1 ሄሳፈ ጉየ ጎዳይ እያሱኮ ሀይሳዳ ያግስ፤ 2 “ታኒ ሙሰ ባጋራ ኪትዳይሳዳ፥ ‘አሳይ ባቃትድ አትያ ካታማታ ዱማያና መላ’ እስራኤለ አሳስ ኦዳ። 3 ኦንካ ቆፖናነ ኤሮና አሰ ዎꬍኮ፥ ያ ባቃትድ ጉክዳ ሱꬃ ግሾ ሱꬅ ዛራናዉ ኮያ ኡራፐ አታና። 4 አሰ ዎꬍዳይስ ሄ ካታማታፐ እሱዋኮ ባቃትድ ብድ፥ ካታማ ፐንገን ኤቅድ፥ ሀንዳባ ኡባ ሄ ካታማ ጭማታስ ኦዶ። ሄሳፈ ጉየ፥ ኤንቲ ባንታ ካታማ ኤፍድ፥ እ ዳና በሲ እምኮ ኤንታራ ያን ደኦ። 5 ሱꬃ ግሾ ሱꬅ ዛራናዉ ኮያ ኡራይ እያ ካልድ ዪኮ፥ እ ባ እሻ ኤርድ፥ ቆሀናዉ ኮይድ ዎꬍቦና ግሾ ሄ ካታማ ጭማት እያ አꬅድ እሞፎ። 6 ሻንጎ ስንꬃን ሺቅድ፥ ፕርደታና ጋካናዉነ ሄ ዎደ ደእያ ካህነ ሀላቃይ ሀይቃና ጋካናዉ ሄ ካታማን ደኦ። ሄሳፈ ጉየ፥ ባቃትድ ከይዳ ካታማ ጉየ ስሚድ ባ ሶ ገሎ” ያግስ።

7 ያትን እስራኤለ አሳይ ደረይ ዳርያ ንፍታለመን ጋልላን ደእያ ቃደሳ፥ ደረይ ዳርያ ኤፍሬማን ደእያ ሴከማነ ደረይ ዳርያ ይሁዳን ደእያ ቅርያት-አርባ ዎይኮ ከብሮና ዱማይዶሶና። 8 ዮርዳኖሰ ሻፋፐ ሄፍንꬃን፥ እያርኮፈ ዶሎሀ ባጋን ꬎቃን፥ መላ ቢታን፥ ሮቤላ፥ ኮቻታ ቢታን ደእያ ቦሶራ፥ ጋዳ ኮቻታ ቢታን፥ ጋላዳን ደእያ ራሞታነ ምናሰ ኮቻታ ቢታን፥ ባሳነን ደእያ ጎላና ዱማይዶሶና። 9 እስራኤለ አሳይነ ኤንታ ግዶን ደእያ በታንቾት ባቃትድ አታና መላ ዱማትዳ ካታማት ሀይሳታ። ኦንካ ኤሮና ደእሸ አሰ ዎꬍኮ፥ ሻንጎ ስንꬃን ፕርደቶና ደእሸ፥ ሀይቆና አታናዉ ሀ ካታማታፐ እሱዋኮ ባቃታናዉ ዳንዳኤስ።