1 ጎዳይ ሙሰኮነ አሮናኮ ሀይሳዳ ያግስ፤ 2 “እስ አሳ አሳተꬃ ቦላ ክፅ ዎꬍኮ ዎይኮ ሻቶይ ዎይኮ እራለይ ከይኮ እያ ጎጋይ ሀርገን ላመትኮ፥ ሄ ኡራ ካህንያ አሮናኮ ዎይኮ ካህነ ግድዳ እያ አደ ናይታፐ እሱዋኮ ኤሆ። 3 ካህነይ እያ ጎጋ ቦላ ደእያ ማዱንꬃ በኦ። ሄ ማዱንፅዳ በሳን ደእያ እክሰይ ቦፅኮነ ማዱንꬃይ ኦላትኮ፥ ሄስ ጎጋ ሀርገ። ካህነይ ሄሳ በእድ ኡራይ ቱና ግደይሳ ኤርሶ። 4 ሽን እያ ጎጋ ቦላ ደእያ ማዱንꬃይ ቦꬅ ግድድ፥ ጎጋፐ ካንꬅድ ኦላትቦናባ ግድኮ ሄ ማዱንꬃ ቦላ ደእያ እክሰይ ቦፆናባ ግድኮ፥ ካህነይ ሄ ኡራ ዱማ ኬꬃን ላፑን ጋላስ ጎርድድ ዎꬆ። 5 ላፑንꬃ ጋላስ ካህነይ እያ ዛሪድ በኦ፤ እ በእያ ዎደ ማዱንꬃይ ኡራ ጎጋ ቦላ ዳልጎና ካሰይስዳ ደእኮ፥ ካህነይ ሄ ኡራ ናምአንꬆ ዱማ ኬꬃን ላፑን ጋላስ ጎርድድ ዎꬆ። 6 ቃስካ ላፑንꬃ ጋላስ ካህነይ እያ በኦ፤ እ በእያ ዎደ ማዱንꬃይ ዳልጎና እፅድ ꬋይ ꬋይ ቢኮ፥ ካህነይ እ ቱና ግደይሳ ኤርሶ። ሄስ ጎኦ ግደይሳ ኤርሶ፤ ሄ ኡራይ ባ ማኡዋ ሜጭድ ቱና ግዶናይሳ ኤርሴስ። 7 ሽን እ ጌያናዉ ባና ካህንያ በስዳፐ ጉየ፥ ሄ ጎኦይ እያ ጎጋ ቦላ ዳልግ ዳልግ ቢኮ እ ዛሪድ ባና በሳናዉ ካህንያኮ ቦ። 8 ካህነይ እያ በኦ፤ ሄ ጎኦይ ኡራ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ካህነይ እ ቱና ግደይሳ ኤርሶ።

9 “ኦንካ ጎጋ ሀርገን ኦይከትኮ እያ ካህንያኮ ኤሆ። 10 ካህነይ እያ በእያ ዎደ እያ ጎጋ ቦላ ቦꬃ ክፅ ደእኮ፥ እክሰይ ቦꬅ ላምኮነ ሄ ክፃ ግዶን አሾይ በንትኮ፥ 11 ሄስ ጎጋ ቦላ ጋምእዳ ሀርገ ግድያ ግሾ፥ ካህነይ እ ቱና ግደይሳ ኤርሶ። እ ቱና ግደይስ ኤረትዳ ግሾ፥ እያ ዱማ ኬꬃን ጎርድድ ዎꬃናዉ ኮሸና። 12 ካህነይ ጎጋ ሀርገይ አድያ አሳተꬃ ቦላ ዳልግኮ፥ ሁጰፐ ቶሆ ጋካናዉ ኡባ ማእዳባ ግድኮ በኦ። 13 ሄ ጎጋ ሀርገይ እያ አሳተꬃ ኡባ ማእኮ፥ እያ አሳተꬃይ ኩመꬅ ላመትድ ቦꬅ ግድዳ ግሾ፥ እ ቱና ግዶናይሳ ካህነይ ኤርሶ። 14 ሽን ሄ ማዱንꬃ ግዶራ አሾይ በንትኮ እ ቱና። 15 ካህነይ ሄ አሹዋ በእድ ሄ ኡራይ ቱና ግደይሳ ኤርሶ። ሄ አሾይ ጎጋ ሀርገ ግድያ ግሾ እ ቱና። 16 ሽን ሄ አሾይ ቃስካ ላመትድ ቦፅኮ፥ ሄ ኡራይ ካህንያኮ ቦ። 17 ካህነይ እያ በኦ፤ እያ ማዱንꬃይ ቦፅዳባ ግድኮ፥ ሄ ኡራይ ቱና ግዶናይሳ ካህነይ ኤርሶ፤ እ ቱና ግዳና።

18 “እስ አሳ ቦላ መርኮይ ዎꬍድ ፓፅዳባ ግድኮ፥ 19 እያ በሳን ቦꬃ ክፃይ ዎꬍኮ ዎይኮ ዞእዳ እራለይ ከይኮ ሄ ኡራይ ካህንያኮ ቦ። 20 ካህነይ እያ በኦ፤ ሄ ማዱንꬃይ ኦላትኮ፥ ማዱንꬃ ቦላ ደእያ እክሰይ ላመትድ ቦፅኮ፥ ሄ ኡራይ ቱና ግደይሳ ካህነይ ኤርሶ። ሄስ መርኮዳ ዶምዳ ጎጋ ሀርገ። 21 ሽን ካህነይ በእያ ዎደ እክሰይ ቦፆናባ ግድኮ፥ ማዱንꬃይ ጎጋ ካንꬅድ ኦላትቦናባ ግድኮ፥ ቃስ ꬋይ ꬋይ ቢኮ፥ ካህነይ እያ ዱማ ኬꬃን ላፑን ጋላስ ጎርድድ ዎꬆ። 22 ሄስ እያ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ሄ ኡራይ ቱና ግደይሳ ካህነይ ኤርሶ። 23 ሽን ሄ እራለይ ዳልግ ዳልግ ቦና እስ በሳን ደእኮ፥ ሄስ መርኮይ ፓፅዳ ቤታ ግድያ ግሾ፥ ሄ ኡራይ ቱና ግዶናይሳ ኤርሶ።

24 “ታም እስ አስ ሚኮ ሄ ምዳ በሳን ቦꬃ ዎይኮ ዞኦ እራለይ ከይኮ፥ 25 ካህነይ ሄ በሳ በኦ። ሄ በሳን ደእያ እክሰይ ቦፅኮነ ሄ ማዱንꬃይ ኦላትኮ፥ ሄስ ጎጋ ሀርገ። እ ታማይ ምዳ በሳራ ከይዳ ግሾ ካህነይ እ ቱና ግደይሳ ኤርሶ። 26 ሽን ካህነይ በእያ ዎደ ሄ ማዱንꬃ ቦላ ደእያ እክሰይ ቦፆናባ ግድኮ፥ ማዱንꬃይ ጎጋ ካንꬅድ ኦላትቦናባ ግድኮነ ቃስ ꬋይ ꬋይ ብዳባ ግድኮ፥ ካህነይ እያ ዱማ ኬꬃን ላፑን ጋላስ ጎርድድ ዎꬆ። 27 ላፑንꬃ ጋላስ ካህነይ እያ በእያ ዎደ ሄ በሳይ ዳልግ ዳልግ ቢኮ፥ ሄስ ጎጋ ሀርገ ግድያ ግሾ እ ቱና ግደይሳ ካህነይ ኤርሶ። 28 ሽን ሄ ማዱንꬃይ ጎጋ ቦላ ዳልጎና አግድ እስ በሳን ኡትኮነ ꬋይ ꬋይ ቢኮ፥ ሄስ ታማይ ምዳ በሳን አትዳ ቤታ ግድያ ግሾ፥ እ ቱና ግዶናይሳ ካህነይ ኤርሶ።

29 “እስ አደይ ዎይኮ ማጫሳ ሁጰን ዎይኮ ጋጮ ቦላ ማዱንꬅ ከይኮ፥ 30 ካህነይ ሄ ማዱንꬃ በእያ ዎደ ማዱንꬃይ ጎጋ ካንꬅድ ኦላትኮ እያ ቦላ ደእያ እክሰይ ሌእድ ጋላልኦ ዳንኮ፥ ሄስ ሁጰን ዎይኮ ጋጮ ቦላ ከይያ ቃችያ ጎጋ ሀርገ ግድያ ግሾ፥ ሄ ኡራይ ቱና ግደይሳ ካህነይ ኤርሶ። 31 ቃስ ካህነይ ሄ ሀርግያ በእያ ዎደ ጎጋ ካንꬅድ ኦላትቦናባ ግድኮ፥ ካሬꬃ እክሰይ እያ ቦላ ꬋይኮ፥ ሄ ቃችያ ሀርገይ ደእያ ኡራ ካህነይ ዱማ ኬꬃን ላፑን ጋላስ ጎርድድ ዎꬆ። 32 ላፑንꬃ ጋላስ ካህነይ ሄ ሀርግያ በእያ ዎደ ቃችያ ሀርገይ ዳልጎናባ ግድኮ፥ እያ ቦላ ጋላልኦ ዳንያ እክሰይ ባይናባ ግድኮነ ጎጋ ካንꬅድ ኦላትቦናባ ግድኮ፥ 33 ሄ ኡራ ቃችያ በሳን ደእያ እክስያ ግዶናሽን፥ ማዱንꬃ ዩሾን ደእያ እክስያ ሜዶ። ካህነይ ሄ ኡራ ዱማ ኬꬃን ሀራ ላፑን ጋላስ ጎርድድ ዎꬆ። 34 ላፑንꬃ ጋላስ ካህነይ ሄ ቃችያ በሳ በእያ ዎደ ኡራ ጋልባ ቦላ ዳልጎና እፅኮነ ጎጋ ካንꬅድ ኦላቶና እፅኮ፥ ሄ ኡራይ ቱና ግዶናይሳ ካህነይ ኤርሶ። ኡራይ ባ ማኡዋ ሜጭድ ጌሽ ግዳና። 35 ሽን እ ጌይዳፐ ጉየ፥ ቃችያ ሀርገይ ሄ ኡራ ጋልባ ቦላ ዳልግ ዳልግ ቢኮ፥ 36 ካህነይ እያ በእያ ዎደ ሄ ቃችያ ሀርገይ ዳልግዳባ ግድኮ፥ ሄ ኡራይ ቱንዳ ግሾ ካህነይ ጋላልኦ ዳንያ እክስያ ኮዮፖ። 37 ሽን ካህነይ በእያ ዎደ ሄ ቃችያ በሳይ ዳልጎናባ ግድኮነ ካሬꬃ እክሰይ እያ ቦላ ዶልዳባ ግድኮ፥ ሄ ቃችያ በሳይ ፓፅስ። ሄ ኡራይ ቱና ግዶና ግሾ፥ እ ጌሽ ግደይሳ ካህነይ ኤርሶ።

38 “እስ አደ ዎይኮ ማጫሳ ጎጋ ቦላ ቦꬃ እራለይ ከይኮ፥ 39 ካህነይ በእያ ዎደ ኤንታ ጎጋ ቦላ ደእያ እራለይ ቡላ ግድኮ፥ ሄስ ጎጋ ቦላ ጮ ከይዳባ ግድያ ግሾ ሄ ኡራይ ቱና ግደና።

40 “እስ አሳስ ሁጰ ብናናይ ቆቆፈትኮ፥ ቦአ ግዴስፐ አትሽን፥ እ ቱና ግደና። 41 እስ አስ ስንꬃራ ቦአትኮ፥ እያ ቲሽ ምስፐ አትሽን፥ እ ቱና ግደና። 42 ሽን እያ ቦእ ዎይኮ ቲሽ ምዳይሳ ቦላ ዞኦ ዎይኮ ቦꬃ ማዱንꬅ ከይኮ፥ ሄስ እያ ቦአን ዎይኮ እያ ቲሻ ቦላ ከይዳ ጎጋ ሀርገ። 43 እያ ካህነይ በእያ ዎደ እያ ቦእ ዎይኮ ቲሽ ምዳይሳ ቦላ ደእያ ማዱንꬃይ ጋልባ ቦላ ከይያ ጎጋ ሀርገ መላ ዞኦ ግድኮ፥ 44 ሄ ኡራይ ቱማ ጎጋ ሀርገን ኦይከትዳ ሀርጋንቾ። እ ቱና ግድያ ግሾነ እያ ሀርገይ እያ ሁጰን ደእያ ግሾ እ ቱና ግደይሳ ካህነይ ኤርሶ።

45 “ጎጋ ሀርገይ ኦይክዳ አስ ፔትዳ ማኦ ማኦ፤ ባ ሁጵያ ፕፆፖ፤ ባ ዶና ካሞ፤ ባ ቃላ ꬎቁ ኦꬅድ፥ ‘ታኒ ቱና፥ ታኒ ቱና!’ ያጎ። 46 ሄ ሀርገይ እያ ቦላ ደእዳ ዎደ ኡባን እ ቱና። እ ቱና ግድያ ግሾ፥ አሳፐ ሻከትድ፥ ጉታፐ ካረን ባርካ ደኦ።

47 “አይ ማኦ ቦላ ቡቅዳ በሲ በንትኮ፥ ሄ ማኦይ ሱፈ ግድን ዎይኮ ሊኖ ግድን፥ 48 ቃጭናፐ ዎይኮ ሻሎፐ ዳደትዳ ሊኖ ዎይኮ ሱፈ ግድን፥ ጋልባ ዎይኮ ጋልባፈ ኦሰትዳ ማኦ ግድን፥ 49 ሄ ማኡዋ ቦላ በንትዳ ቡቃይ ጭሊሎ ዎይኮ ዞኦ ማላ በስኮ፥ እ ቃጭናፐ ዎይኮ ሻሎፐ ዳደትዳባ ግድን፥ ጋልባ ዎይኮ ጋልባፈ ኦሰትዳባ ግድን፥ ሄስ አሳፐ አሰ ኦይክያ ሀርገ ግድያ ግሾ፥ ሄሳ ካህነይ በሳናዉ ኮሼስ። 50 ካህነይ ሄ ቡቃ በእድ፥ ሄ ቡቅዳ ማኡዋ ዱማ ኬꬃን ላፑን ጋላስ ጎርድድ ዎꬆ። 51 ላፑንꬃ ጋላስ ካህነይ ሄ ማኡዋ በእያ ዎደ ሄ ማኡዋ ቦላ ደእያ ቡቃይ ዳልግ ዳልግ ቢኮ፥ እ ቃጭና ዎይኮ ሻሎ ግድን፥ ጋልባ ዎይኮ ጋልባፈ ኦሰትዳ ማኦ ግድን፥ ሄስ እሱዋፈ እሱዋ ኦይክያ ቡቃ ሀርገ ግድያ ግሾ ሄ ማኦይ ቱና። 52 ሄ ማኦይ ቃጭና ዎይኮ ሻሎ ግድን፥ ሊኖ ዎይኮ ሱፈ ግድን፥ ጋልባፈ ኦሰትዳባ አይባ ግድን፥ ካህነይ እያ ፁጎ። ሄስ እሱዋፈ እሱዋ ኦይክያ ቡቃ ሀርገ ግድያ ግሾ፥ እ ፁገታናዉ በሴስ።

53 “ሽን ካህነይ በእያ ዎደ ሄ ቡቃ ማኡዋ ቦላ ዳልግቦናባ ግድኮ፥ እ ቃጭና ዎይኮ ሻሎ ዎይኮ ጋልባፈ ኦሰትዳባ አይባ ግድን፥ 54 ሄ ቡቃይ ደእያ ማኡዋ ሜጫና መላ ካህነይ ኪቶ። ሄሳፈ ጉየ፥ ሄ ማኡዋ ዱማ ኬꬃን ሀራ ላፑን ጋላስ ጎርድድ ዎꬆ። 55 ሄ ማኦይ ሜጨትዳፐ ጉየ ቃስካ ካህነይ በእያ ዎደ ሄ ቡቃይ ባ ማላ ላሞናባ ግድኮነ ዳልግ ዳልግ ቦና እፅኮካ እ ቱና። ሄ ቡቃ በሳይ ማኡዋስ ጉየ ባጋራ ዎይኮ ስንꬃ ባጋራ ደእኮካ ሄ ማኦይ ታማን ፁገታናዉ ኮሼስ። 56 ሽን ሄ ማኡዋ ሜጭ ስምን ካህነይ በእያ ዎደ ቡቃይ ꬋይ ꬋይ ቢኮ፥ እ ጋልባ ግድን፥ ቃጭና ዎይኮ ሻሎ ግድን፥ ሄ ቡቃይ ደእያ በሳ ካህነይ ዳክድ ከሶ። 57 ሄሳፈ ጉየ፥ ማኡዋ ቦላ ስሚድ ከይኮ፥ ሄ ማኦይ ቃጭና ዎይኮ ሻሎ ግድን፥ ጋልባፈ ኦሰትዳባ ግድን፥ ሄስ ዳልግ ዳልግ ቢኮ ሄ ቡቃይ ደእያ ማኦይ ታማን ፁገታናዉ በሴስ። 58 ሽን ሜጨትዳ ማኦይ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ማኦ ግድን፥ ቡቃ ማላይ ꬋይኮ፥ ሄ ማኦይ ናምአንꬆ ሜጨቶ፤ ሄሳፈ ጉየ፥ እ ጌዬስ” ያግስ።

59 እስ ማኦይ ሱፈ ዎይኮ ሊኖ ግድን፥ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ግድን፥ ሄ ማኡዋ ጌሽ ዎይኮ ቱና ያግሳናዉ ዳንዳእያ ዎጋይ ሀይሳ።