1 ናምአንꬆ ሳማይ ስሞና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ይሁዳ ኮቻት ላትዳ ቢታ ግዶን ደኤስ። 2 ኤንቲ ላትዳ ካታማት፥ በርሳበ ዎይኮ ሴባ፥ ሞላዳ፥ 3 ሀፃር-ሹኣላ፥ ባላ፥ ኤፀማ፥ 4 ኤልቶላዳ፥ ባቱላ፥ ሆርማ፥ 5 ፅቅላጋ፥ ቤት-ማርካቦታ፥ ሀፃር-ሱሳ፥ 6 ቤት-ላባኦታነ ሻሩሀ። ኤንቲ ኩመꬅ ታማነ ሄꬓ ካታማ። ኤንታ ዩሹዋን ደእያ ጉታት ኤንታ ቦላ ጉዠቶሶና። 7 ቃስ ሀራ በሳን አይና፥ እርሞና፥ ኤተራነ አሻና ጌተትያ ኦይዱ ካታማታነ ኤንታ ዩሹዋን ደእያ ጉታታ ኦይክዶሶና። 8 ስሞና ቢታይ ዱገሀ ባጋን ደእያ ባእላት-ባኤራ ዎይኮ ራማ ካታማታነ ኤንታ ዩሹዋን ደእያ ጉታታ ኡባ ጋኬስ። ስሞና ኮቻይ ባንታ ኮቻን ኮቻን ላትዳ ቢታይ ሀይሳ። 9 ይሁዳ ኮቻታ ጋክዳ ቢታይ ዳልጋ ግድዳ ግሾ፥ እያፐ ሻከትድ፥ ስሞና ኮቻታስ እመትስ።

10 ሄꬓንꬆ ሳማይ ዛብሎና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ሳርዳ ጋኬስ። 11 ያፐ ደንድድ ዛዋይ ዉሎሀ ባጋን ደእያ ማርአላ ካንꬅድ፥ ዳባሼታ ቦችሸ፥ ዮቅናማ ማታን ደእያ ሃꬃ ጋኬስ። 12 ሳርዳፐ ዶሎሀ ባጋ ምርቀትድ፥ ክስሎት-ታቦራ ካንꬅድ ዳብራታንነ ያፋን ዛዋቴስ። 13 ያፐ ዉሎሀ ባጋራ ካንꬅድ፥ ጋት-ሄፌራነ እት-ቃፅናና ጋክድ፥ እርሞናኮነ ነአኮ ምርቀቴስ። 14 ፑደሀ ባጋ ዛዋይ ሀናቶነ ዩይድ፥ ይፍታሄ ዛንጋራን ዛዋቴስ። 15 ሄ ዛዋይ ቃፃታ፥ ናህላላ፥ ሽምሮና፥ ይዳላነ ቤተለመ ጌተትያ ካታማታ ኦይኬስ። ኤንቲ ኩመꬅ ታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 16 ዛብሎና ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

17 ኦይዳንꬆ ሳማይ ይሳኮራ ኮቻ ኤንታ ኮቻን ኮቻን ጋክስ። 18 ኤንታ ዛዋይ እዝራኤለ፥ ካሱሎታ፥ ሱኔማ፥ 19 ሀፋራይማ፥ ሽኦና፥ አናሃራታ፥ 20 ራብታ፥ ቅሶና፥ አቤፃ፥ 21 ራመታ፥ ኤንጋንማ፥ ኤንሀዳነ ቤት-ጳፀፃ ኦይኬስ። 22 ሄ ቢታ ዛዋይ ታቦረ፥ ሻሀፁማነ ቤት-ሳሜሳ ቦችሸ ብድ፥ ዮርዳኖሰ ሻፋን ዛዋቴስ። ኤንቲ ኩመꬅ ታማነ ኡሱፑን ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 23 ይሳኮራ ኮቻይ ባንታ ኮቻን ኮቻን ላትዳ ቢታ ግዶን ደእያ ካታማትነ ኤንታ ዩሹዋን ደእያ ጉታት ሀይሳታ።

24 እቻሻንꬆ ሳማይ አሴራ ኮቻ ኤንታ ኮቻን ኮቻን ጋክስ። 25 ኤንታ ቢታ ዛዋይ፥ ሄልቃታ፥ ሀላ፥ በፀና፥ አዝፋ፥ 26 አላመለከ፥ አማዳነ ምሻላ ኤኬስ። ዉሎሀ ባጋራ ቃርመሎሳንነ ስሆር-ልብናታን ዛዋቴስ። 27 ቃስ ዶሎሀ ባጋራ ቤት-ዳጎናኮ ምርቀትድ፥ ዛብሎናነ ይፍታህኤላ ዛንጋራ ቦችሸ ብድ፥ ፑደሀ ባጋራ ቤት-ኤመቃነ ንኤላ ጋኬስ። ቃስ ፑደሀ ባጋራ ካቡላ፥ 28 ኤብሮና፥ ረሆባ፥ ሀሞናነ ቃና ካንꬅድ፥ ስዶናን ዛዋቴስ። 29 ሄ ዛዋይ ራማ ዩይድ፥ ግምበን ድረትዳ ፅሮሳ ካታማ ጋክድ፥ ሆሳኮ ምርቀትድ፥ መደትራነ አባን ዛዋቴስ። ቃስ ማሀላባ፥ አክዚባ፥ 30 ኡማ፥ አፌቃነ ረሆባ ጌተትያ ካታማታ ጋክድ ዛዋቴስ። ኤንቲ ኩመꬅ ላታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 31 አሴራ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

32 ኡሱፑንꬆ ሳማይ ንፍታለመ ኮቻ ኤንታ ኮቻን ኮቻን ጋክስ። 33 ኤንታ ዛዋይ ሄለፋፐነ ዛናንመ ዎላፐ ብድ፥ አዳም-ነቀባ፥ ያብንኤላነ ላቁማ ካንꬅድ፥ ዉርሰꬃይ ዮርዳኖሰ ሻፋን ኤቄስ። 34 ቃስ ሄ ዛዋይ ዉሎሀ ባጋራ አዝኖት-ታቦራኮ ምርቀትድ፥ ሁቆቃን ኤቄስ። ሄ ዛዋይ ዱገሀ ባጋን ዛብሎና፥ ዉሎሀ ባጋን አሴራ፥ ዶሎሀ ባጋን ዮርዳኖሰ ሻፋ ካንꬅድ ይሁዳን ጋኬስ። 35 ግምበን ድረትዳ ካታማት፥ ፅድማ፥ ፄራ፥ ሀማታ፥ ራቃታ፥ ከነሬታ አባ፥ 36 አዳማ፥ ራማ፥ ሀፆራ፥ 37 ቄደሻ፥ ኤድራአ፥ ኤንሀፆራ፥ 38 ይርኦና፥ ማግደላ፥ ሆረማ፥ ቤት-አናታነ ቤት-ሳሜሳ ካታማታ ኦይኬስ። ሄ ካታማት ኩመꬅ ታማነ ኡዱፉና፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 39 ንፍታለመ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

40 ላፑንꬃ ሳማይ ዳነ ኮቻ ኤንታ ኮቻን ኮቻን ጋክስ። 41 ኤንቲ ላትዳ ካታማት ፆርአ፥ ኤሽታኦላ፥ እርሸመሻ፥ 42 ሻአልብማ፥ ኤሎና፥ ይታላ፥ 43 ኤሎና፥ ትምና፥ ኤቅሮና፥ 44 ኤልታቃ፥ ግብቶና፥ ባላታ፥ 45 የሁዳ፥ በነባራቃ፥ ጋት-ርሞና፥ 46 ማያርቆና፥ ራቆናነ ዮጰ ካታማ ዩሹዋን ደእያ ሄራታ ኦይኬስ። 47 ዳነ ኮቻይ ኤንታ ላታ ቢታይ ኤንታፈ ኤከትን፥ ላሸማ ካታማ ብድ፥ ኦላን ፆንድ፥ ሄ ካታማን ደእያ አሳ ማሻን ዎꬍድ፥ ሄ ቢታ ባንታባ ኦꬅዶሶና። ሄ ካታማ ሱንꬃ ላምድ፥ ባንታ አዋ ዳነ ሱንꬃን ዳነ ግድ ሱንꬅዶሶና። 48 ዳነ ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

49 እስራኤለ አሳይ ቢታ ሻሁዋ ኦንግዳ ዎደ፥ ናወ ናኣ እያሱስ ላታ ቢታ እምዶሶና። 50 ጎዳይ ካሰ ኪትዳይሳዳ እያሱይ ደረይ ዳርያ ኤፍሬማን ደእያ ትምናት-ሳራ ካታማ እማና መላ ኦይችን፥ እያዉ እምዶሶና። ሄ ካታማ ዛር ጊግስድ፥ ያን ደእስ። 51 ካህነይ አላዛር፥ ናወ ናኣ እያሱይነ እስራኤለ ሶ አሳ ሀላቃት ሴሎን፥ ጎዳ ስንꬃን ፆሳ ዱንካንያ ፐንገን ሳማ የግድ፥ ሻክዳ ላታ ቢታይ ሀይሳ። ኤንቲ ቢታ ያት ሻክድ ኦንግዶሶና።