1 ጎዳይ ሙሰስ ሀይሳዳ ያግድ ኦድስ፤ 2 አሮናነ እያ አደ ናይታ፥ ኤንታራ እስፈ ካህነተꬃ ማኡዋ፥ ትዮ ዛይትያ፥ ናጋራ ያርሹዋ ሹከትያ ኮርማ፥ ናምኡ ማራዘታነ፥ እርሾይ ገልቦና ኡከትዳ ኡይꬃ ዎꬅያ ጋይታ ኤካዳ ያ። 3 ቃስ እስራኤለ አሳ ኡባ ፄጋዳ ዱንካንያ ፐንገ ሺሻ።

4 ሙሰይ ጎዳይ ኪትዳይሳዳ ኦꬅስ፤ አሳ ኡባይ ዱንካንያ ፐንገ ሺቅስ። 5 ሙሰይ አሳኮ፥ ታ ኦꬃና መላ ጎዳይ ኪትዳይስ ሀይሳ።

6 ሙሰይ አሮናነ እያ አደ ናይታ ኤህድ ሃꬃን ሜጭስ። 7 አሮና ማኡዋ ማይዝድ፥ ዳንጮ ዳንጭስስ፤ አዱሳ ማኡዋ ማይዝድ እያ ቦላ ኤፉደ ማኡዋ ማይዝስ። ኤፉድያ አሌቅስድ ዳድዳ ሳቅያን አሮና ፄሳራ ጋꬅድ ቃችስ። 8 ኤፉድያ ቦላ ትራ ኪሰ ስክድ እያን ኡሪመነ ቱሚመ ዎꬅስ። 9 አሮና ሁጰን ፃꬃ ቃጨ ዎꬅስ። ጎዳይ ሙሰ ኪትዳይሳዳ ፃꬃ ቃጭያ ስንꬃ ባጋራ ጌሻ ዎርቃ ጉቸ ምስልያ ዎꬅስ።

10 ሄሳፈ ጉየ ሙሰይ ትዮ ዛይትያ ኤክድ፥ ዱንካንያነ ዱንካንያ ግዶን ደእያ ሚሸ ኡባ ትይድ ዱማይስ። 11 ሄ ዛይትያፐ ኤክድ ያርሾ በሳ ቦላ ላፑን ቶሆ ዉርፅስ፤ እያ ሚሸታ፥ ሜቻ ከርያነ እያ ኡቱዋ ዱማያናዉ ሄ ዛይትያራ ትይስ። 12 ሄ ትዮ ዛይትያፐ ጉꬃራ ኤክድ አሮና ሁጰን ትግድ እያ ዱማይስ። 13 ጎዳይ ሙሰ ኪትዳይሳዳ ሙሰይ አሮና አደ ናይታ ስን አꬅድ ማኦ ማይዝድ ዳንጮ ዳንጭስስ። ኤንታ ሁጰን ፃꬃ ቃጨ ዎꬅስ።

14 ሙሰይ ናጋራ ያርሾስ ያርሸትያ ኮርማ ኤህስ፤ አሮንነ እያ አደ ናይት ሄ ኮርማ ሁጰን ባንታ ኩሽያ ዎꬅዶሶና። 15 ሙሰይ ሄ ኮርማ ሹክድ እያ ሱꬃን ባ ብራꬍያ የድ ኤክድ፥ ያርሾ በሳን ደእያ ካጨታ ትይድ ያርሾ በሳ ጌሽስ። አትዳ ሱꬃ ያርሾ በሳፈ ጋርሳን ጉስስ፤ ሄሳዳ ኦꬅድ ያርሾ በሳ ፆሳስ ዱማይድ ጌሽስ። 16 ሙሰይ ኡሎ አሹዋ ካምዳ ሞꬉዋ ኡባ፥ ትርያ ፄራ ባጋ፥ ክላሆታነ ኤንታ ካምዳ ሞꬉዋ ኤክድ፥ ያርሾ በሳን ፁግስ። 17 ሽን ጎዳይ ሙሰ ኪትዳይሳዳ ኮርማ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁግስ።

18 ሄሳፈ ጉየ ሙሰይ ፁሳ ያርሾስ ማራዘ ኤህስ፤ አሮንነ እያ አደ ናይት ሄ ማራዝያ ሁጰን ባንታ ኩሽያ ዎꬅዶሶና። 19 ሙሰይ ሄ ማራዝያ ሹክስ፤ እያ ሱꬃ ያርሾ በሳ ኦይዱ ማዛነታ ቦላ ዉርፅስ። 20 ሙሰይ ማራዝያ አሹዋ ቆሞን ቆሞን ቃንፀረꬅስ፤ ሁጵያ፥ አትዳ አሹዋነ ሞꬉዋ ፁግስ። 21 ጎዳይ ሙሰ ኪትዳይሳዳ ኡሎ አሹዋነ ገዳታ ሜጭድ፥ ኩመꬃ ዶርሳ ጎዳስ ሳዎ ቶንኩ ግያ ፁሳ ያርሾ ኦꬅድ ያርሾ በሳን ፁግስ።

22 ካህነት ሹመትያ ዎደ ሺቅያ ናምአንꬆ ዶርሳ ሙሰይ ኤህስ፤ አሮንነ እያ አደ ናይት ሄ ዶርሳ ሁጰን ባንታ ኩሽያ ዎꬅዶሶና። 23 ሙሰይ ሄ ማራዝያ ሹክስ፤ እያ ሱꬃፈ ኤክድ፥ አሮናስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ፥ ኡሻቻ ቶሁዋ ዎጋ ብራꬍያ ትይስ። 24 ቃስ ሙሰይ አሮና አደ ናይታ ስን አꬅድ፥ ሄ ሱꬃፈ ኤክድ፥ ኤንታ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትይስ። ያትድ፥ ሙሰይ አትዳ ሱꬃ ያርሾ በሳ ኦይዱ ማዛነታ ቦላ ዉርፅስ።

25 ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ትርያ ፄራ ባጋ፥ ክላሆታነ ኤንታ ካምዳ ሞꬉዋነ ኡሻቻ ገዳ ኤክስ። 26 ጎዳ ስንꬃን ደእያ ጋይታፐ እርሾይ ባይና ኡከትዳ እስ ኡይꬃ፥ ኡከትድ ዛይተን ትየትዳ እስ ኡይꬃነ ሌኦን ኡከትዳ ኡይꬃ ኤክድ ሞꬉዋ ቦላነ ኡሻቻ ገዳ ቦላ ዎꬅስ። 27 እ ሄ ካꬃ ኡባ አሮና ኩሸንነ እያ አደ ናይታ ኩሸን ዎꬅን፥ ጎዳ ስንꬃን ዩሾ ያርሾ ኦꬅድ ያርሽዶሶና። 28 ሙሰይ ሄ ካꬃ ኤንታ ኩሸፐ ኤክድ፥ ፁሳ ያርሹዋራ ጋꬅድ፥ ካህነታ ሹምያ ዎደ ጎዳስ ሳዎ ቶንኩ ግያ ያርሾ ኦꬅድ ያርሾ በሳን ፁግስ። 29 ቃስ ሙሰይ አንጋሱዋ ኤክድ፥ ዩሾ ያርሾ ኦꬅድ ጎዳ ስንꬃን ያርሽስ። ጎዳይ ሙሰ ኪትዳይሳዳ፥ ካህነታ ሹምያ ዎደ ያርሸትያ ማራዝያ አሹዋፐ ሄስ ሙሰ ጋክያ ግሾ።

30 ሙሰይ ትዮ ዛይትያፐነ ያርሾ በሳን ደእያ ሱꬃፈ ኤክድ፥ አሮና ቦላነ እያ ማኡዋ ቦላ፥ እያ አደ ናይታ ቦላነ፥ ኤንታ ማኡዋ ቦላ ዉርፅስ፤ አሮናነ እያ ማኡዋ፥ እያ ናይታነ ኤንታ ማኡዋ ዱማይስ።

31 ሙሰይ አሮናነ እያ አደ ናይታኮ ሀይሳዳ ያግስ፤ አሹዋ ዱንካንያ ፐንገን ካꬅተ፤ አሮንነ እያ አደ ናይት ታ ኪትዳይሳዳ ጋይታን ደእያ ጌሻ ኡይꬃራ ሚተ። 32 ሄ አሹዋፐነ ኡይꬃፈ ፓላህዳይ ደእኮ ታማን ፁግተ። 33 ካህነታ ሹምያ ዎጋይ ላፑን ጋላስ ኤክያ ግሾ ሄ ዎጋይ ፖለትያ ላፑን ጋላሳይ ዉራና ጋካናዉ ዱንካንያ ፐንገፈ ካረ ከዮፕተ። 34 ጎዳይ ኪትን ሀች ፖለትዳ ዎጋይ ህንተ ናጋራ ቁቻናሳ። 35 ዱንካንያ ፐንገን ላፑን ጋላስ ኩመꬅ ጋላስነ ቃማ ጋምእተ፤ ጎዳ ዎጋ ናግተ፤ እፅኮ ህንተ ሀይቃና። ታና ጎዳይ ኪትዳይ ሀይሳ። 36 አሮንነ እያ አደ ናይት ጎዳይ ሙሰ ባጋራ ኪትዳባ ኡባ ኦꬅዶሶና።