1 ቢታ ኦል ፆንድ ኦይክዳፐ ጉየ፥ እስራኤለ አሳ ኡባይ ሴሎን ሺቅድ፥ ጎዳ ጎይኖ ዱንካንያ ያን ኤስዶሶና። 2 ሽን እስራኤለ አሳፐ ላታ ቢታ ኤክቦና ላፑን ኮቻት አትዶሶና።

3 ሄሳ ግሾ፥ እያሱይ እስራኤለ አሳኮ፥ “ጎዳይ ህንተ አዋታ ፆሳይ ህንተዉ እምዳ ቢታ ላቶና አዉደ ጋካናዉ ጋምአኔ? 4 እስ እስ ኮቻፈ ሄꬑ ሄꬑ አሳታ ዶርተ። እስ እስ ኮቻይ ላታና ቢታ ኤንቲ ዩይድ፥ ፆሞስ በእድ፥ ማዝጋብድ ያና መላ ታ ኤንታ ኪታና። ኤንቲ ሄ ቢታባ ፃፍ ኤክድ፥ ስሚድ ታኮ ያና። 5 ሄ ቢታ ላፑን በሳን ሻካና። ይሁዳ ኮቻይ ዱገሀ ባጋን፥ ዮሰፋ ኮቻይ ፑደሀ ባጋን ደእያ ባንታ ቢታ ኦይክዳ መላ ዳና። 6 ሀ ላፑን በሳን ሻከታና ቢታ ቆንጭስ ፃፍድ ኤክ ዪተ። ጎዳ፥ ኑ ፆሳ ስንꬃን ኤንታዉ ሳማ የጋና። 7 ግዶሽን፥ ሌወ ኮቻት ካህነ ግድድ፥ ጎዳስ ኦꬅያ ግሾ፥ ህንተራ ላታ ቢታ ኤኮኮና። ጋዳ ኮቻይ፥ ሮቤላ ኮቻይነ፥ ምናሰ ኮቻፈ ባጋይ ዮርዳኖሰ ሻፋፐ ዶሎሀ ባጋን፥ ጎዳ አይለይ፥ ሙሰይ ኤንታዉ እምዳ ቢታ ኮይሮትድ ላትዶሶና” ያግስ።

8 ሄ አሳት ቢታ ፆሞስድ፥ ፃፋናዉ ባናፐ ስን፥ እያሱይ፥ “ብድ ቢታ ዩይድ ፆሞስድ ፃፍተ፤ ስሚድ ታኮ ዪተ። ታኒ ሀይሳን፥ ሴሎን፥ ጎዳ ስንꬃን ህንተዉ ሳማ የጋና” ያግድ ኪትስ። 9 አሳት ብድ፥ ቢታ ኡባ ዩይዶሶና። ካታማታ ኡባ ፃፍድ፥ ቢታ ዋት ላፑን በሳን ሻካነኮ ቆንጭስዶሶና። ያት ስሚድ፥ እያሱይ ዱንካንዳ ጉታ፥ ሴሎ ስምዶሶና። 10 እያሱይ ጎዳ ስንꬃን፥ ሴሎን ኤንታዉ ሳማ የግስ። አትዳ እስራኤለ ዘረꬃታ ጋክያ ላታ ቢታ ሻክድ እምስ።

11 ኮይሮ ሳማይ ብንያመ ኮቻ ኤንታ ኮቻን ኮቻን ጋክስ። ኤንታ ጋክዳ ቢታይ ይሁዳፐነ ዮሰፋ ኮቻፈ ግዶን ደኤስ። 12 ፑደሀ ባጋራ ኤንታ ዛዋይ ዮርዳኖሰፐ ደንድድ፥ እያርኮ ፑደ ከይድ፥ ዉሎሀ ባጋን ደእያ ደረይ ዳርያ ቢታ ካንꬅድ፥ ቤት-አዌና መላ ቢታን ኤቄስ። 13 ሄ ዛዋይ ዱገሀ ባጋራ ካሰ ሎዛ ጌተትድ ፄገትያ ቤተለ ካንꬅድ፥ ዱገሀ አፃሮት-አዳረ ዎꬍድ፥ ቤት-ሆሮናፐ ዱገሀ ባጋን ደእያ ዙማን ዛዋቴስ። 14 ሄ ዛዋይ ዱገሀ ባጋራ ቤት-ሆሮና ስንꬃን ደእያ ዙማፐ ዉሎሀ ባጋ ፃፀትድ፥ ይሁዳ ኮቻ ካታማ ግድዳ፥ ቅርያት-ባኣለ ዎይኮ ቅርያት-ይኣርማ አꬌስ። ሄስ ዉሎሀ ባጋራ ደእያ ዛዋ። 15 ዱገሀ ባጋ ዛዋይ ዉሎሀ ባጋራ ቅርያት-ይኣርመፐ ደንድድ፥ ናፍቶሀ ፑልቶታን ዛዋቴስ። 16 ሄሳፈ ሄ ዛዋይ ዱገ ብድ ራፋይመ ዛንጋራፐ ፑደሀ ባጋን ደእያ ሄኖማ ዛንጋራፐ ስንꬃ ባጋራ ዱገ ዎꬌስ። ያፐ ያቡሰታ ካታማፐ ዱገሀ ባጋን ደእያ ላንቅያ ኦይክድ፥ ህኖመ ዛንጋራ ዎꬍድ፥ ኤንሮጌላን ዛዋቴስ። 17 ያፐ ፑደሀ ባጋ ምርቀትድ ኤንሸመሸ ባጋራ አዱምማ ዙማ ስንꬃን ደእያ ገልሎታ ጋኬስ። ያፐ ቃስ ሮቤላ ናኣ ቦሃና ሹቻኮ ዱገ ዎꬌስ። 18 ቃስ ቤት-አራባ ፑደሀ ባጋ ላንቅያ ኦይክድ፥ ዱገ ዮርዳኖሰ ዛንጋራ ዎꬌስ። 19 ሄሳፈ ቤት-ሆግላ ፑደሀ ላንቅያ ካንꬅ ብድ፥ ዮርዳኖሰ ሻፋይ ጎግድ ገልያ ማፅነ አባፈ ፑደሀ ባጋ ጋፃ ጋኬስ። ሀይስ ዱገሀ ባጋ ዛዋ። 20 ዶሎሀ ባጋ ዛዋይ ዮርዳኖሰ ሻፋ። ብንያመ ኮቻት ላትዳ ቢታይ ኡባ ባጋራ ዛዋትዳ ዛዋይ ሀይሳ።

21 ብንያመ ኮቻይ ባንታ ኮቻን ኮቻ ላትዳ ካታማት፥ እያርኮ፥ ቤት-ሆግላ፥ ኤመቅ-ቃፅፃ፥ 22 ቤት-አራባ፥ ዛማራይመ፥ ቤተለ፥ 23 አዊመ፥ ፓራ፥ ኦፍራ፥ 24 ከፋር-አሞና፥ ኦፍናነ ግብአ። ኤንቲ ኩመꬅ ታማነ ናምኡ ካታማ። ኤንታ ዩሹዋን ደእያ ጉታትካ ኤንታ ቦላ ጉዠቶሶና። 25 ቃስ ጋባኦና፥ ራማ፥ በኤሮታ፥ 26 ምፅጳ፥ ከፍራ፥ ሞፃ፥ 27 ረቄማ፥ ይርጳኤላ፥ ታራላ፥ 28 ፀላአ፥ ኤለፋ፥ የሩሳላመ ጌተትያ ያቡሰታ ካታማ፥ ግብአነ ቅርያት-ይኣርማ። ኤንቲ ኩመꬅ ታማነ ኦይዱ ካታማ። ኤንታ ዩሹዋን ደእያ ጉታትካ ኤንታ ቦላ ጉዠቶሶና። ብንያመ ኮቻይ ባንታ ኮቻን ላትዳ ቢታይ ሀይሳ።