1 ጎዳይ ሙሰኮ ሀይሳዳ ያግስ፤ 2 ታ ጌሻ ሱንꬃ ኤንቲ ቱንሶና መላ፥ እስራኤለ አሳይ ታዉ ዱማይዳ እሞታታ አሮንነ እያ አደ ናይት ቦንቾን ኤክድ፥ ጌሻተꬃን ናጋና መላ ኤንታዉ ኦዳ። ታኒ ጎዳ።

3 ኤንታኮ ሀይሳዳ ያጋ፤ “ያና የለተꬃ ኡባን ህንተ ኮቻፈ ኦንካ ቱንድ ደእሸ፥ እስራኤለ አሳይ ጎዳስ ዱማይዳ ጌሻ ያርሹዋኮ ሺቅኮ፥ ሄ ኡራይ ታ ስንꬃን በንቶፎ። ታኒ ጎዳ።

4 “አሮና ኮቻፈ ጎጋ ሀርገይ ደእያ፥ ዎይኮ አሳተꬃፈ ጎግያባይ ደእያ ኦንካ ጌያና ጋካናዉ ጌሻ ያርሹዋ ሞፖ። አሀ ቦችድ ቱንዳባ ዎይኮ እያ አቱንꬃይ ጉክዳ ኡራ ቦችያ ኦንካ ቱና። 5 ቃስ ሳአራ ጎሸትያ ቱንስያባታ፥ ዎይኮ አይብባንካ ቱና ግድዳባ ቦችያ ኦንካ፥ 6 ዎይኮ ሄሳ መላባ ቦችያ ኦንካ፥ ኦማርስ ጋካናዉ ቱና ግዴስ። እ ባ አሳተꬃ ሃꬃን ሜጨቶና ደእሸ፥ ጌሻ ያርሹዋፈ ማናዉ ኮሸና። 7 አው ዉልያ ዎደ እ ጌሽ ግዴስ። ሄሳፈ ጉየ፥ ሄ ጌሻ ያርሹዋፈ ባና ጋክያ ግሹዋ ሞ። 8 ሀይቅዳባ ዎይኮ ዶእ ዎꬍዳ መሄ አሾ ሞፖ፤ ሄስ ቱንስያባ። ታኒ ጎዳ።

9 “ካህነት ታ ዎጋ ናጎ፤ ኤንቲ እያ ናጎና እፅድ ባንታ ባላን ሀይቃና። ኤንታ ጌሽያ ጎዳይ ታና።

10 “ሄ ጌሻ ያርሹዋ ካህንያ ሶ አሳፐ አትሽን፥ ሀራ አስ ሞፖ። ካህንያ ሶ ይዳ እማ ግድን፥ ቃፃረትድ ኦꬅያ አሰ ግድን ሞፖ። 11 ሽን ካህነይ ባ ብራን ሻምዳ አይለይ ዎይኮ እያ ሶን የለትዳ አይለይ ሄ ካꬃ ሞ። 12 ካህነ ግዶና አስ ገልዳ ካህንያ ናእያ ሄ ጌሻ ያርሹዋፈ ሞፖ። 13 ሽን እ አዝናይ ሀይቅኮ ዎይኮ እዮ የድኮ ቃስ እዉ ናእ ባይና እፅኮ፥ እያ ካሰ ባ ጌላኦተꬃን ደእዳይሳዳ ስማዳ ባ አዋ ሶን ደእኮ፥ እያ ባ አዋ ጋከይሳፈ ሞ። ሽን ሀራ አስ ኦንካ ሄሳፈ ሞፖ።

14 “እስ አስ ኤሮና ደእሸ ጌሻ ያርሹዋፈ ሚኮ፥ ሄ እ ምዳ ካꬃ ጋትያ ቦላ ፄታፐ ላታሙ ኩሸ ጉጅድ ካህንያስ እሞ። 15 እስራኤለ አሳይ ጎዳስ ያርሽያ ጌሻ ያርሹዋ ካህነት ቱንሶፖ። 16 ኤንቲ ባንታ ኤህዳ ጌሻ ያርሹዋ ባንታዉ ምድ ናጋራን ኦይሸታና መላ ኦꬆፎ። ኤንታ ጌሽያ ጎዳይ ታና።”

17 ጎዳይ ሙሰኮ ሀይሳዳ ያግስ፤ 18 “አሮናስ፥ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ እስራኤለ አስ ግድን ዎይኮ ኤንታ ግዶን ደእያ በተ አስ ግድን፥ ኦንካ ጎዳስ ፁሳ ያርሾ ባ ዶሳን እመይ ዎይኮ ባ ቃንገꬃ ጋይ፥ 19 ሄ ያርሾይ ኤከታና መላ ቦረይ ባይና ዎፋኖ፥ ዎይኮ ማራዘ ዎይኮ ኮለ ኤሆ። 20 ቦረይ ደእያ አይ መሄይካ ኤከቶና ግሾ ሄሳ ሺሾፕተ።

21 “እስ አስ ባ ቃንገꬃ ጋꬃናዉ እስፈተꬃ ያርሾ ጎዳስ ያርሽያ ዎደ ዎይኮ ባ መህያፐ ዶሳን እሞታ ጎዳስ ሺሽያ ዎደ ሄስ ኤከታና መላ ሄ መሄይ ቦረይ ባይናባ ግዶ። 22 ህንተ መህያፐ ቆቀ ዎይኮ መቆ ዎይኮ ዎበ ዎይኮ ግይያ ማዱንꬅ ዎይኮ ፑሶይ ዎይኮ ሻቶይ ደእያባ ጎዳስ ያርሾፍተ። ታማን ፁሳ ያርሾ ኦꬅድ ያርሾ በሳን ጎዳስ ሺሾፕተ። 23 እያ ቦላ ላቆይ መት ዎይኮ ቦላ ፓጭ ደእያ ኮርማ ዎይኮ ዶርሰ እስ አስ ባ ዶሳን እምያ ያርሾ ሺሻናዉ ዳንዳኤስ፤ ሽን ቃንገꬃ ጋሶስ ግድኮ ሄስ ኤከተና። 24 ሳንጋ ዎይኮ ማዱንፅዳባ ጎዳስ ያርሾፍተ። ህንተ ቢታን ሄሳ መላባ ኦꬆፕተ። 25 ህንተ ግዶን ደእያ አላጋ አሳታፐ ኤክዳ ሄሳ መላ መህያ ህንተ ፆሳስ ካꬃ ያርሾ ኦꬅድ ሺሾፕተ። ኤንታ ቦላ ቦረይ ደእያ ግሾ ህንተ ግሾ ኤከቶኮና።”

26 ጎዳይ ሙሰኮ ሀይሳዳ ያግስ፤ 27 “ቦራ ናእ ዎይኮ ማራዘይ ዎይኮ ኮለይ የለትያ ዎደ ላፑን ጋላስ ባ አየራ ጋምኦ። ሆስፑንꬃ ጋላሳፐ ዶምድ፥ ጎዳስ ፁሳ ያርሾ ኦꬅድ ሺሻናዉ ዳንዳኤቴስ። 28 ሚዝ ዎይኮ ዶርሰ እ ማራራ እስ ጋላስ ሹኮፍተ።

29 “ህንተ ጋላታ ያርሾ ጎዳስ ሺሽያ ዎደ ህንተ ያርሾይ ኤከታና መላ ያርሽተ። 30 ያርሾይ ያርሸትዳ ጋላስ ሜተትድ ዉራናዉ ኮሼስ፤ እያፐ ዎንቶስ አሾፍተ። ታኒ ጎዳ።

31 “ታ ኪታ ናግተነ ፖልተ። ታኒ ጎዳ። 32 ታ ጌሻ ሱንꬃ ቱንሶፕተ። ታ ጌሽ ግደይስ እስራኤለ አሳ ግዶን ኤረታናዉ በሴስ። ህንተና ጌሽያ ጎዳይ ታና። 33 ህንተ ፆሰ ግዳናዉ ህንተና ግብፀ ቢታፈ ከስዳይ ታና። ታኒ ጎዳ።”