1 ይሁዳ ኮቻስ ኤንታ ኮቻን ኮቻን ሻከትዳ ቢታይ ኤዶመን ዛዋትድ፥ ዱገሀ ባጋን ደእያ ፂነ መላ ቢታ ዉርሰꬃ ጋኬስ። 2 ዱገሀ ባጋን ኤንታ ዛዋይ ማፅነ አባፈ ዱገሀ ባጋን ዉርሰꬃ ጋፃ ጋኬስ። 3 አክራብማ ፕኑዋ ካንꬅድ፥ ፂነፐ ብድ፥ ቃደስ-ባርነስ ዱገሀ ባጋ ጋኬስ። ቃስ ሄፅሮና ካንꬅድ፥ አዳረ ከይድ፥ ቃርቃኮ ስሜስ። 4 ሄሳፈ ቃስ አፅሞና ካንꬅድ፥ ግብፀ ሻፋ ጋክድ፥ መደትራነ አባን ዛዋቴስ። ዱገሀ ባጋን ደእያ ይሁዳ ዛዋይ ሄሳ።

5 ዶሎሀ ባጋ ዛዋይ ማፅነ አባ ብድ፥ ዮርዳኖሰ ሻፋ ዉርሰꬃ ጋኬስ። ፑደሀ ባጋ ዛዋይ ቃስ ዮርዳኖሰ ሻፋይ ገልያሱዋፕ ብድ፥ 6 ቤት-ሆግላ ከዬስ። ያፐ ቤት-አራባ ባጋራ ካንꬅድ፥ ሮቤላ ናኣ ቦሃና ቆፍሶ ሹቻን ዛዋቴስ። 7 ያፐ ዛዋይ አኮራ ዛንጋራፐ ዳብራ ከይድ፥ ዛንጋራፐ ዱገሀ ባጋን ደእያ አዱምማ ፕኑዋ ስንꬃ ባጋን አግድ ፑደሀ ባጋራ ጋልጋላ ስሜስ። ሄሳፈ ቃስ ኤንሸመሸ ፑልቱዋ ካንꬅድ፥ ኤንሮጌላን ዛዋቴስ። 8 ሄሳፈ ህኖማ ዛንጋራ ካንꬅድ፥ ያቡሰታ ካታማ ግድዳ የሩሳላመ ዱገሀ ባጋ ጋኬስ። ካልድ ዛዋይ ህኖመ ዛንጋራፐ ዉሎሀ ባጋን ደእያ ዙማ ሁጵያ ከይድ፥ ፑደሀ ባጋን ራፋይመ ዛንጋራ ጋኬስ። 9 ሄ ዙማ ሁጵያፐ ብድ፥ ናፍቶሀ ፑልቱዋ ካንꬅድ፥ ኤፍሮና ዙማ ቦላ ደእያ ካታማታኮ ከዬስ። ሄሳፈ ቃስ ባኣላ ዎይኮ ቅርያት-ይኣርማ ስሜስ። 10 ባላ ፑደሀ ባጋራ ዛዋይድ፥ ሳይረ ዙማኮ ዉሎሀ ባጋ ምርቀትድ፥ ይኣርመ ዎይኮ ክሳሎነ ደርያ ጋክድ፥ እያፐ ዱገ ቤት-ሳሜሳ ዎꬍድ፥ ትምና ፕኔስ። 11 ሄ ዛዋይ ኤቅሮና ፑደሀ ባጋራ ካንꬅድ፥ ሽክሮና ምርቀትድ፥ ባላ ዙማራ ብድ፥ ያብንኤላን ዛዋቴስ። ሄ ዛዋ ዉርሰꬃይ መደትራነ አባ ግድድ፥ 12 ዉሎሀ ባጋ ዛዋይ መደትራነ አባስ ጋፃ ግዴስ። ይሁዳ ኮቻይ ደእዳ ቢታ ዛዋይ ሀይሳ።

13 ጎዳይ ኪትዳይሳዳ፥ እያሱይ፥ ዮፎና ናኣ ካለባ ጋክያ ላታ ይሁዳ ቢታፈ ቅርያት-አርባ ጌተትያ ከብሮና እምስ። አርብ አናቀ አዋ። 14 ካለብ አናቀ ኮቻታ፥ ሰሳያ፥ አክማናነ ታልማያ ጌተትያ ሄꬓታ ከብሮናፐ ከስስ። 15 ሄሳፈ ደንድድ፥ ዳብራን ደእያ አሳ ኦላናዉ ብስ። ዳብራ ካታማይ ካሰ ቅርያት-ሰፈራ ጌተቴስ። 16 ካለብ፥ “ቅርያት-ሰፈራ ኦልድ፥ ኦይክያ አድያስ ታኒ፥ ታ ናእዉ አክሶ እማና” ያግስ። 17 ያትን፥ ካለባ እሻ ቃናዛ ናአይ፥ ጎቶንያል ሄ ካታማ ኦልድ ኦይክን፥ ካለብ ባ ናእዉ አክሶ እያዉ እምስ።

18 አክሳ ጎቶንያላ ገልያ ዎደ እ አዋይ እዉ ጋደ እማናዳ ዎሳና መላ ጎቶንያል እዮ ዞርስ። እያ ባቁሎ ቦላፈ ዎꬍን፥ ካለብ እዮ፥ “አይ ኮያይ?” ያግድ ኦይችስ።

19 እያ ዛራዳ፥ “ነ ካሰ ታዉ ዎይትዳ ቢታይ መላ ቢታ ግድያ ግሾ፥ ሃꬃ ፑልቶይ ደእያ ቢታ ታዉ ጉጃዳ እማርክ” ያጋሱ። ያትን፥ ካለብ ቆሞንነ ጋርሳን ደእያ ፑልቶ ሃꬃ እዉ እምስ።

20 ይሁዳ ኮቻት ባንታ ኮቻን ኮቻን ኤክዳ ላታይ ሀይሳፈ ካልድ ፃፈትዳይሳ። 21 ዱገሀ ባጋን ኤዶመ ጋፃን ደእያ ይሁዳ ካታማት፥ ቃብዱኤላ፥ ኤደራ፥ ያጉራ፥ 22 ቂና፥ ድሞና፥ አዳዳ፥ 23 ቃደሳ፥ ሀፆራ፥ ይትናና፥ 24 ዚፋ፥ ፀለማ፥ ባሎታ፥ 25 ሀፆር-ሀዳታ፥ ቅርዮት-ሄፅሮና ዎይኮ ሀፆራ፥ 26 አማማ፥ ሻማአ፥ ሞሎዳ፥ 27 ሀፃር-ጋዳ፥ ሄሽሞና፥ ቤት-ፓለፃ፥ 28 ሀፃር-ሹኣላ፥ በርሳበህ፥ ብዝዮታ፥ 29 ባኣላ፥ እዩማ፥ ኤፀማ፥ 30 ኤልቶላዳ፥ ከስላ፥ ሆርማ፥ 31 ፅቅላጋ፥ ማድማና፥ ሳንሳና፥ 32 ለባዎታ፥ ሽልሃማ፥ አይናነ እርሞና። ሀ ካታማት ባንታ ጉታታራ እስፈ ላታማነ ኡዱፉና።

33 ዉሎሀ ባጋን ዙማ ፃጶን ደእያ ካታማት፥ ኤሽታኦላ፥ ፆርአ፥ አሽና፥ 34 ዛኖሀ፥ ኤንጋንማ፥ ታፑሀ፥ ኤናማ፥ 35 ያርሙታ፥ አዱላማ፥ ሶኮ፥ አዜቃ፥ 36 ሻእራይማ፥ አድታይማ፥ ገደራነ ገደሮታይማ። ሀ ካታማት ባንታ ጉታታራ እስፈ ታማነ ኦይዳ።

37 ቃስ ሀራ ካታማት፥ ፅናና፥ ሀዳሻ፥ ምግዳል-ጋዳ፥ 38 ድልአና፥ ምፅጳ፥ ዮቅትኤላ፥ 39 ላክሶ፥ ቦፅቃታ፥ ኤግሎና፥ 40 ካቦና፥ ላህማሳ፥ ክትሊሻ፥ 41 ገደሮታ፥ ቤት-ዳጎና፥ ናእማናነ ማቀዳ። ሀ ካታማት ባንታ ጉታታራ እስፈ ታማነ ኡሱፑና።

42 ቃስ ልብና፥ ኤተራ፥ አሸና፥ 43 ይፍታሄ፥ አሽና፥ ነፅባ፥ 44 ቃእላ፥ አክዚባነ ማሬሳ። ሀ ካታማት ባንታ ጉታታራ እስፈ ኡዱፉና።

45 ሄሳዳካ፥ ኤቅሮና ካታማይ ባ ጉታራ ያን ደኤስ። 46 ኤቅሮናፐ ዉሎሀ ባጋን አሽዶዳ ካታማይነ እያ ጉታት ደኦሶና።

47 ቃስ አሽዶዳነ ጋዛ ካታማት ባንታ ጉታታራ ብድ፥ ግብፀ ሻፋ ዛዋነ መደትራነ አባ ላንቅያ ጋካናዉ ደኦሶና።

48 ደረይ ዳርያ ካታማት፥ ሳምራ፥ ያትራ፥ ሶኮ፥ 49 ዳነ፥ ቅርያት-ሰፈራ ዎይኮ ዳብራ፥ 50 አናባ፥ ኤሽታሞአ፥ አንማ፥ 51 ጎሸና፥ ሆሎናነ ግሎ። ሀ ካታማት ባንታ ጉታታራ እስፈ ታማነ እስኖ።

52 ቃስ አራባ፥ ዱማ፥ ኤሽአና፥ 53 ያንማ፥ ቤት-ታፑሀ፥ አፌቃ፥ 54 ሁምፃ፥ ከብሮና ዎይኮ ቅርያት-አርባነ ፅኦራ። ሀ ካታማት ባንታ ጉታታራ እስፈ ኡዱፉና።

55 ቃስ ማኦና፥ ቃርመሎሳ፥ ዚፋ፥ ዩፃ፥ 56 እዝራኤለ፥ ዮቅድኣማ፥ ዛኖሀ፥ 57 ቃይና፥ ግብአነ ትምና። ሀ ካታማት ባንታ ጉታታራ እስፈ ታማ።

58 ሄሳዳካ ሀልሁላ፥ ቤት-ፁራ፥ ጋዶራ፥ 59 ማእራታ፥ ቤት-አኖታነ ኤልትቆና። ሀ ካታማት ባንታ ጉታታራ እስፈ ኡሱፑና።

60 ቃስ ቅርያት-ባኣለ ዎይኮ ቅርያት-ይኣርማነ ራባ። ሀ ካታማት ባንታ ጉታታራ እስፈ ናምአ።

61 መላ ቢታን ቃስ ቤት-አራባ፥ ምድና፥ ሰካካ፥ 62 ንብሻና፥ ማፅነ ካታማነ ኤንጋደ። ሀ ካታማት ባንታ ጉታታራ እስፈ ኡሱፑና።

63 ግዶሽን፥ ይሁዳ አሳይ የሩሳላመን ደእያ ያቡሰታ ጎድድ ከሳናዉ ዳንዳእቦኮና። ሄሳ ግሾ፥ ያቡሰት ሀች ጋካናዉ የሩሳላመን ይሁዳ አሳራ እስፈ ደኦሶና።