1 ጎዳይ ሙሰኮነ አሮናኮ ሀይሳዳ ያግስ፤ 2 እስራኤለ አሳስ ሀይሳዳ ያግድ ኦድተ፤ “እስ አሳ አሳተꬃፈ ጎግያባይ ደእኮ ሄስ ቱና። 3 ጎግያባይ ደእያ ኡራ ቱና ኦꬅያ ዎጋይ ሀይሳ፤ ሄ ጎግያባይ አግን፥ አጎና እፅን፥ ሄ ኡራ ቱና ኦꬄስ።

4 “እያ አሳተꬃፈ ጎግያባይ ደእያ ኡራይ ዝንእያ ሂፃይነ ኡትያ ኦይደ ኡባይ ቱና። 5 እያ ሂፃ ቦችያ ኦንካ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዴስ። 6 ጎግያባይ ደእያ ኡራይ ኡትዳባ ቦላ ኡትያ ኦንካ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዴስ።

7 “ጎግያባይ ደእያ ኡራ አሳተꬃ ቦችያ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ እ ቱና ግዴስ።

8 “ጎግያባይ ደእያ አስ ቱና ግዶና አሳ ቦላ ጩትኮ፥ ሄ ኡራይ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ እ ቱና ግዴስ።

9 “ጎግያባይ ደእያ ኡራይ ኡትያ ቶጋ ኮር ቱና። 10 እያፐ ጋርሳራ ደእያባ ቦችያ ኦንካ ኦማርስ ጋካናዉ ቱና ግዴስ፤ ቃስ ሄሳ ቶክያ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ እ ቱና ግዴስ።

11 “ጎግያባይ ደእያ አስ ባ ኩሽያ ሜጨቶና ቦችያ አስ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ።

12 “ጎግያባይ ደእያ ኡራይ ቦችያ ኦቶ ኡባ መንꬅተ፤ ምꬃፈ ኦሰትዳ ሚሸ ኡባይ ሃꬃን ሜጨቶ።

13 “ጎግያባይ ደእያ አስ ሄ ጎግያባፐ ጌይዳ ዎደፐ ላፑን ጋላስ ጋምኦ። ባ ማኡዋ ሜጮ፤ ባ አሳተꬃ ፑልቶ ሃꬃን ሜጨቶ፤ ያትድ እ ጌሽ ግዴስ። 14 ሆስፑንꬃ ጋላሳን ናምኡ ሆለታ ዎይኮ ናምኡ ኩራቾታ ኤክድ፥ ጌሻ ዱንካንያ ፐንገ፥ ጎዳ ስን ኤህድ ካህንያስ እሞ። 15 ካህነይ ሆለታፐ እሱዋ ናጋራ ያርሾስ፥ እሱዋ ቃስ ፁሳ ያርሾስ ያርሼስ፤ ያትድ ካህነይ ኡራ አሳተꬃፈ ጎግያባ ግሾ ጎዳ ስንꬃን እያ ናጋራ አቶ ያግሴስ።

16 “እስ አደፈ እያ አቱንꬃይ ጉክኮ፥ ባ ኩመꬃ አሳተꬃካ ሜጨቶ፤ ያትድ ኦማርስ ጋካናዉ እ ቱና ግዴስ። 17 አቱንꬃይ ቦችዳ ማኦ ኡባይ ዎይኮ ጋልባ ኡባይ ሃꬃን ሜጨቶ፤ ያትድ ኦማርስ ጋካናዉ ቱና ግዴስ። 18 እስ አደይ ማጫራ አቅን፥ እያ አቱንꬃይ ጉክኮ፥ ናምአይካ ሃꬃን ሜጨቶ፤ ያትድ ኦማርስ ጋካናዉ ኤንቲ ቱና ግዶሶና።

19 “እስ ማጫስ ባ ኩሸ መቶ በእኮ፥ ላፑን ጋላስ ጋካናዉ እያ ቱና፤ እዮ ቦችያ ኦንካ ኦማርስ ጋካናዉ ቱና።

20 “ባ ኩሸ መቶ ዎደ እያ ዝንእያ ሂፃይነ እያ ኡትያ ኦይደይ ኡባይ ቱና። 21 እያ ዝንእያ ሂፃ ቦችያ ኡባይ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዶ። 22 እያ ኡትያባ ቦችያ ኡባይ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዶ። 23 እያ ዝንእያ ሂፃ ግድን ዎይኮ እያ ኡትያባ ቦችያ ኦንካ ኦማርስ ጋካናዉ ቱና።

24 “እስ ማጫስ ኩሸ መቶራ ደእያ ዎደ አደይ ኢራ አቅኮ፥ ሄ ኩሸ መቱዋ እ ቦችኮ፥ ላፑን ጋላስ ጋካናዉ እ ቱና ግዴስ፤ እ ዝንእያ ሂፃ ኡባይ ቱና ግዴስ።

25 “እስ ማጫስ፥ ባ ኩሸ መቶ ዎደይ አꬍን፥ ሱꬅ አጎና ጎግኮ ዎይኮ ኩሸ መቶ ዎደይ ባ ቃማፈ አꬍድ ጎግኮ፥ ኩሸ መቶ ዎደ እያ ቱና ግድዳይሳዳ ሱꬃይ ኤቃና ጋካናዉ እያ ቱና ግዳዉሱ። 26 ሱꬅ ኢፐ ጎግያ ዎደ እያ ዝንእያ ሂፃ ኡባይ፥ ባ ኩሸ መቶ በእያ ዎደ እያ ዝንእዳ ሂፃ መላነ እያ ኡትያ ኦይድያ መላ ቱና ግዴስ። 27 ሄ ቱንዳባታ ቦችያ ኦንካ ቱና ግድያ ግሾ እ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ።

28 “ኢፐ ጎግያ ሱꬃይ ኤቅኮ፥ እያ ሄ ዎደፐ ዶማዳ ላፑን ጋላስ ጋምኦ፤ ሄሳፈ ጉየ፥ እያ ጌሽ ግዳና። 29 ሆስፑንꬃ ጋላስ እያ ናምኡ ሆለታ ዎይኮ ናምኡ ኩራቾታ ኤሀዳ ጌሻ ዱንካንያ ፐንገን ካህንያስ እሞ። 30 ካህነይ ሆለታፐ እሱዋ ናጋራ ያርሾስ፥ እሱዋ ፁሳ ያርሾስ ያርሾ። ያትድ፥ ካህነይ ኢፐ ጎግያ ቱናተꬃ ግሾ ጎዳ ስንꬃን እ ናጋራ አቶ ያግሴስ።

31 “እስራኤለ አሳይ ባንታ ግዶን ደእያ ጌሻ ዱንካንያ ቱንስድ፥ ሀይቆና መላ ኔኒ ሀይሳዳ ኦꬃዳ ኤንቲ ባንታና ቱንስያባፐ ዱማይድ ዳና መላ ናጋ።”

32 እያ አሳተꬃፈ ጎግያባይ ደእያ አሳስ፥ እያ አቱꬃይ ጉክን ቱንያ አደስ፥ 33 ባ ኩሸ መቶ ጋሶን ቱንያ ማጫሳስ፥ አደ ግድን ማጫ ግድን ጎግያባይ ደእያ አሳስነ ቱንዳ ማጫራ አቅያ አደስ እመትዳ ዎጋይ ሀይሳ።