1 ሆስፑንꬃ ጋላስ ሙሰይ አሮና፥ እያ አደ ናይታነ እስራኤለ ጭማታ ፄግስ። 2 አሮናኮ ሀይሳዳ ያግስ፤ ቦረይ ባይና እስ ኮርማ ናጋራ ያርሾስ፥ ቃስ እስ ማራዘ ፁሳ ያርሾስ ጎዳ ስን ሺሻ። 3 ቦረይ ባይና እስ ኮለ ናጋራ ያርሾስ፥ እስ ላይꬅ ኩምዳ ማርነ ዶርሳ ኡርገ ፁሳ ያርሾስ ባንታዉ ኤሀና መላ እስራኤለ አሳስ ኦዳ። 4 ቃስ እስፈተꬃ ያርሾስ እስ ኮርማ፥ እስ ማራዘነ ካꬃ ያርሾስ ዛይተራ ሙኑቀትዳ ꬊለ ኤሀና መላ ኤንታዉ ኦዳ። ሀች ጎዳይ ህንተዉ ቆንጫና ግሾ ሄሳ ኦꬅተ።

5 ኤንቲ ሙሰይ ኪትዳባ ኡባ ጌሻ ዱንካንያ ስን ኤህዶሶና፤ ማባራ ኡባይ ሺቅድ ጎዳ ስንꬃን ኤቅዶሶና። 6 ሙሰይ ኤንታኮ፥ ጎዳ ቦንቾይ ህንተዉ ቆንጫና መላ ህንተ ኦꬃና መላ ጎዳይ ኪትዳይ ሀይሳ።

7 ሙሰይ አሮናኮ ሀይሳዳ ያግስ፤ “ያርሾ በሳኮ ሺቃዳ ነ ናጋራ ግሾ ናጋራ ያርሾነ ፁሳ ያርሾ ያርሻ። ጎዳይ ኪትዳይሳዳ አሳ ናጋራ አቶተꬃስ ያርሾ ያርሻ።”

8 አሮን ያርሾ በሳኮ ይድ፥ ባ ናጋራ ግሾ ያርሸትያ ማራ ሹክስ። 9 አሮና ናይት ሱꬃ ኤክድ እያዉ ኤህዶሶና፤ እ፥ ባ ብራꬍያ ሄ ሱꬃን የድ ኤክድ፥ ያርሾ በሳን ደእያ ካጨታ ትይስ፤ አትዳ ሱꬃ ያርሾ በሳፈ ጋርሳን ጉስስ። 10 ጎዳይ ሙሰ ኪትዳይሳዳ፥ አሹዋፐ ሞꬉዋ፥ ክላሆታነ ትርያ ፄራ ባጋ ኤክድ ያርሾ በሳን ፁግስ። 11 ሽን አትዳ አሹዋነ ጋልባ ጉታፐ ካረ ከስድ ፁግስ።

12 አሮን ፁሳ ያርሾስ ሺቅዳ መህያ ሹክስ፤ እያ ናይት ሱꬃ ኤክድ እያዉ ኤህዶሶና። እ ያርሾ በሳ ኦይዱ ማዛነታ ቦላ ዉርፅስ። 13 ኤንቲ አሹዋ ቆሞን ቆሞን ከስድ፥ ሁጵያራ ዎላ እያዉ ኤህዶሶና፤ እ ኤክድ ያርሾ በሳን ፁግስ። 14 ኡሎ አሹዋነ ገዳታ ሃꬃን ሜጭድ፥ ያርሾ በሳን ደእያ ፁሳ ያርሹዋ ቦላ ዎꬅድ ፁግስ።

15 ሄሳፈ ጉየ፥ አሮን አሳ ግሾ ያርሾ ያርሽስ። እ አሳ ናጋራ ግሾ ያርሸትያ ኮልያ ኤክድ ሹክስ፤ እ ካሰ ባ ናጋራ ያርሽዳይሳዳ ኤንታ ናጋራ ግሾ ያርሽስ። 16 ዎጋይ ኪተይሳዳ ፁሳ ያርሾስ ሺቅያ መህያ ኤህድ ያርሽስ። 17 ካꬃ ያርሹዋ ኤህድ፥ እያፐ እስ ኩጫ ኤክድ፥ ዎንታ ዎንታ ፁሳ ያርሹዋ ቦላ ጉጅድ ያርሾ በሳን ፁግስ።

18 አሮን ኮርማነ ማራዝያ አሳስ እስፈተꬃ ያርሾ ኦꬅድ ሹክስ፤ እያ አደ ናይት ሱꬃ እያዉ ኤህዶሶና፤ እ ሄ ሱꬃ ኤክድ ያርሾ በሳ ኦይዱ ማዛነታ ቦላ ዉርፅስ። 19 ኮርማነ ማራዝያ አሹዋፐ ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬉዋ፥ ክላሆታነ ትርያ ፄራ ባጋ ኤክድ፥ 20 ኤንቲ አንጋይሱዋ ቦላ ዎꬅን፥ አሮን ያርሾ በሳን ፁግስ። 21 ጎዳይ ሙሰ ኪትዳይሳዳ፥ አሮን አንጋይሱዋነ ኡሻቻ ገዳ ዩሾ ያርሾ ኦꬅድ ጎዳ ስንꬃን ዩሽስ።

22 ሄሳፈ ጉየ፥ አሮን ባ ኩሽያ አሳኮ ደንꬅድ ኤንታ አንጅስ። እ ናጋራ ያርሹዋ፥ ፁሳ ያርሹዋነ እስፈተꬃ ያርሹዋ ያርሽዳፐ ጉየ ያርሾ በሳፈ ዎꬍስ። 23 ሙሰይነ አሮን ጌሻ ዱንካንያ ግዶ ገልዶሶና፤ ኤንቲ ያፐ ከይድ አሳ አንጅዶሶና። ሄ ዎደ ጎዳ ቦንቾይ አሳ ኡባስ ቆንጭስ። 24 ጎዳ ማታፐ ታም ዎꬍድ፥ ያርሾ በሳን ደእያ ፁሳ ያርሹዋነ ሞꬉዋ ምስ። አሳ ኡባይ ሄሳ በእዳ ዎደ እልልዶሶና፤ ጉፋንድ ቦንችዶሶና።