1 ጎዳይ ሙሰኮ ሀይሳዳ ያግስ፤ 2 እስራኤለ አሳስ ሀይሳዳ ያጋዳ ኦዳ፤ “እስ ማጫስ ቃንꬃታዳ አደ ናአ የልኮ፥ ባ ኩሸ መቱዋ በእያ ዎደ ቱና ግደይሳዳ ላፑን ጋላስ ጋካናዉ ቱና ግዳና። 3 ሆስፑንꬃ ጋላስ ናአይ ቃፃረታናዉ ኮሼስ። 4 ሄሳፈ ጉየ፥ ማጫስያ ባ የሎ ሱꬃይ ፅዝአና ጋካናዉ ሀስታማነ ሄꬑ ጋላስ ጋምኦ፤ ቃስ ባ ጌይያ ጋላሳይ ዉራና ጋካናዉ ጌሻባ ቦቾፎ፤ ጌሻ ዱንካንያካ ገሎፖ።

5 “ሽን እስ ማጫስ ማጫ ናአ የልኮ፥ ባ ኩሸ መቶ በእዳ ዎደ እያ ቱና ግድዳይሳዳ ናምኡ ሳምንታ ጋካናዉ እያ ቱና ግዳና። ሄሳፈ ጉየ፥ ባ የሎ ሱꬃይ ፅዝአና ጋካናዉ ኡሱፑን ታማነ ኡሱፑን ጋላስ ጋምኦ።

6 “ማጫስያ አደ ናአ ዎይኮ ማጫ ናአ የላዳ ባ ጌይያ ዎድያ ኦንግዳፐ ጉየ፥ ፁሳ ያርሾስ እስ ላይꬃ ዶርሰነ ናጋራ ያርሾስ ቃስ እስ ሆለ ዎይኮ እስ ኩራቾ ጌሻ ዱንካንያ ፐንገን ደእያ ካህንያኮ ኤሆ። 7 ካህነይ ሄሳ ኤክድ ጎዳ ስንꬃን እ ናጋራ አቶተꬃስ ያርሼስ። ሄሳፈ ጉየ፥ እያ ጌያና። አደ ናአ ዎይኮ ማጫ ናአ የልያ ማጫሳስ ደእያ ዎጋይ ሀይሳ።

8 “ሽን እያ እስ ላይꬃ ዶርሰ ኤሀናዉ ዳንዳኦና እፅኮ፥ ናምኡ ሆለታ ዎይኮ ናምኡ ኩራቾታ ኤሆ። ኤንታፈ እሶይ ፁሳ ያርሾስ፥ ቃስ እሶይ ናጋራ ያርሾስ ግዶ። ሄሳዳ ኦꬅድ ካህነይ እ ናጋራ አቶተꬃስ ያርሼስ፤ እያካ ጌሽ ግዳና።”