1 ጎዳይ ሙሰኮ ሀይሳዳ ያግስ፤ 2 እስራኤለ አሳስ ሀይሳዳ ያጋዳ ኦዳ፤ ጌሻ ሺቆ ያግድ አዋጅሸ፥ ህንተ ቦንቻናዉ በሲያ ኤረትዳ ጎዳ ባለት ሀይሳታ።

3 ህንተ ኡሱፑን ጋላስ ኦሶ ኦꬄታ፥ ሽን ላፑንꬃ ጋላሳይ ህንተ ሸምፕያ ሳምባታ ጋላስ። ሄ ጋላስ ጌሻ ሺቆ ሺቅተ፤ አይ ኦሶካ ኦꬆፕተ፤ ህንተ ደእያ በሳ ኡባን ሄስ ጎዳስ ሳምባታ።

4 ኤንታ ዎደን ዎደን ጌሻ ሺቆ ኦꬅድ ህንተ ቦንቻናዉ በሲያ ኤረትዳ ጎዳ ባለት ሀይሳታ፤ 5 ኮይሮ አጌናን ታማነ ኦይዳንꬆ ጋላስ ሳእ ኦማርስያ ዎደ ጎዳ ፓስካይ ዶሜስ።

6 ሄ አጌናን ታማነ እቻሻንꬆ ጋላሳን ጎዳስ ኡይꬃ ባኣለ ጋላሳይ ዶሜስ። ሄሳ ግሾ ላፑን ጋላሳታን እርሾይ ገልቦና ኡይꬅ ሚተ። 7 ሄ ጋላሳታፐ ኮይሮ ጋላስ ጌሻ ሺቆ ሺቅተ፤ ኦሶ ኦꬆፕተ። 8 ላፑን ጋላስ ኡባ ጎዳስ ፁሳ ያርሾ ያርሽተ፤ ላፑንꬃ ጋላሳን ጌሻ ሺቆ ሺቅተ፤ ኦሶ ኦꬆፕተ።

9 ጎዳይ ሙሰኮ ሀይሳዳ ያግስ፤ 10 እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ገልድ ህንተ ካꬅ ጫክያ ዎደ፥ ሄ ካꬃ ኮይሮ ምርቅያ ካህንያስ ኤህተ። 11 ጎዳይ ህንተባ ኤካና መላ ሳምባታ ካልያ ዎንተꬃ ጋላስ ካህነይ ሄ ምርቅያ ጎዳ ስንꬃን ꬎቁ ኦꬅድ ዩሾ። 12 ህንተ ምርቅያ ዩሽዳ ሄ ጋላስ ቦረይ ባይና እስ ላይꬃ ማራዘ ፁሳ ያርሾ ኦꬅድ ጎዳስ ሺሽተ። 13 ሄ ያርሹዋራ እስፈ ሻማሆ ዛይተራ ሙኑቀትዳ ናምኡ ክሎ ግራመ ሎኦ ꬊለ ካꬃ ያርሾ ኦꬅድ ሺሽተ። ሄስ ጎዳስ ሳዎ ቶንኩ ግያ ፁሳ ያርሾ ግዳና፤ እያራ እስፈ እስ ልትሮ ግድያ ዎይነ ኡሽ ሺሽተ። 14 ሀ ያርሹዋ ህንተ፥ ህንተ ፆሳስ ሺሽያ ጋላሳይ ጋካናዉ፥ ዋቻ ካꬃፈ ቃየ ዎይኮ ጫጫ ዎይኮ ኡክድ ሞፕተ። ሄስ ህንተ ደእያ በሳ ኡባን ያና የለተꬃስ መርና ዎጋ ግዶ።

15 ህንተ ዩሾ ያርሾ ምርቅያ ኤህዳ ሳምባታ ዎንተꬃ ጋላሳፐ ዶምድ፥ ላፑን ሳምንታ ታይብተ። 16 ላፑንꬃ ሳምባታ ካልያ ዎንተꬃ ጋላሳይ ጋካናዉ እሻታሙ ጋላስ ታይብተ፤ ዋቻ ካꬃፈ ያርሾ ጎዳስ ሺሽተ። 17 ህንተ ደእያ በሳፈ ናምኡ ክሎ ግራመ ግድያ ሎኦ ꬊልያን እርሾ የግድ ኡክዳ ናምኡ ኡይꬅ ዩሾ ያርሾስ ኤክድ ዪተ። ሄስ ዋቻ ካꬃፈ ጎዳስ ሺቅያ ያርሾ ግዴስ። 18 ሄ ኡይꬃራ እስፈ ቦረይ ባይና እስ ላይꬅ ግድዳ ላፑን ዶርሳ ኡርገታ፥ እስ ዎፋኖነ ናምኡ ማራዘታ ሺሽተ። ኤንታ ካꬃ ያርሾራነ ኡሻ ያርሾራ እስፈ ጎዳስ ፁገትያ ሳዎ ቶንኩ ግያ ያርሾ ኦꬅድ ያርሽተ። 19 ቃስ እስ ኮለ ናጋራ ያርሾስ፥ እስ ላይꬅ ግድዳ ናምኡ ዶርሳ ኡርገታ እስፈተꬃ ያርሾስ ሺሽተ።

20 ካህነይ ባይራ ካꬃ፥ ኡይꬃነ ናምኡ ዶርሳ ኡርገታ ዩሾ ያርሾ ኦꬅድ፥ ጎዳ ስንꬃን ꬎቁ ኦꬅድ ዩሾ። ሄሳት ጎዳስ ጌሽ፤ ካህነታስ ቃስ ግሾ። 21 ሄ ጋላስ ህንተዉ ጌሻ ሺቆ ግዳና መላ አዋጅተ፤ ኦሶ ኦꬆፕተ። ሀይስ ህንተ ደእያ በሳ ኡባን ያና የለተꬃስ መርና ዎጋ ግዶ።

22 ህንተ ቢታን ካፅዳ ካꬃ ጫክያ ዎደ ጋድያ ጋፃ ጋካናዉ ጫኮፍተ፤ ጫክሽን አትዳ ፖሽልያ ቆሮፕተ፤ ሄሳ ማንቆታስነ በተ አሳስ አጋግተ። ታኒ ጎዳ ህንተ ፆሳ።

23 ጎዳይ ሙሰኮ ሀይሳዳ ያግስ፤ 24 እስራኤለ አሳስ ሀይሳዳ ያጋዳ ኦዳ፤ ላፑንꬃ አጌናን ኮይሮ ጋላሳ ሸምፖ ጋላስ ኦꬅድ ቦንችተ፤ ሀሳይሶ ሞይዘ ፑንሸ ጌሻ ሺቆ ሺቅተ። 25 ሄ ጋላስ ጎዳስ ፁሳ ያርሾ ሺሽተፐ አትሽን፥ ኦሶ ኦꬆፕተ።

26 ጎዳይ ሙሰኮ ሀይሳዳ ያግስ፤ 27 ላፑንꬃ አጌናን ታማንꬆ ጋላሳይ ናጋራ አቶተꬃ ጋላስ፤ ሄ ጋላስ ጌሻ ሺቆ ሺቅተ። ሄ ጋላስ ህንተና ካዉሽተ፤ ጎዳስ ፁሳ ያርሾ ሺሽተ። 28 ሄ ጋላሳይ ጎዳ ህንተ ፆሳ ስንꬃን ህንተ ናጋራይ ቁሸታና መላ ህንተ ናጋራ አቶተꬃ ጋላስ ግድያ ግሾ ሄ ጋላሳን ኦሶ ኦꬆፕተ። 29 ሄ ጋላስ ባናተꬃ ካዉሾና አስ ኦንካ ባ አሳ ግዶፈ ኩረቶ። 30 ሄ ጋላስ ኦሶ ኦꬅያ ኡራ ኦናካ ታኒ እያ አሳ ግዶፈ ኩራና። 31 ሄ ጋላስ ኦሶ ኦꬆፕተ። ሀይስ ህንተ ደእያ በሳ ኡባን ያና የለተꬃስ መርና ዎጋ ግዶ። 32 ሄስ ህንተዉ ዱማትዳ ሸምፖ ጋላስ፤ ሄ ጋላስ ህንተናተꬃ ካዉሽተ። ሄ አጌናን ኡዱፉንꬆ ጋላስ ኦማርሳፈ ዶምድ፥ ታማንꬃ ጋላስ ኦማርስ ጋካናዉ ህንተ ሳምባታ ቦንችተ።

33 ጎዳይ ሙሰኮ ሀይሳዳ ያግስ፤ 34 እስራኤለ አሳስ ሀይሳዳ ያጋዳ ኦዳ፤ ላፑንꬃ አጌናን ታማነ እቻሻንꬆ ጋላሳፐ ዶምድ፥ ላፑን ጋላስ ጋካናዉ ጎዳስ ሻቃራ ባኣለ። 35 ሄ ጋላሳታፐ ኮይሮ ጋላሳን ጌሻ ሺቆ ሺቅተ፤ ኦሶ ኦꬆፕተ። 36 ላፑን ጋላስ ኡባን ጎዳስ ፁሳ ያርሾ ሺሽተ፤ ሆስፑንꬆ ጋላሳን ጌሻ ሺቆ ሺቅተ። ጎዳስ ፁሳ ካꬃ ያርሾ ሺሽተ። ሄ ጋላሳይ ባልያ ዉርሰꬃ ጋላስ ግድያ ግሾ፥ ኦሶ ኦꬆፕተ።

37 ፁሳ ያርሾ፥ ካꬃ ያርሾ፥ ሀራ ያርሾታነ ኡሻ ያርሾ ኮሽያ ዎደን ጎዳስ ሺሻናዉ ጌሻ ሺቆ ኦꬅድ አዋጃና ጎዳ ባለት ሀይሳታ። 38 ሀ ያርሾት ጎዳ ሳምባታታፐ፥ ጎዳስ እምያ እሞታታፐ፥ ቃንገꬃ እሞታታፐነ ዶሳን እምያ እሞታታፐ ዱማ።

39 ህንተ ጋደን ካፅዳ ካꬃ ሺሽዳፐ ጉየ፥ ታማነ እቻሻንꬆ ጋላሳፐ ዶምድ ላፑን ጋላስ ጋካናዉ ጎዳ ባኣለ ቦንችተ። ኮይሮ ጋላሳይነ ሆስፑንꬆ ጋላሳይ ህንተዉ ዱማ ሸምፖ ጋላስ ግዳና። 40 ኮይሮ ጋላስ ሎኦ ምꬃ አይፈ፥ ዛምባ ታሸ፥ ጭልኦ ምꬃ ሀይነ ሻፋ ጋፃን ድጭያ ምꬃ ሀይꬅ ኤክድ፥ ጎዳ ህንተ ፆሳ ስንꬃን ኡፋይትሸ ላፑን ጋላስ ባኣለ ቦንችተ። 41 ሄ ባልያ ላይꬃን ላይꬃን ላፑንꬃ አጌናን ላፑን ጋላስ ጎዳ ቦንችተ። ሄስ ያና የለተꬃስ መርና ዎጋ ግዶ። 42 ሄ ላፑን ጋላሳ ሻቃራን ደእተ፤ እስራኤለ አስ ግድዳ ኡባይ ሄ ሻቃራን ደኦ። 43 ታኒ ህንተና ግብፀ ቢታፈ ከስዳ ዎደ ሻቃራን ዳና መላ ኦꬅዳይሳ ያና የለተꬃይ ኤራና። ታኒ ጎዳ ህንተ ፆሳ።

44 ሄሳዳ ኦꬅድ፥ ሙሰይ ጎዳ ባለታ ቦንችያ ዎጋ እስራኤለ አሳስ ኦድስ።