤ እያሱይካ ኪታ ፖልስ። ጎዳይ ሙሰ ኪትዳባፐ እስባካ እያሱይ አሽቤና፤ ኡባ ኦꬅስ።

16 እያሱይነ እያ ኦላንቾት ደረይ ዳርያ ቢታ፥ ነገበ መላ ቢታ፥ ጎሸና ቢታ ኡባ፥ ዉሎሀ ባጋን ደእያ ጋꬋነ ዮርዳኖሰ ዛንጋራ ኦልድ ኦይክስ። 17 እ ሳይረ ካንꬅስያ ሀላቃ ዙማፐ ብድ፥ አርሞና ዙማፐ ጋርሳ ባጋን ደእያ ልባኖሰ ዛንጋራነ ባኣል-ጋደ ጋካናዉ ደእያ ቢታታ ኦይክስ። ኤንታ ካዎታ ኡባ ሾጭስ፤ ድእድ ዎꬍስ። 18 እያሱይ ዳሮ ዎደ ሄ ካዎታ ኡባራ ኦለትስ። 19 ጋባኦናን ደእያ ህወታፐ አትሽን፥ ሀራ ካታም እስራኤለታራ ሳሮ ዳናዉ ጫቅዳይ ባዋ። እስራኤለት ሀራ ካታማታ ኡባ ኦላን ፆንድ ኦይክዶሶና። 20 ጎዳይ ሙሰ ኪትዳይሳዳ፥ እያሱይ ኤንታ ማሮት ባይና ኡባ ዎꬋና መላ ጎዳይ ኤንታ ዎዛና ሙምስድ እስራኤለታ ኦላና መላ ደንꬅስ።

21 ሄ ዎደ እያሱይ ብድ ደረይ ዳርያ ከብሮናን፥ ዳብራን፥ አናባን፥ ደረይ ዳርያ ይሁዳንነ እስራኤለን ደእያ አዱሳታ፥ አናቀ ኮቻታ ዎꬍድ ኦንግስ። እያሱይ ኤንታነ ኤንታ ካታማታ ኩመꬅ ꬋይስስ። 22 አናቀ ኮቻታፐ ኦንካ እስራኤለ ቢታን አትቤና፥ ሽን ጋዛን፥ ጋታንነ አሽዶዳን ጉꬃት አትዶሶና። 23 ጎዳይ ሙሰ ኪትዳይሳዳ እያሱይ ቢታ ኡባ ኦይክድ፥ እስራኤለ አሳ ኮቻን ኮቻን ሻክድ ላትስስ።

ሄሳፈ ጉየ ቢታይ ኦላፐ ሸምፕስ።