1 አሮና አደ ናይት ናምአይ ጎዳ ስን ሺቅድ ሀይቅዳፐ ጉየ፥ ጎዳይ ሙሰኮ ሀይሳዳ ያግስ፦ 2 ታኒ ታቦትያ ናጋራ አቶተꬃ ካማ ቦላ ሻራን ግዳዳ ቆንጭያ ግሾ ማጋራጁዋፈ ጉየን ደእያ ኡባፈ ጌሻ በሳ ባ ኮይዳ ዎደ ገልድ ሀይቆና መላ ነ እሻ አሮናስ ኦዳ። 3 አሮን ናጋራ ያርሾስ እስ ዎፋኖ፥ ፁሳ ያርሾስ እስ ማራዘ ኤክድ ኡባፈ ጌሻ በሳ ገሎ። 4 አሮን ሊኖፐ ኦሰትዳ ጌሻ አዱሳ ቃምሰነ ጋርሳራ ማኤትያ ማኦ ማኦ። ሊኖፐ ኦሰትዳ ዳንጮ ዳንጮ፤ ሄሳዳ ባ ሁጰን ሊኖፐ ኦሰትዳ ፃꬃ ቃጨ ዎꬆ። ሄ ማኦት ጌሽ ግድያ ግሾ፥ ማአናፐ ስን ባ አሳተꬃ ሜጨቶ።

5 እስራኤለ ማባራይ ናጋራ ያርሾስ ናምኡ ኮለታ፥ ፁሳ ያርሾስ እስ ማራዘ አሮናስ ኤሆ። 6 አሮን ባ ናጋራስነ ባ ሶ አሳ ናጋራ አቶተꬃስ እስ ዎፋኖ ያርሾ። 7 ሄሳፈ ጉየ፥ ናምኡ ኮለታ ጌሻ ዱንካንያ ፐንገን ጎዳ ስን ኤሆ። 8 ሄ ናምኡ ዴሻታ ኤክድ እሱዋ ጎዳሳ፥ እሱዋ ቃስ አዛዘላሳ *አዛዘላሳ፦ እብራወꬆ ዶናን መላ ቢታ የደተይሳ ጉሱ። ግድ ኤንታ ቦላ ሳማ የጎ። 9 አሮን ሳማን ጎዳስ ግድዳ ዴሻ ኤክድ ናጋራ ያርሾ ኦꬅድ ያርሾ። 10 ሽን ሳማን አዛዘላስ ግድዳ ዴሻ አሳ ናጋራ አቶተꬃስ መላ ቢታ የዳናዉ ፓፃ ደእሽን ጎዳስ ሺሾ።

11 አሮን ባ ናጋራስነ ባ ሶ አሳ ናጋራ አቶተꬃስ እስ ዎፋኖ ናጋራ ያርሾ ኦꬅድ ሺሾ። ያትድ ባ ናጋራ ግሾ ሄ ዎፋኑዋ ሹኮ። 12 ጎዳ ስንꬃን ደእያ ያርሾ በሳፈ እፃነ ጩይስያ ሚሸን ቦንቆ ኩንꬅድ፥ ሊቅድ ጋጨትዳ ሳውያ እፃነ ናምኡ ኩጫ ኤክድ ማጋራጁዋ ግዶ ገሎ። 13 ጎዳ ስንꬃን ደእያ ታማን እፃነ ዎꬆ። እ ሀይቆና መላ እፃንያ ጩያይ ታቦትያ ቦላ ደእያ ናጋራ አቶተꬃ ካማ ካሞ። 14 ዎፋኑዋ ሱꬃፈ ጉꬃራ ኤክድ፥ ባ ብራꬍያ የድ ኤክድ አቶተꬃ ካማ ስንꬃ ባጋ ዉርፆ። ናጋራ አቶተꬃ ካማ ስንꬃ ባጋራ ደእያ በሳ ላፑን ቶሆ ዉርፆ።

15 ሄሳፈ ጉየ፥ አሳ ናጋራ ግሾ ግድያ ዴሻ ሹክድ፥ እያ ሱꬃ ማጋራጁዋ ግዶ ኤህድ፥ ዎፋኑዋ ሱꬃ ዉርፅዳይሳዳ ናጋራ አቶተꬃ ካማነ ታቦትያ ስንꬃ ዉርፆ። 16 ኡባፈ ጌሻ በሳ እስራኤለ አሳ ቱናተꬃፈነ ናጋራፐ ጌሼስ። ኤንቲ ቱናባ ኦꬅሽን፥ ኤንታ ግዶን ደእያ ጌሻ ዱንካንያ ሀይሳዳ ኦꬅድ ጌሾ። 17 አሮን ኡባፈ ጌሻ በሳ ገልድ፥ ባ ናጋራ፥ ባ ሶ አሳ ናጋራነ ኩመꬃ እስራኤለ አሳ ናጋራ አቶተꬃስ ያርሽድ ከያና ጋካናዉ፥ ኦንካ ጌሻ ዱንካንያ ግዶን ደኦፖ።

18 ሄሳፈ ጉየ፥ ጎዳ ስንꬃን ደእያ ያርሾ በሳ ከይድ እያ ጌሾ። ዎፋኑዋ ሱꬃፈነ ዴሻ ሱꬃፈ ጉꬃራ ኤክድ፥ ያርሾ በሳ ዩሹዋን ደእያ ካጨታ ትዮ። 19 ሄ ሱꬃን ባ ብራꬍያ የድ ኤክድ ላፑን ቶሆ ዉርፆ፤ ሄሳዳ ኦꬅድ እስራኤለ አሳ ቱናተꬃፈ ሄ ያርሾ በሳ ጌሾ።

20 አሮን ኡባፈ ጌሻ በሳ፥ ጌሻ ዱንካንያነ ያርሾ በሳ ጌሽያ ዎጋ ፖልዳፐ ጉየ፥ ፓፃ ደእያ ዴሻ ሺሾ። 21 አሮን ባ ናምኡ ኩሽያ ፓፃ ደእያ ዴሻ ሁጰን ዎꬅድ፥ እስራኤለ አሳ ናቆ ኡባ፥ ኤንታ ማካላ ኡባ፥ ኤንታ ናጋራ ኡባ ፓፆ። ያትድ ሄ ዴሻ ሁጰን ሄሳ ቶሶ፤ ሄ ዴሻ ኤፋና መላ ጊግስዳ ኡራ ቦላ መላ ቢታ የዶ። 22 ዴሻይ ኤንታ ናጋራ ኡባ ቶክድ፥ አስ ባይና በሲ መላ ቢታ ቦ።

23 ሄሳፈ ጉየ፥ አሮን ጌሻ ዱንካንያ ብድ ኡባፈ ጌሻ በሳ ገሎ። ሊኖፐ ኦሰትዳ ካሰ እ ማእድ ገልዳ ማኡዋ ቃርድ ያን ዎꬆ። 24 ጌሻ በሳን ባ አሳተꬃ ሜጨትድ፥ ባ ካሰ ማኡዋ ማእ ከይድ ባ ናጋራነ አሳ ናጋራ አቶተꬃስ ፁሳ ያርሾ ያርሽሶ። 25 ናጋራ ያርሹዋ ሞꬉዋ ያርሾ በሳን ፁጎ።

26 ባዞ የደትያ ዴሻ ኤፍዳ ኡራይ ባ ማኡዋ ሜጮ፤ ባ አሳተꬃ ሜጨቶ፤ ያት ስሚድ ጉታ ገሎ።

27 ናጋራ አቶተꬃስ አሮን ኤንታ ሱꬃ ኡባፈ ጌሻ በሳ ኤህዳ ዎፋኑዋነ ዴሻ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁጎ። 28 ሄሳ ፁግዳ ኡራይ ባ ማኡዋ ሜጮ፤ ባ አሳተꬃ ሜጨቶ፤ ሄሳፈ ጉየ፥ ጉታ ገሎ።

29 ሀይስ ህንተዉ መርና ዎጋ ግዶ፤ ላፑንꬃ አጌናይ ገልዳ ታማንꬆ ጋላስ ህንተና ካዉሽተ፤ ቢታ አዉ ናአ ግድን ዎይኮ ሀራ ቢታ አስ ግድን፥ አይ ኦሶካ ኦꬆፍተ። 30 አይስ ጊኮ ሄ ጋላሳይ ህንተ ናጋራ አቶተꬅ ደምያ ጋላስ፤ ህንተ ጎዳ ስንꬃን ህንተ ናጋራ ኡባፈ ጌያና። 31 ሄስ ህንተዉ ግታ ሳምባታ ሸምፖ ጋላስ ግዳና። ሄ ጋላስ ህንተና ካዉሽተ፤ ሄስ ህንተዉ መርና ዎጋ ግዶ። 32 ቃስ ባ አዋ በሳን ካህነ ግዳና መላ ትየትያነ ዱማትያ ካህነይ ጌሽ ግድዳ ሊኖፐ ኦሰትዳ ማኡዋ ማእድ፥ ናጋራ አቶተꬃ ዎጋ ፖሎ። 33 እ ኡባፈ ጌሻ በሳ፥ ገሻ ዱንካንያ፥ ያርሾ በሳ፥ ካህነታነ እስራኤለ አሳ ኡባ ጌሾ። 34 እስራኤለ አሳ ኡባ ናጋራ አቶተꬃስ ላይꬃን ላይꬃን እስ ቶሆ ኦꬃናዉ ሀይስ ህንተዉ መርና ዎጋ ግዶ። ጎዳይ ኪትዳይሳዳ ሙሰይ ኦꬅስ።