1 ጎዳይ ሙሰኮ ሀይሳዳ ያግስ፤ 2 “እስራኤለ አሳስ ሀይሳዳ ያጋዳ ኦዳ፤ ታኒ ጎዳ፥ ህንተ ፆሳ። 3 ህንተ ካሰ ደእዳ ግብፀ አሳይ ኦይሳዳ ኦꬆፕተ፤ ዎይኮ ሀእ ታኒ ህንተና ገልስያ ካናነ ቢታ አሳይ ኦይሳዳ ኦꬆፕተ፤ ኤንታ ዎጋ ካሎፍተ። 4 ህንተ ታ ኪታ ኦꬅተ፤ ታ ዎጋ ናግተ፤ ታኒ ጎዳ፥ ህንተ ፆሳ። 5 ታ ኪታነ ታ ዎጋ ናግተ፥ ህንተ ሄሳ ኦꬅኮ ደኦን ዳና። ታኒ ጎዳ።

6 “ህንተፈ ኦንካ ባ ማታ ዳቦራ ፃሎፎ። ታኒ ጎዳ።

7 “ነ አይዉ ፃላዳ ነ አዋ ካዉሾፋ። እያ ነ አይዉ ግድያ ግሾ እዮ ፃሎፋ።

8 “ነ አዋ ማችዉ ፃላዳ ነ አዋ ካዉሾፋ።

9 “ነ ምችዉ ፃሎፋ፤ ሶን የለትዳ ዎይኮ ካረን የለትዳ ነ አዋ ናእዉ ዎይኮ ነ አየ ናእዉ ፃሎፋ።

10 “ነ ናኣ ናእዉ ዎይኮ ነ ናኤ ናእዉ ፃላዳ ነ ነና ካዉሾፋ።

11 “ነ ምቾ ግድያ ግሾ ነ አዋ ማቸ ናእዉ ፃሎፋ።

12 “ነ አዋ ምችዉ ፃሎፋ፤ እያ ነ አዋስ ማታ ዳቦ።

13 “ነ አየ ምችዉ ፃሎፋ፤ እያ ነ አየስ ማታ ዳቦ።

14 “ነ አዋ እሻ ማችዉ ፃሎፋ፤ እያ ነ አዋ እሻ ማችዉ። 15 ነ ናኣ ማችዉ ፃሎፋ፤ እያ ነ ናኣ ማችዉ።

16 “ነ እሻ ማችዉ ፃላዳ ነ እሻ ካዉሾፋ።

17 “አይዉነ እ ናእዉ ፃሎፋ፤ እ ናኤ ናእዉ ዎይኮ እ ናኣ ናእዉ ፃሎፋ። ኤንቲ እዉ ማታ ዳቦ ግድያ ግሾ፥ ሄስ ኢታ ቱና።

18 “ነ ማችያ ፓፃ ደእሽን፥ ነ ማቸ ምችዉ ዳዉꬆፋ።

19 “ኩሸ መቶራ ደእያ ማጫስ ፃሎፋ።

20 “ኔኒ ቱኖና መላ ነ ሾሩዋ ማችዉ ፃሎፋ።

21 “ነ ፆሳ ሱንꬃይ ጫየቶና መላ ነ ናይታፐ እሱዋ ታማን ፁጋዳ፥ ሞሎካ ግያ ኤቃስ ያርሾ ኦꬃዳ እሞፋ። ታኒ ጎዳ።

22 “ፆሳ ስንꬃን እፀትዳባ ግድያ ግሾ ማጫሳራ ጋሄተይሳዳ አደራ ጋሄቶፋ።

23 “ኔኒ ቱኖና መላ መሄራ ጋሄቶፋ፤ ማጫስ መሄራ ጋሄታናዉ መሄ ስን አꬎፎ። ሄስ ዎጋን ባይናባ።

24 “ታኒ ህንተ ስንꬃፈ የደꬅያ ካዎተꬃት ሄ ኦሶታን ቱንዳ ግሾ፥ ህንተ ሄ ኦሶታን ኤንታ መላ ቱኖፕተ። 25 ሀር አቶሽን፥ ቢታይካ ቱንዳ ግሾ፥ እያ ናጋራ ግሾ ታ እያ ሴራስ። ቢትያ ባናን ደኤይ አሳ ጩታሱ። 26 ሽን ህንተ ታ ህግያነ ታ ኪታ ናግተ። ህንተና ግድን ዎይኮ ህንተ ግዶን ደእያ አላጋ ቢታ አሳ ግድን ኦንካ ሄሳ መላ ቱና ኦሶ ኦꬆፕተ።

27 “ህንተፈ ካሰ ሀ ቢታን ደእዳ አሳይ ሄሳ መላ ቱናባ ኦꬅዳ ግሾ፥ ቢትያ ቱናሱ። 28 ህንተ ሀ ቢታ ቱንስኮ፥ ህንተፈ ካሰ ደእዳ ካዎተꬃታ ሀ ቢትያ ጩትዳይሳዳ ህንተናካ ጩቶና መላ ናገትተ። 29 ሄሳታ ዳንያ ቱና ኦሶታፐ እሱዋካ ኦꬅያ አስ ደእኮ፥ ሄ ኡራይ ባ አሳ ግዶፈ ኩረቶ። 30 ሄሳ ግሾ፥ ህንተፈ ካሰ ደእዳ አሳት ኦꬅዳ ቱና ኦሶታ ኡባ ኦꬅድ ህንተ ቱኖና መላ ታ ኪታ ናግተ፤ ታኒ ጎዳ፥ ህንተ ፆሳ” ያግስ።