1 ጎዳይ ሙሰኮነ አሮናኮ፥ 2 እስራኤለ አሳስ ሀይሳዳ ያግድ ኦድተ፤ “ቢታ ቦላ ደእያ መሄታፐነ ዶአታፐ ህንተ ማናይሳት ሀይሳታ፤ 3 ሹቁለይ ጳልቀትዳይሳታነ ዋሞትያ መሄታ ሚተ። 4 ሽን ዋሞትሸ ሹቁለይ ጳልቀቶናይሳታነ ሹቁለይ ጳልቀꬅ ግድድ ዋሞቶናይሳታ ሞፕተ። ግማለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ። 5 ጉፓለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ። 6 ኤሸይ ዋሞቴስ፥ ሽን ሹቁለይ ጳልቀꬅ ግዶና ግሾ፥ ህንተዉ ቱና ግዶ። 7 ጉዱንꬆ ሞፕተ፤ እያዉ ሹቁለይ ጳልቀꬅ፥ ሽን ዋሞቶና ግሾ፥ እ ህንተዉ ቱና። 8 ህንተ ሄሳታ ሞፕተ፤ ኤንታ ባዉታ ቦቾፍተ፤ ኤንቲ ህንተዉ ቱና።

9 “ሃꬃ ግዶን ደእያ መተꬃ ኡባፈ ህንተ ማናይሳት ሀይሳታ፤ አባ ግዶን ዎይኮ ሻፋ ሃꬃ ግዶን ደእያ ኡባፈ ቀፈይነ ፖቆይ ደእያ ኡባ ሚተ። 10 ሽን አባ ግዶን ዎይኮ ጎግያ ሃꬃን ደእያ ቀፈይነ ፖቆይ ባይና መተꬃት ህንተዉ ቱና ግድያ ግሾ ሞፕተ። 11 ሀይሳቲ ህንተዉ ቱና፤ ኤንታ ሞፕተ፤ ኤንታ ባዉታ ቦቾፍተ። 12 ቀፈይነ ፖቆይ ባይና ሃꬃ ግዶን ደእያ መተꬃት ኡባይ ህንተዉ ቱና።

13 “ካፎታፐ ህንተዉ ቱና ግድዳይሳትነ ህንተ ማናዉ በሶናይሳት ሀይሳታ፤ አርጋንꬅ፥ አንኮ፥ ሞሎ ካፎ፥ 14 ፅሎ፥ ጵርጮ ቆሞ ኡባ፥ 15 ቁሮ ኡባ 16 ያንቾ፥ ሶሎ፥ ቆለ፥ ጉቶ ኡባ፥ 17 ጉꬃ ጉቶ፥ ሀዛዞ፥ ዲድን፥ 18 ሃꬃ ኩቶ፥ ሽአ አንኮ፥ ዳረ አንኮ፥ 19 ስላጎ፥ ሳብሳነ እያ ቆሞ ኡባ፥ አያና ካፎነ ሽርሽቆ።

20 “ቀፈራ ደእያ ኦይዱ ቶሆን ሄመትያ ላፋ መተꬃት ኡባይ ህንተዉ ቱና። 21 ግዶሽን፥ ቀፈይ ደእያ ኦይዱ ቶሆን ሄመተይሳታፐ ኤንታ ቶሁዋፐ ቦላራ ጉፓናዉ ማድያ ቶሆይ ደኤይሳታ ሚተ። 22 ሄሳትካ፥ ቦለ ቆሞ ኡባ፥ ፃቆ ኡባነ ሰረ ኡባ። 23 ሽን ሀራ ቀፈራ ደእያ ኦይዱ ቶሆይ ደእያ መተꬃት ኡባይ ህንተዉ ቱና።

24 “ሀይሳቲ ህንተና ቱንሳና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዳና። 25 ኤንታ ባዉታ ደንꬅያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና ግዶ። 26 ሹቁለይ ደእሸ ጳልቀꬅ ግዶናይሳት ዎይኮ ዋሞቶናይሳት ኡባይ ህንተዉ ቱና፤ ኤንታ ቦችያ ኦንካ ቱኔስ። 27 ኦይዱ ቶሆታን ሄመትያ ዶአ ኡባፈ ግንደራ ሄመተይሳት ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱኔስ። 28 ኤንታ ባዉታ ደንꬅያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና። ኤንትካ ህንተዉ ቱና።

29 “ሳአራ ሄመተይሳታፐ ሀይሳቲ ህንተዉ ቱና። ኤንትካ ግሮ፥ ኤጨረ፥ ዱማ ዱማ ኮቸ፥ 30 ጌገ፥ ሀይላሾ፥ ኮርቸ፥ ዋካላነ ሻቃንቾ። 31 ሳአራ ሄመትያ ኡባፈ ሀይሳቲ ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዴስ። 32 ኤንታ ባዉታ ቦችያ አይ ሚሸይካ ቱና ግዴስ፤ ምꬃ ሚሸይ ዎይኮ ማኦይ ዎይኮ ጋልብ ዎይኮ ኦጎሮይ ቱና ግዴስ። ኤንታ ባዉታይ ቦችዳ ሚሸ ኡባይ ሃꬃን ሙከትድ ኦማርስ ጋካናዉ ጋምኦ፤ ሄሳፈ ጉየ ጌሽ ግዳና። 33 ኤንታፈ እሱዋ ባዉታይ ኦቶ ግዶን ዎꬍድ በንትኮ፥ እያ ግዶን ደእያባ ኡባይ ቱና፤ ሄ ኦቱዋ መንꬅተ። 34 አይ ካꬅ ግድን ሄ ኦቱዋ ግዶን ደእያ ሃꬃፈ ፆክኮ፥ ሄ ካꬃይ ቱና ግዴስ፤ ኡየትያባ ግድን፥ ሄ ኦቱዋ ግዶን ደእኮ ቱና ግዴስ። 35 ሄ ባዉታፐ እሶይ ዎꬍዳ ሚሸ ኡባይ ቱና፤ ጮጨ ዎይኮ ኦቶ ግድኮካ መንꬅተ፤ ኤንቲ ህንተዉ ቱና። 36 ሄ ባዉታይ ቦችዳ ኡባይ ቱና ግድኮካ ፑልቶይነ ሃꬃ ኦል ቱነና። 37 ኤንታ ባዉታፐ እሶይ ዘረꬃ ካꬃ ቦላ ዎꬍኮ፥ ሄስ ቱነና። 38 ሽን ሄ ዘረꬃ ቦላ ሃꬅ ጉክድ ስምን፥ ኤንታ ባዉታፐ እሶይ እያ ቦላ ዎꬍኮ፥ ሄ ዘረꬃይ ህንተዉ ቱና።

39 “ሜተትያ መሄታፐ እሶይ ባዉትኮ፥ እያ ባዉታ ቦችያ ኦንካ ኦማርስ ጋካናዉ ቱና። 40 ኦንካ ሄ መህያ ባዉታፐ ሚኮ፥ ባ ማኡዋ ሜጮ፤ ኦማርስ ጋካናዉ እ ቱና። ኦንካ እያ ባዉታ ቶክድ ደንꬅኮ፥ ባ ማኡዋ ሜጮ፤ ኦማርስ ጋካናዉ እ ቱና።

41 “ሳአራ ጎሸትያ መተꬅ ኡባይ ህንተዉ ቱና፤ እያ ሞፕተ። 42 ኡሎራ ጎሸትያባ ግድን፥ ኦይዱ ቶሆራ ሄመትያባ ግድን፥ ዳሮ ቶሆይ ደእያባ ግድን፥ ሳአራ ጎሸትያ መተꬅ ኡባይ ህንተዉ ቱና ግድያ ግሾ ሞፕተ። 43 ሀ ሳአራ ጎሸትያ መተꬃታን ህንተና ቱንሶፕተ፤ ኤንታ ጋሶን ህንተ አሳተꬃ ቱንሶፕተ። 44 ታኒ ጎዳ፥ ህንተ ፆሳ። ታኒ ጌሽ ግድያ ግሾ፥ ህንተና ዱማይድ ጌሽ ግድተ። ሳአራ ጎሸትያባታን ህንተ አሳተꬃ ቱንሶፕተ። 45 ታኒ ህንተዉ ፆሰ ግዳናዉ ህንተና ግብፀ ቢታፈ ከስዳ ህንተ ጎዳ። ሄሳ ግሾ፥ ታኒ ጌሽ ግድያ ግሾ፥ ህንተካ ጌሽ ግድተ።

46 “መሄ፥ ካፎ፥ ሃꬃ ግዶን ቃፅያ መተꬅ ኡባነ ሳአራ ሄመትያ መተꬃ ኡባ ዎጋይ ሀይሳ። 47 ሄሳን ህንተ ቱናነ ቱና ግዶናይሳታ ግዶን፥ ቃስ ሜተትያነ ሜተቶና መተꬃታ ግዶን ደእያ ዱማተꬃ ሻክድ ኤራና።”