1 ሲና ዙማ ቦላ ጎዳይ ሙሰኮ ሀይሳዳ ያግስ። 2 ኔኒ እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ህንተ ገልያ ዎደ ቢትያ ባ ሁጰን ጎዳ ሳምባታ ቦንቾ። 3 ኡሱፑን ላይꬅ ኩመꬅ ህንተ ጋደን ዘርተ፤ ኡሱፑን ላይꬅ ኩመꬅ ህንተ ዎይነ ፄራ ፁንቅተ፤ እያ አይፍያ ማፅተ። 4 ሽን ላፑንꬃ ላይꬃይ ቢታስ ሸምፖ ሳምባታ፤ ሄስ ጎዳ ሳምባታ። ሄ ላፑንꬃ ላይꬃን ጋደን ዘሮፕተ፤ ህንተ ዎይነ ፄራ ፁንቆፍተ። 5 ህንተ ቢታን አሰቦ ካፅዳባ ሺሾፕተ፤ ዎይነ ፄራ ፁንቆፍተ፤ አይፍያ ማፆፕተ። ሄ ላይꬃይ ቢታስ ኩመꬅ ሸምፖ ላይꬅ ግዶ። 6 ሄ ሳምባታ ላይꬃን ቢታይ ኦሰቶና ደእሽን ካፅያ ካꬃ ኔኒ፥ ነ አደ አይለይ፥ ነ ማጫ አይለይ፥ ነ ሶን ኡነ ኦይ፥ ጉꬃ ዎደስ ደእያ በተ አስ ማናዉ ዳንዳኤስ። 7 ሄሳዳካ፥ ነ መህያስነ ነ ቢታን ደእያ ዶአታስ ግድያ ካꬅ ደማና፤ ቢታን ካፅያባ ኡባይ ሜተቶ።

8 ላይꬃታስ ግዶን ደእያ ላፑን ሳምባታታ ታይባ፤ ላፑን ሳምባታታስ ላይꬃ ታይቦይ ላፑን ቶሆ ላፑና፤ ሄስካ ኦይታማነ ኡዱፉን ላይꬅ። 9 ላፑንꬃ አጌናን፥ ታማንꬆ ጋላስ ቦንቸትያ ናጋራ አቶተꬃ ጋላሳን ሞይዘ ፑንያ አስ ቢታ ኡባ ኪታ። 10 እሻታማንꬆ ላይꬃ ዱማይድ፥ ሄ ቢታን ደእያ ኡባስ ላአተꬅ አዋጅተ። ሄስ ህንተዉ እሻታማንꬆ ላይꬃ ባኣለ። ሄ ዎደ ህንተ ኡባይ ህንተ ጋድያኮነ ህንተ ሶ አሳኮ ስምተ። 11 ሄ ላይꬃይ ህንተዉ እሻታማንꬆ ላይꬃ ባኣለ። ሄ ላይꬃን ዘሮፕተ፤ አሰቦ ካፅዳባ ጫኮፍተ፤ ፄራ ፁንቆና አይፍዳ ዎይነ አይፍያ ማፆፕተ። 12 ሄስ እሻታማንꬆ ላይꬃ ባኣለ ግድያ ግሾ እ ህንተዉ ጌሽ፤ ጎዮና ጮ ደንባን ካፅዳባ ሚተ።

13 ሄ እሻታማንꬆ ላይꬃ ባኣለ ዎደ አስ ኡባይ ባ ጋደ ስሞ።

14 ህንተ፥ ህንተ ሾሩዋፐ ጋደ ሻምኮ ዎይኮ እያዉ ባይዝኮ እሶይ እሱዋ ጭሞፍተ። 15 ህንተ እሻታማንꬆ ላይꬃ ባልያፐ ጉየ ደእያ ላይꬃታ ታይቡዋን ህንተ ሾሩዋፐ ሻምተ። ህንተ ሾሮይ ጋደይ ካꬅ እማናዉ ደእያ ላይꬃታ ታይቡዋዳ ባይዞ። 16 ላይꬃ ታይቦይ ዳሮ ግድኮ ጋተይ ዳሬስ፤ ላይꬃታ ታይቦይ ጉፅኮ ጋተይ ጉፄስ። ጋድያ ሎኦተꬃዳ ህንተ ሾሮይ ህንተዉ ባይዜስ። 17 ህንተ እሶይ እሱዋ ጭሞፍተ፤ ሽን ህንተ፥ ህንተ ፆሳ ያይተ። ታኒ ጎዳ፥ ህንተ ፆሳ።

18 ህንተ ሀ ቢታን ሳሮ ዳና መላ ታ ኪታ ፖልተ፤ ታ ህግያ ናግተ። 19 ቢታይ ባ አይፍያ ህንተዉ እምን ህንተ ካላና ጋካናዉ ማና፤ ሄ ቢታን ህንተ ሳሮ ዳና። 20 ሄኮ፥ ኑኒ ዘሮና አግድ፥ ቃስ ካꬅ ሺሾና አግድ፥ ላፑንꬃ ላይꬃን አይ ማኔ? ጊኮ፥ 21 ታኒ ኡሱፑንꬆ ላይꬃን ታ አንጁዋ ህንተዉ ኪታና፤ ቢታይ ሄꬑ ላይꬃስ ግድያ ካꬅ እማና። 22 ሆስፑንꬃ ላይꬃን ህንተ፥ ህንተ ቢታን ዘርያ ዎደ ሻቻ ካꬃ ማና። ህንተ ዘርያ ካꬃ ኡዱፉንꬆ ላይꬃን ሺሻና ጋካናዉ ሻቻ ካꬃ ማና።

23 ቢታይ ታባ ግድያ ግሾነ ህንተ ሄ ቢታን እማነ በተ ግድድ ደእያ ግሾ ቢታ ስሞናዳ ኦꬅድ ባይዞፕተ። 24 ህንተ ኦይክዳ ጋድያ ጎዳት፥ ዎዛና ማታይ እስራኤለ ኡባን ናገታናዉ በሴስ።

25 እስ እስራኤለ አስ ማንቅድ ባ ጋድያፐ ባይዝኮ፥ እያ ማታ ዳቦይ ሄ ጋድያ እያዉ ዎዞ። 26 እያው ሄ ጋድያ ዎዝያ ዳቦይ ꬋይኮ፥ እ ዎንቶ ዱረትድ ዎዝያ ሚሸ ደምኮ ዛሪድ ዎዛናዉ ዳንዳኤስ። 27 ባ ባይዝዳ ዎደፐ ዶምድ ደእያ ላይꬃ ታይብድ፥ አትዳ ላይꬃ ሚሽያ ሻምዳይሳስ ዛሮ፤ ያትድ እ ባ ጋድያ ስሞ። 28 ሽን እያዉ ሄ ጋድያ ዎዛናዉ ግድያ ሚሸይ ꬋይኮ፥ እሻታማንꬆ ላይꬃ ባለይ ጋካናዉ ጋደይ ሻምዳ ኡራ ኩሸን ጋምኦ። እሻታማንꬆ ላይꬃ ባኣለ ዎደ እያ ጋደይ እያዉ ስሞ።

29 እስ አስ ግምበትዳ ካታማ ግዶን ደእያ ኬ ባይዝኮ፥ እ ባይዝዳ ዎድያፐ ብድ እስ ላይꬅ ኩማና ጋካናዉ ዛሪድ ዎዛናዉ ዳንዳኤስ። 30 ሽን እስ ላይꬃ ግዶን ዎዛናዉ ዳንዳኤቶና እፅኮ፥ ሄ ግምበትዳ ካታማ ግዶን ደእያ ኬꬃይ ሻምዳ ኡራስነ እያ ኮቻስ ግዴስ። እሻታማንꬆ ላይꬃ ባኣለ ዎደ ስመና። 31 ሽን ግምበትቦና ሄራን ደእያ ኬꬃት ጋደ መላ ዎዘቶሶና። እሻታማንꬆ ላይꬃ ባኣለ ዎደ ባይዝዳይሳስ ስሞሶና።

32 ግዶሽን፥ ሌወት ካታማታን ደእያ ባንታ ኬꬃ ባንታ ኮይዳ ዎደ ዎዛናዉ ዳንዳኦሶና። 33 ሌወታፐ እስ አስ ኤንታ ካታማ ግዶን ደእያ ኬꬃ ባይዝድ ዎዛናዉ ፆነትኮ፥ ሄ ኤንታ ካታማ ግዶን ደእያ ኬꬃይ እሻታማንꬆ ላይꬃ ባልያ ዎደ ስሜስ። ሌወታ ካታማ ግዶን ደእያ ኬꬃይ እስራኤለ አሳ ግዶን ሌወታሳ። 34 ሽን ኤንታ ካታማ ዩሹዋን ደእያ ሄንꬃ ቢታይ ኤንታዉ መርና አቆ ግድያ ግሾ ባይዘተና።

35 እስ እስራኤለ አስ ማንቅድ ባና አይሳናዉ ፆነትኮ፥ እማꬃዳ ዎይኮ በተ አሳዳ እ ኔራ ዳና መላ ማዳ። 36 እያ ኔራ ዎꬃናዉ እያፐ የሎ ኤኮፋ ዎይኮ ዎ ሞፓ። ሽን ነ ፆሳ ያያ። 37 ነ ብራ እያዉ የሎራ ታልኦፋ፤ ነ ካꬃ እያዉ ዎራ ባይዞፓ። 38 ህንተዉ ካናነ ቢታ እማናዉነ ህንተ ፆሳ ግዳናዉ፥ ህንተና ግብፀ ቢታፈ ከስዳ፥ ታኒ፥ ጎዳ ህንተ ፆሳ።

39 እስ እስራኤለ አስ ማንቅድ፥ ባና ነዉ አይለ ኦꬅድ ባይዝኮ እያ አይለዳ ኦስሶፓ። 40 እ በተ አሳዳ ኡነ ኦꬅድ እሻታማንꬆ ላይꬃ ባለይ ጋካናዉ ኔራ ደኦ። 41 ሄ ዎደ እ ባ ናይታራ እስፈ ነ ሶፐ ከይድ ባ ሶ አሳኮ ቦ፤ ባ አዋ ጋደ ስሞ። 42 እስራኤለ አሳይ ታኒ ግብፀ ቢታፈ ከስዳ ታ አይለ ግድያ ግሾ ኤንቲ አይለተꬃስ ባይዘቶፎ። 43 ኔኒ ኤንታ ኡንኤꬃዳ ሃሮፓ፤ ሽን ኔኒ፥ ነ ፆሳ ያያ።

44 ነዉ አደነ ማጫ አይለይ ዳና መላ ኮይኮ፥ ነ ዩሹዋን ደእያ ካዎተꬃታፐ ሻማ። 45 ህንተ ቢታን ደእያ በተ አሳ ናይታ ሻማናዉ ዳንዳኤታ። ህንተ ቢታን ደእሸ የለትዳ ኤንታ ሶ አሳፐ ህንተዉ ሻሎ ኦꬃናዉ ዳንዳኤታ። 46 ህንተፈ ጉየ፥ ህንተ ናይት ኤንታ መርናዉ ላታና መላ ህንተ ናይታስ እምተ። ህንተ ኤንታ ኡባ ዎደ ህንተ አይለ ኦꬃናዉ ዳንዳኤታ፤ ሽን እስራኤለ አስ ኡንኤꬅድ ሃሮፕተ።

47 ነ ማታን ደእያ እማꬅ ዎይኮ በተ አስ ዱረትኮ፥ እያ ማታን ደእያ እስራኤለ ኡራይ ማንቅድ፥ ነ ማታን ደእያ እማꬃስ ዎይኮ በተ ኡራስ ዎይኮ እማꬃ አድያ ኮቻፈ እሱዋስ ባና ባይዝኮ፥ 48 እ ባይዘትድ ስምን፥ እያ ዎዛናዉ ዳንዳኤቴስ፤ እያ ዳቦታፐ እሶይ እያ ዎዞ። 49 እያ አዋ እሻይ፥ ዎይኮ እያ አዋ እሻ ናአይ ዎይኮ እያ ያራፐ ማታ ዳቦይ እያ ዎዞ፤ ዎይኮ እ ባ ሁጰን ዱረትድ ባና ዎዞ። 50 እ ባና ሻምዳ ኡራራ ግድድ፥ እ ባና ባይዝዳ ላይꬃፈ ዶምድ እሻታማንꬆ ላይꬃ ባለይ ጋካናዉ ደእያ ላይꬃታ ታይቦ። እያ ላአተꬃ ጋተይ፥ ሄ ላይꬃ ታይቡዋ ኬና ግዶ። እ ባና ሻምዳይሳራ ጋምእዳ ዎድያ ጋተይ እስ አስ ኡነ ኦꬅድ ደምያ ሚሽያራ ግና ግዶ። 51 እሻታማንꬆ ላይꬃ ባለይ ጋካናዉ ዳሮ ላይꬅ አትዳባ ግድኮ፥ ባ ባይዘትዳ ጋትያፐ ሄ ላይꬃ ታይቦን ባና ዎዝያ ጋትያ ቃንፆ። 52 እሻታማንꬆ ላይꬃ ባለይ ጋካናዉ አትዳ ላይꬃይ ጉꬃ ግድኮ፥ ባና ሻምዳይሳራ እስፈ ታይብድ፥ ሄ ላይꬃ ታይቦን ባና ዎዝያ ጋትያ ቃንፆ። 53 እ ላይꬃን ላይꬃን ኡነ ኦꬅያ አሳዳ ባና ሻምዳይሳራ ደኦ፤ እያ ጎዳይ እያ ኡንኤꬅድ ሃራናዉ በሰና።

54 ሽን እ ሄሳ መላ ሀኖን ዎዘቶና እፅኮ፥ እሻታማንꬆ ላይꬃ ባለይ ጋክያ ዎደ እነ እያ ናይት አይለተꬃፈ ከዮ። 55 እስራኤለ አሳይ፥ ታ ግብፀ ቢታፈ ከስዳ ታ አይለ። ታኒ፥ ጎዳ ህንተ ፆሳ።