5
ጎዳዉ፥ ኑና ኔኮ ዛራ
1 አቤት ጎዳዉ፥ ኑና ጋክዳባ ኡባ ቆፓ፤
ኑ ካዉሻተꬃ በአ!
2 ኑ ላታይ አላጋታስ፥
ኑ ኬꬃይካ እማꬃ አሳስ እመትስ።
3 ኑኒ አው ሀይቅዳ ናአ ግድዳ፤
ኑ አየትካ አምኦ ግድዶሶና።
4 ኑኒ ኡሻ ሃꬃ ሻምድ ኤኮስ፤
ኤꬅያ ምꬃስ ጋተ ቃንፆስ።
5 ኑና የደይሳት ኑ ግንድያ ጋርሳና፤
ኑ ዳቡርዳ ሽን ሸምፓናዉ ዳንዳእቦኮ።
6 ኑኒ ካꬅ ካላና ግድ፥
ግብፀታስነ አሶረታስ ኩሸ እምዳ።
7 ናጋራ ኦꬅዳይ ኑ ማይዛታ፥
ሽን ኤንቲ ሀእ ዶኮና፤
ኤንቲ ኤካናዉ በሲያ ሴራ ኤክዳይ ኑና።
8 ኑና አይለት ሃሮሶና፤
ኤንታ ኩሸፐ ኑና አሽያ ኦንካ ባዋ።
9 ማሻን ዎይሳት ባዞን ደእያ ግሾ፥
ኑ ሸምፑዋ ባይዝድ ካꬅ ደምዳ።
10 ኢታ ኮሻ ጋሶን፥
ኑ ጎጋይ ታማ ጮጨዳ ምቼስ።
11 ማጫሳታ ፅዮነን
ጌላኦታ ይሁዳ ካታማታን
ዎልቃን ኦይክድ ቱንስዶሶና።
12 ሀላቃታ ኤፍድ ካቅዶሶና፤
ጭማት ቦንቸትቦኮና።
13 ያላጋ አደት ዎፃን ጋጭዶሶና፤
አደ ናይት ዴፆ ምꬅ ቶክድ ጋንድጋርዶሶና።
14 ጭማት ካታማ ፐንገን ፕርዳናዉ ኡተይሳ አግዶሶና፤
ያላጋ አደት ናይት የꬅ ዶግዶሶና።
15 ኑ ዎዛናፐ ኡፋይስ ክችስ፤
ኑ ዱርሳይ ዬሆን ላመትስ።
16 ኑ ሁጵያፐ ካላቻይ ኩንድስ፤
ኑ ናጋራ ኦꬅዳ ግሾ ኑና አየ!
17 ሄሳ ግሾ፥ ኑ ዎዛናይ ዳቡርስ፤
ኑ አይፈይ ተልጁምስ።
18 ፅዮነ ደረይ ባይሳ ግድዳ ግሾ፥
ዎርካናት ያን ጉፖሶና።
19 አቤት ጎዳዉ፥ ነ መርናዉ ሃራሳ፤
ነ አራታይ የለታፐ የለታ ጋካናሳ።
20 ኔኒ ኑና አይስ ኡባ ዎደ ዶጋይ?
ሀይሳ መላ አዱሳ ዎደ ኑና አይስ አጋይ?
21 አቤት ጎዳዉ፥ ኑና ኔኮ ዛራ፤ ኑ ስማና፤
ኑ ዎድያ በንይሳꬆ ዛራዳ ኦራꬃ።
22 ኔኒ ኑና ፖሎ አጋድዬ?
ነ ሀንቁዋስ ዛው ባወዬ?