1 ዮሰፋ ኮቻታ ጋክዳ ላታ ቢታይ ዱገሀ ባጋራ እያርኮ ማታን ደእያ ዮርዳኖሰን ዶሜስ። እያርኮ ፑልቱዋስ ዉሎሀ ባጋ ጋፃፐ ብድ፥ መላ ቢታ ካንꬅድ፥ ደረይ ዳርያ ቢታ ኤክድ፥ ቤተለ ጋኬስ። 2 ቤተለፐ ብድ፥ አርከት ደእያ አፃሮት-አዳረ ካንꬅድ፥ ሎዛ ጋኬስ። 3 ሄሳፈ ዉሎሀ ባጋን ደእያ ያፍሌፃታ ቢታ ዱገ ዎꬍድ፥ ጋርሳ ቤት-ሆሮና ጋክድ፥ ያፐ ገዘራ ካንꬅድ፥ መደትራነ አባን ዛዋቴስ።

4 ዮሰፋ ኮቻት፥ ምናሰነ ኤፍሬማ ኮቻት፥ ባንታና ጋክያ ቢታ ላትዶሶና።

5 ኤፍሬማ ኮቻ ኤንታ ኮቻን ኮቻን ጋክዳ ቢታይ ሀይሳ፤ ኤንታ ዛዋይ ዶሎሀ ባጋራ ደእያ አፃሮት-አዳረፐ ብድ፥ ቆሞ ባጋ ቤት-ሆሮና ከዬስ። 6 ያፐ ካንꬅድ መደትራነ አባን ዛዋቴስ። ቃስ ፑደሀ ባጋራ ደእያ ዛዋይ ምክማታታ። ያፐ ዶሎሀ ባጋራ ደእያ ታናት-ሴሎኮ ምርቀትድ፥ ያኖሀ ጋኬስ። 7 ያኖሃፐ ደንድድ፥ አፃሮተነ ናአራተ ዎꬍድ፥ እያርኮ ጋክድ፥ ዉርሰꬃይ ዮርዳኖሰ ሻፋን ኤቄስ። 8 ጋፃ ዛዋይ ታፑሀፐ ብድ፥ ዉሎሀ ባጋራ ደእያ ቃና ሻፋ ላንቅያ ኦይክድ፥ መደትራነ አባን ኤቄስ። ኤፍሬማ ኮቻይ ባንታ ኮቻን ኮቻን ላትዳ ቢታይ ሀይሳ። 9 ሄስ ምናሰ ኮቻ ላታ ግዶን ኤፍሬማ ኮቻስ እመትዳ ካታማታነ ኤንታ ጉታታ ኡባ ጉጄስ። 10 ግዶሽን፥ ኤፍሬማ ኮቻይ ገዘራን ደእያ ካናነታ ጎድድ ከስቦኮና። ሄሳ ግሾ፥ ካናነት ሀች ጋካናዉ ኤፍሬማ ኮቻ ግዶን ደኦሶና። ሽን ኤፍሬማ ኮቻስ አይለትድ ኦꬆሶና።