1-2 ሄሳፈ ጉየ፥ እስራኤለ አሳይ ካናነ ቢታን፥ ሴሎን ዱንካንድ ደእሽን፥ ሌወ ሶ አሳ ሀላቃት ካህንያ አላዛራኮ፥ ናወ ናኣ እያሱኮነ እስራኤለ ሀላቃታኮ ይድ፥ “ኑኒ ዳና ካታማታነ መሄ ሄምያ ቢታ ኑስ እማና መላ፥ ጎዳይ ሙሰ ባጋራ ኪትስ” ያግዶሶና። 3 ሄሳ ግሾ፥ ጎዳይ ኪትዳይሳዳ፥ እስራኤለ አሳይ ሌወታስ ካታማታነ መሄ ሄምያ ቢታ ባንታ ቢታፈ ሻክድ፥ እምዶሶና።

4 ኮይሮ ሳማይ ቃሃታ ኮቻስ ከይስ። ካህንያ አሮና ኮቻይ፥ ይሁዳ፥ ስሞናነ ብንያመ ኮቻፈ ታማነ ሄꬑ ካታማታ ሳማን ኤክዶሶና። 5 አትዳ ቃሃታ ኮቻይ፥ ኤፍሬማ፥ ዳነነ ዉሎሀ ባጋን ደእያ ምናሰ ኮቻፈ ታሙ ካታማታ ሳማን ኤክዶሶና።

6 ገድሶና ኮቻይ፥ ይሳኮራ፥ አሴራ ንፍታለመነ ዶሎሀ ባጋን ደእያ ምናሰ ኮቻፈ ታማነ ሄꬑ ካታማታ ሳማን ኤክዶሶና።

7 መራራ ኮቻይ፥ ሮቤላ፥ ጋደነ ዛብሎና ኮቻፈ ታማነ ናምኡ ካታማታ ኤክዶሶና።

8 ጎዳይ ሙሰ ባጋራ ኪትዳይሳዳ፥ እስራኤለ አሳይ ሀ ካታማታነ መሄ ሄምያ ቢታ ሌወታስ ሳማን ሻክድ እምዶሶና።

9 እስራኤለ አሳይ ይሁዳነ ስሞና ኮቻፈ ካልድ ሱንꬃን ፄገትዳ ካታማታ እምዶሶና። 10 ኮይሮ ሳማይ ሌወ ኮቻፈ የለትዳ፥ ቃሃታ ኮቸ ግድዳ አሮና ያራስ ከይን፥ ኤንታዉ እመትዳ ካታማት ሀይሳታ፤ 11 ደረይ ዳርያ ይሁዳን ደእያ ቅርያት-አርባ ዎይኮ ከብሮነነ እያ ዩሹዋን ደእያ ሄንꬃ ቢታታ ኤንታዉ እምዶሶና። (አርብ አናቀ አዋ።) 12 ሽን ኮይሮ ሄ ካታማ ዩሹዋን ደእያ ቢታነ ጉታታ ዮፎና ናኣ ካለባስ ላታ ኦꬅድ እምዶሶና። 13 ካህንያ አሮና ያራስ አሰ ዎꬍዳ አስ ባቃትድ አትያ ከብሮነነ ሄንꬃ ቢታ፥ ልብናነ ሄንꬃ ቢታ፥ 14 ያትራነ ሄንꬃ ቢታ፥ ኤሽታሞአነ ሄንꬃ ቢታ፥ 15 ሆሎናነ ሄንꬃ ቢታ፥ ዳብራነ ሄንꬃ ቢታ፥ 16 አይናነ ሄንꬃ ቢታ፥ ዩፃነ ሄንꬃ ቢታ፥ ቤት-ሳሜሳነ ሄንꬃ ቢታ። ሀይሳቲ ይሁዳፐነ ስሞናፐ ኤከትዳ፥ ካታማት ኩመꬅ ኡዱፉና። 17 ብንያመ ኮቻፈ ኤከትዳ ኦይዱ ካታማት፥ ጋባኦናነ ሄንꬃ ቢታ፥ ግብአነ ሄንꬃ ቢታ፥ 18 አናቶተነ ሄንꬃ ቢታ፥ አልሞናነ ሄንꬃ ቢታ። 19 አሮና ኮቸ ግድዳ ካህነታስ እመትዳ ካታማትነ ሄንꬃ ቢታት ታማነ ሄꬓ።

20 ሌወ ኮቸ ግድዳ፥ አትዳ ቃሃታ ኮቻስ፥ ኤፍሬማስ እመትዳ ቢታፈ ሻከትድ እመትስ። 21 ቃስ ኤንታዉ ደረይ ዳርያ ኤፍሬማን፥ አሰ ዎꬍዳ አስ ባቃትድ አትያ ኦይዱ ካታማት ሴከማነ ሄንꬃ ቢታ፥ ገዘራነ ሄንꬃ ቢታ፥ 22 ቅብፃይማነ ሄንꬃ ቢታ፥ ቤት-ሆሮናነ ሄንꬃ ቢታ እምዶሶና። 23 ዳነ ኮቻፈ ሻከት እመትዳ ኦይዱ ካታማት፥ ኤልታቃነ ሄንꬃ ቢታ፥ ግበቶናነ ሄንꬃ ቢታ፥ 24 ኤሎናነ ሄንꬃ ቢታ፥ ጋት-ርሞናነ ሄንꬃ ቢታ። 25 ምናሰ ኮቻ ባጋፈ ሻከት እመትዳ ናምኡ ካታማት፥ ታናካነ ሄንꬃ ቢታ፥ ጋት-ርሞናነ ሄንꬃ ቢታ። 26 አትዳ ቃሃታ ኮቻት ሄንꬃ ቢታራ እስፈ ታሙ ካታማ ኤክዶሶና።

27 ሀራ ሌወ ኮቸ ግድዳ ገድሶና ኮቻስ እመትዳ ቢታይ፥ ምናሰ ኮቻ ባጋፈ አሰ ዎꬍዳ አስ ባቃትድ አትያ ናምኡ ካታማት፥ ባሳነን ደእያ ጎላናነ ሄንꬃ ቢታ፥ በኤሽትራነ ሄንꬃ ቢታ። 28 ይሳኮራ ኮቻፈ እመትዳ ኦይዱ ካታማት፥ ቅሶናነ ሄንꬃ ቢታ፥ ደብራታነ ሄንꬃ ቢታ። 29 ያርሙታነ ሄንꬃ ቢታ፥ ኤንጋንማነ ሄንꬃ ቢታ። 30 አሴራ ኮቻፈ ሻከት እመትዳ ኦይዱ ካታማት ምሻላነ ሄንꬃ ቢታ፥ አብዶናነ ሄንꬃ ቢታ፥ 31 ሄልቃተነ ሄንꬃ ቢታ፥ ረሆባነ ሄንꬃ ቢታ። 32 ንፍታለመ ኮቻፈ ሻከት እመትዳ ሄꬑ ካታማት፥ አሰ ዎꬍዳ አስ ባቃትድ አትያ፥ ጋልላን ደእያ ቃደሳነ ሄንꬃ ቢታ፥ ሀሞት-ዶራነ ሄንꬃ ቢታ፥ ቃርታናነ ሄንꬃ ቢታ። 33 ገድሶና ኮቻት ሄንꬃ ቢታራ እስፈ ታማነ ሄꬑ ካታማታ ኤክዶሶና።

34 ሌወ ኮቸ ግድዳ አትዳ መራራ ኮቻት፥ ዛብሎና ኮቻፈ ሻከት እመትዳ ኦይዱ ካታማት፥ ዮቅናማነ ሄንꬃ ቢታ፥ ቃርታናነ ሄንꬃ ቢታ፥ 35 ድምናነ ሄንꬃ ቢታ፥ ናህላላነ ሄንꬃ ቢታ ኤክዶሶና። 36 ሮቤላ፥ ኮቻፈ ሻከትድ እመትዳ ኦይዱ ካታማት፥ ቦሶራነ ሄንꬃ ቢታ፥ ያሃፃነ ሄንꬃ ቢታ፥ 37 ቅደሞታነ ሄንꬃ ቢታ፥ መፋታነ ሄንꬃ ቢታ። 38 ጋዳ ኮቻፈ ሻከትድ እመትዳ ኦይዱ ካታማት፥ ጋላዳን አሰ ዎꬍዳ አስ ባቃትድ አትያ፥ ራሞታነ ሄንꬃ ቢታ፥ ማህናይመ፥ 39 ሀሰቦና፥ ያእዜራ። 40 ሌወ ኮቸ ግድዳ አትዳ መራራ ኮቻይ ኤክዳ ካታማት ታማነ ናምአ።

41 እስራኤለ አሳይ ላትዳ ቢታፈ ሌወ ኮቻስ እመትዳ ካታማት ሄንꬃ ቢታራ እስፈ ኦይታማነ ሆስፑና። 42 ሄ ካታማታ ኡባ ዩሹዋን ሄንꬃ ቢታት ደኦሶና።

43 ጎዳይ ኤንታ አዋታስ እማና ግድ ጫቅዳ ቢታ ኡባ እስራኤለ አሳስ እምስ። ኤንቲ ሄ ቢታ ላትድ፥ ያን ደእዶሶና። 44 ጎዳይ ኤንታ አዋታስ ጫቅዳይሳዳ፥ ኤንታ ሳሮን ዎꬅስ። ኤንቲ ኦላስ ከይዳ ዎደ ኡባን ኤንታ ሞርከት ኤንታራ ኤቀታናዉ ዳንዳእቦኮና። 45 ጎዳይ እስራኤለ አሳስ እማና ግድ ጫቅዳ ሎኦባ ኡባ ፖልስፐ አትሽን፥ እሶይካ አትቤና።