1 ጎዳይ ሙሰኮ ሀይሳዳ ያግስ። 2 እስራኤለ አሳ ኡባስ ሀይሳዳ ያጋዳ ኦዳ፤ “ታኒ፥ ጎዳይ፥ ህንተ ፆሳይ፥ ጌሽ ግድያ ግሾ፥ ህንተካ ጌሽ ግድተ።

3 “ህንተፈ እሶይ እሶይ ባ አዋነ ባ አይዉ ቦንቾ፤ ታ ሳምባታ ቦንችተ። ታኒ ጎዳ፥ ህንተ ፆሳ።

4 “ታና አግድ ኤቃታ ጎይኖፍተ፤ ዎይኮ ብራታፐ ኦሰትዳ ፆሳታ ህንተዉ ኦꬆፕተ። ታኒ ጎዳ፥ ህንተ ፆሳ።

5 “ህንተ እስፈተꬃ ያርሾ ጎዳስ ያርሽያ ዎደ ሄ ያርሾይ ህንተ ግሾ ኤከታና መላ በሰይሳዳ ያርሽተ። 6 ሄ ያርሾይ ህንተ ያርሽዳ ጋላስ ዎይኮ ዎንተꬃ ጋላስ ሜተቶ፤ ሄꬓንꬆ ጋላስ ጋካናዉ አትዳይ ደእኮ ታማን ፁገቶ። 7 ሄꬓንꬆ ጋላስ ሜተትኮ፥ ሄስ ቱንስያባ፤ ታኒ ሄሳ ኤክከ። 8 ሄሳ ምያ ኦንካ ጎዳስ ጌሽ ግድዳባ ቱንስዳ ግሾ ባ ናጋራን ኦይሸታና። ሄ ኡራይ ባ አሳ ግዶፈ ኩረቶ።

9 “ህንተ ጋደን ካፅዳ ካꬃ ህንተ ጫክያ ዎደ ጋድያ ጋፃ ጋካናዉ ደኤይሳ ጫኮፍተ፤ ጫክ ስምን ደእያ ፖሽልያ ቆሮፕተ። 10 ነ ዎይነ አይፍያ ማፅያ ዎደ ምꬃ ቦላ ቆሰትድ አትዳይሳ ዎይኮ ሳአን ዎꬍዳ ዎይነ አይፍያ ማፆፓ። ሄሳ ማንቆታስነ በተ አሳስ አጋጋ። ታኒ ጎዳ፥ ህንተ ፆሳ።

11 “ካይሶቶፕተ።

“ዎርዶቶፕተ።

“እሶይ እሱዋ ጭሞፍተ።

12 “ታ ሱንꬃን ዎርዶ ጫቆፍተ፤ ህንተ ፆሳ ሱንꬃ ቱንሶፕተ። ታኒ ህንተ ጎዳ።

13 “ነ ሾሩዋ ቦላ ገነ ኦꬆፋ፤ ዎይኮ እያ ቦንቆፋ።

“ኡነ ኦꬅያ ኡራ ዳሞዝያ ድጋዳ፥ እስ ቃማካ ነ ማታን አይሶፓ።

14 “ቱልያ ጫዮፓ፤ ዎይኮ ቆቅያ ስንꬃን ꬉበ ዎꬆፋ፥ ሽን ኔኒ ፆሳስ ያያ። ታኒ ነ ጎዳ።

15 “ፕርዳ ጌላዮፕተ፤ ማንቁዋ እያ ማንቆተꬃ ግሾ ማዳዳ ፕርዶፋ፤ ዱርያ እያ ዱረተꬃ ግሾ ያያዳ አጎፋ። ሽን ነ ሾሩዋስ ሱረ ፕርዳ።

16 “ነ አሳ ግዶን ኢታ ዝግርስ ኤካዳ ዩዮፓ።

“ነ ሾሩዋ ሀይቆስ ጋꬅያባ አይኮካ ኦꬆፋ። ታኒ ነ ጎዳ።

17 “ነ እሻ ነ ዎዛናን እፆፋ። ነ ሾሩዋ ጋሶን ነ ናጋራ ኦꬆና መላ እያ ሀንቃ።

18 “ሀሎ ከዮፓ፤ ነ አሳፐ እሱዋ ቦላካ ሽፎፓ። ሽን ነ ሾሩዋ ነ ሁጰዳ ዶሳ። ታኒ ነ ጎዳ።

19 “ታ ኪታታ ናጋ።

“እስ ቆሞ መሄ ሀራ ቆሞ መሄራ ብራይስሶፓ።

“እስ ሾቃን ናምኡ ቆሞ ዘረꬅ ዘሮፓ።

“ናምኡ ቆሞፈ ኦሰትዳ ማኦ ማኦፋ።

20 “እስ አስ አዝናስ ኦይሸታዳ ደእሽን፥ ዎዞ ሚሸይ እመትድ ዉሮናሽን ዎይኮ ላአ ከዮናሽን፥ ሄ አይለራ አቅኮ ኤንቲ ሴረታናዉ በሴስ፥ ሽን ኤንቲ ሀይቃናዉ በሰና። 21 ግዶሽን፥ ሄ ኡራይ ባ ናቆ ያርሾስ ግድያ ማራዘ ጌሻ ዱንካንያ ፐንገን ጎዳ ስን ኤሆ። 22 ካህነይ ሄ ናቆ ያርሾ ማራዝያ ኤክድ፥ ኡራ ናጋራ አቶተꬃስ ጎዳ ስንꬃን ያርሼስ፤ እያ ናጋራይ አቶ ጌተታና።

23 “ህንተ ካናነ ቢታ ገልያ ዎደ አይፈ እምያ አይ ቆሞ ምꬅ ቶክኮካ፥ ሄ ምꬃ አይፈይ ሜተቶና መላ ድገትዳይሳ አኬክተ። ሄꬑ ላይꬅ ዉራና ጋካናዉ ሄ ምꬃ አይፈይ ሜተቶፎ። 24 ኦይዳንꬆ ላይꬃን ሄ ምꬃ አይፈይ ጎዳስ ጋላታስ ሺቅያ ጌሻ ያርሾ ግዳና። 25 እቻሻንꬆ ላይꬃን ሄ ምꬃ አይፍያ ሚተ። ህንተ ሄሳዳ ኦꬅኮ፥ ህንተ ምꬃ አይፈይ ዳራና። ታኒ ጎዳ፥ ህንተ ፆሳ።

26 “ሱꬅ እያ ግዶን ደእያ አሾ ሞፕተ። ማሮቶፕተ ዎይኮ ብቶፕተ።

27 “ህንተ ሁጰ ብናና ጋርሳራ ዩሽ አꬅድ ጪሮፕተ፤ ህንተ ቡቻ ዩሽ አꬅድ ሜዶፕተ።

28 “ሀይቅዳ አሳ ግሾ ህንተ አሳተꬃ ጋሮፕተ፤ ዎይኮ ጫቻ ቤታ ህንተ አሳተꬃ ቦላ መꬎፍተ። ታኒ ነ ጎዳ።

29 “ቢትያ ላይማተꬃንነ ቱናተꬃን ኩሞና መላ ነ ማጫ ናእዉ ላይማተꬃስ አꬃ እማዳ ቱንሶፓ።

30 “ታ ሳምባታ ቦንችተ፤ ታ ጎይነትያ በሳ ቦንችተ። ታኒ ጎዳ።

31 “ሞይትለ ኦድስያ አሳኮ ዎይኮ ማሮታኮ ቦፕተ፤ ህንተ ቱኖና መላ ኤንታ ኮዮፕተ። ታኒ ጎዳ፥ ህንተ ፆሳ።

32 “ዶንꬓ አስነ ጭማ አስ በእያ ዎደ ኡትዳ በሳፈ ደንዳ ኤቃዳ ኤንታ ቦንቻ፤ ነ ፆሳስ ያያ። ታኒ ጎዳ።

33 “ህንተ ቢታን ደእያ በተ አሰ ሱጎፕተ። 34 ህንተ ቢታን ደእያ በተ አስ ህንተ ጋደ አሳዳ ፄልተ፤ እያ ህንተ ሁጰዳ ዶስተ። ህንተ ካሰ ግብፀ ቢታን በተ አስ ግድድ ደእደታ። ታኒ ጎዳ፥ ህንተ ፆሳ።

35 “ህንተ ዋꬍያባን፥ ማክያባንነ ምዛነን ዎርዶቶፕተ። 36 ህንተ ምዛነይ፥ ህንተ ማክያባይነ ዋꬍያባይ እስኖ ግዶ። ታኒ ህንተና ግብፀ ቢታፈ ከሳዳ ኤህዳ ጎዳ ህንተ ፆሳ።

37 “ህንተ ታ ህግያነ ታ ኪታ ኡባ ናግተነ ኦꬅተ። ታኒ ጎዳ።”