1 ካህነይ አላዛር፥ ናወ ናአይ እያሱይነ እስራኤለ ሶ አሳ ሀላቃት፥ ካናነ ቢታ ኤንታ ኮቻን ኮቻን ሻክን፥ እስራኤለ አሳ ጋክዳ ቢታይ ሀይሳፈ ካልድ ደኤይሳ። 2 ጎዳይ ሙሰ ኪትዳይሳዳ ላታ ቢታይ ኡዱፉናነ ባጋ ኮቻስ ሳማን ሻከትስ። 3 ሙሰይ ካሰ ናምአነ ባጋ ኮቻስ ዮርዳኖሰፐ ዶሎሀ ባጋን ደእያ ቢታ እምስ፥ ሽን ሌወ ኮቻስ ኤንታ ግዶን ላታ ቢታ እምቤና። 4 ዮሰፋ ናይት ምናሰይነ ኤፍሬመይ ናምኡ ኮቸ ግድዶሶና። ሌወ ኮቻስ ዱሳ ካታማታነ መሄ ሄምያ ቢታ እምስፐ አትሽን፥ ላታ ቢታ እምቤና። 5 ጎዳይ ሙሰ ኪትዳይሳዳ እስራኤለ አሳይ ቢታ ሻከትድ ኤክዶሶና።

6 እስ ጋላስ ይሁዳ አሳይ እያሱኮ ጋልጋላ ይዶሶና። ኤንታፈ እሶይ፥ ቀነዛ ኮቻይ፥ ዮፎና ናአይ ካለብ እያሱኮ፥ “ኑኒ ቃደስ-ባርነን ደእያ ዎደ ጎዳይ ናብያ ሙሰ ባጋራ ነባነ ታባ ኦድዳይሳ ኤራሳ። 7 ጎዳ አይለይ ሙሰይ ሀ ቢታ ዎቻና መላ ቃደስ-ባርነፈ ታና ኪትያ ዎደ ታዉ ላይꬅ ኦይታማ። ሄ ዎደ ታኒ አማንꬅያ ኦዳ ሙሰስ ኤሀስ። 8 ታራ ብዳ አሳት አሳ ዎዛና ያሻን ትልእስዶሶና፥ ሽን ታኒ ጎዳ፥ ፆሳ ፖሎ ካላስ። 9 ሄ ጋላስ ሙሰይ፥ ‘ኔን፥ ጎዳ፥ ፆሳ ፖሎ ካልዳ ግሾ፥ ነ ቶሆይ የꬍዳ ቢታይ ነዉነ ነ ኮቻስ መርና ላታ ቢታ ግዳና’ ግድ ታዉ ጫቅስ። 10 እያሱ፥ አነ ቆፓ፤ ጎዳይ ሄሳ ሙሰስ ኦድ ስምን ሀች ኦይታማነ እቻሹ ላይꬅ ግድስ። እስራኤለ አሳይ መላ ቢታን ስመረትያ ዎደ ኡባን ሀች ጋꬃናዉ ጎዳይ ታና ፓፃ ዎꬅስ። ሀእ ታዉ ላይꬅ ሆስፑን ታማነ እቻሻ ግድስ። 11 ታዉ ሄ ዎደ ደእያ ምኖተꬃይ ሀችካ ደኤስ። ኦለታናዉ፥ ከያናዉነ ገላናዉ ታዉ ሀእካ ዎልቅነ ፃላተꬅ ደኤስ። 12 ሄ ዎደ ጎዳይ ታዉ እማና ግድ ጫቅዳ ሄ ደረይ ዳርያ ቢታ ታዉ እማ። ሄ ቢታን አናቀት ደኤይሳነ ኤንታ ካታማት ግታነ ግምበትዳ ካታማ ግደይሳ ሄ ዎደ ነ ስአዳሳ። ግድኮካ ጎዳይ ግዳይሳዳ እ ታራ ግድኮ፥ ኤንታ ሄ ቢታፈ ታኒ ጎዳና” ያግስ።

13 እያሱይ ዮፎና ናአ ካለባ አንጅድ፥ ከብሮና እያዉ ላታ ኦꬅ እምስ። 14 እ ጎዳ፥ እስራኤለ ፆሳ ፖሎ ካልዳ ግሾ፥ ከብሮና ሀች ጋካናዉ ቀነዛ ኮቻ ዮፎና ናኣ ካለባ ኮቻስ ላታ ቢታ ግድስ። 15 ካሰ ከብሮና ሱንꬃይ ቅርያት-አርባ ጌተቴስ። አርብ፥ አናቀታ ግዶን ኤረትዳ ግታ አሰ።

ሄሳፈ ጉየ፥ ቢታይ ኦላፐ ሸምፕስ።