1 አሮና አደ ናይት፥ ናዳብነ አብዮድ፥ ባንታ እፃነ ጩይስያ ሚሸ ኤክድ እያ ቦላ ታማ ዎꬅዶሶና፤ እያ ቦላ እፃነ ጉጅዶሶና። ጎዳይ ኤንታ ኪትቦና ጮ ታማ ጎዳ ስንꬃን ሺሽዶሶና። 2 ሄሳ ጋሶን ጎዳ ማታፐ ታም ይድ ኤንታ ምን፥ ኤንቲ ጎዳ ስንꬃን ሀይቅዶሶና። 3 ሙሰይ አሮናኮ፥ ጎዳይ፥

አሮን ዛሮ እሞና ስእ ግስ።

4 ሙሰይ አሮና አዋ እሻ ኡዝኤላ አደ ናይታ ምሳኤላነ ኤልዛፋና ፄግድ፥ “ሃ ይድ ህንተ አዋ እሻ ናይታ አሀ ጌሻ ዱንካንያ ስንꬃፈ ደንꬅድ፥ ጉታፐ ጋፃ ከስተ” ያግስ። 5 ኤንቲ ይድ፥ ሙሰይ ኪትዳይሳዳ ኤንታ ካህነተꬃ ማኡዋራ ኤንታ አሀ ቶክድ፥ ጉታፐ ጋፃ ከስዶሶና።

6 ሙሰይ አሮናነ እያ አደ ናይታ፥ አላዛራነ እታማራ ሀይሳዳ ያግስ፤ “ህንተ ሀይቆና መላነ ጎዳይ ባ አሳ ቦላ ሀንቀቶና መላ ህንተ ሁጵያ ሜዶፕተ፤ ህንተ ማኡዋካ ዳኮፍተ። ሽን ህንተ እሻት፥ እስራኤለ አሳይ፥ ጎዳይ ባ ታማን ዎꬍዳይሳታስ ዬኮ። 7 ጎዳ ትዮ ዛይተይ ህንተ ቦላ ድእያ ግሾ ዱንካንያ ፐንገፈ ካረ ከዮፕተ፤ ከይኮ ህንተ ሀይቃና” ያግስ። ኤንቲ ሙሰይ ግዳይሳዳ ኦꬅዶሶና።

8 ጎዳይ አሮናኮ ሀይሳዳ ያግስ፤ 9 ህንተ ሀይቆና መላ ዱንካንያ ግዶ ገልያ ዎደ ነነ ነ ናይት ዎይነ ኡሽ ዎይኮ ሀራ ማꬆይያ ኡሽ ኡዮፕተ፤ ሄስ ስንꬃፈ ያና የለተꬃስ መርናዉ ኤቅድ ደእያ ዎጋ ግዳና። 10 ህንተ ጌሻባነ ጌሽ ግዶናባ ቃስ ቱናባነ ቱና ግዶናባ ሻክድ ኤርተ። 11 ጎዳይ ሙሰ ባጋራ ኦድዳ ዎጋ ኡባ እስራኤለ አሳ ታማርስተ።

12 ሙሰይ አሮናነ አትዳ እያ አደ ናይታ አላዛራነ እታማራ ሀይሳዳ ያግስ፤ ጎዳስ ፁሳ ያርሹዋፈ አትዳ ካꬃ ያርሹዋ ኤክድ እርሾ የጎና ኡክተ። እ ኡባፈ ጌሽ ግድያ ግሾ ያርሾ በሳ ማታን ሚተ። 13 ጎዳስ ፁሳ ያርሹዋፈ ሄስ ነናነ ነ አደ ናይታ ጋክያ ግሾ ግድያ ግሾ፥ ሄሳ ህንተ ጌሻ በሳን ሚተ፤ ሀይሳ ህንተ ኦꬃና መላ ጎዳይ ታና ኪትስ። 14 ሽን ዩሾ ያርሾስ ሺቅዳ አንጋሱዋነ ገዳ ኔኒ፥ ነ አደ ናይትነ ነ ማጫ ናይት ጌሻ በሳን ሚተ። ሄስ እስራኤለ አሳይ ሺሽያ እስፈተꬃ ያርሹዋፈ ነናነ ነ አደ ናይታ ጋክያ ህንተ ግሾ። 15 ጎዳስ ያርሽዳ ገዳነ ዩሾ ያርሾስ ሺቅዳ አንጋሱዋ ሞꬉዋራ እስፈ ጋꬅድ ጎዳ ስንꬃን ዩሾ ያርሾ ኦꬅድ ያርሻናዉ ሺቆ። ጎዳይ ኪትዳይሳዳ፥ ሄስ ነዉነ ነ አደ ናይታስ መርናዉ ህንተና ጋክያ ግሾ ግዳና።

16 ሙሰይ ናጋራ ያርሾስ ሺቅዳ ዴሻ ኤንቲ ዋትዳኮ ኤራናዉ ኮይድ ኦይችስ፤ እ ፁገትዳይሳ ኤርዳ ዎደ አትዳ አሮና አደ ናይታ፥ አላዛራነ እታማራ ቦላ ሀንቀትስ። 17 “ናጋራ ያርሾስ ሺቅዳ አሹዋ አይስ ጌሻ በሳን ምቤከቲ? እ ኡባፈ ጌሽ። ጎዳ ስንꬃን አሳ ናጋራ ድግድ አሳስ አቶተꬅ እማና መላ ሄስ ህንተዉ እመትስ። 18 ሄ መህያ ሱꬃይ ጌሻ ዱንካንያ ግዶ ገልቦና ግሾ፥ ታኒ ህንተና ኪትዳይሳዳ፥ ህንተ እያ ጌሻ በሳን ማናዉ በሴስ፥ ሽን አግደታ” ያግስ።

19 አሮን ሙሰኮ፥ “ሄኮ፥ ሀ አሳት ሀች ባንታ ናጋራ ያርሹዋነ ፁሳ ያርሹዋ ጎዳ ስን ኤህዶሶና። ግዶሽን፥ ሄሳ መላባይ ታ ቦላ ጋክስ። ታኒ ናጋራ ያርሹዋ ሀች ምዳባ ግድያኮ፥ ጎዳይ ኡፋይታናሽን አትዴ?” ያግስ። 20 ሙሰይ ሄሳ ስእዳ ዎደ እያ ዛሩዋን ኡፋይትስ።