1 ጎይናናዉ ኤቃታ ኦꬆፍተ፤ ቃስ ሀዉልተ ዎይኮ ኤቃ ቱሱ ዎይኮ ሹቻ ኤቃ ኤሶፍተ። ታኒ ጎዳ፥ ህንተ ፆሳ። 2 ታ ሳምባታታ ናግተ፤ ታ ጎይኖ በሳ ቦንችተ። ታኒ ጎዳ።

3 ህንተ ታ ህግያ ካልኮነ ታ ኪታ ናግኮ፥ 4 ታኒ ህንተዉ እራ ዎደን ዎደን እማና፤ ቢታይ ካꬃ ዳርስድ ዶልሳና፤ ጋደን ደእያ ምꬃይ አይፋና። 5 ህንተ ካꬃ ሺሽድ ኦንጎና ደእሽን ዎይነ ማፅያ ዎደይ ጋካና፤ ዎይንያ ማፅድ ዉርሶና ካꬃ ዘርያ ዎደይ ጋካና። ህንተ ካላና ጋካናዉ ካꬅ ማና፤ ህንተ፥ ህንተ ቢታን ሳሮ ዳና።

6 ታኒ ቢታስ ሳሮተꬅ እማና፤ ኦንካ ህንተና ያሽሶና ህንተ ዝንአና። ኢታ ዶአታ ታኒ ቢታፈ ꬋይሳና፤ ህንተ ቢታን ናምአንꬆ ኦል ደንደና። 7 ህንተ ሞርከታ ህንተ የደꬃና፤ ኤንቲ ህንተ ስንꬃን ማሻን ሀይቃና። 8 ህንተፈ እቻሻይ ፄታ የደꬃና፤ ቃስ ፄታይ ታሙ ሙኩላ የደꬃና። ህንተ ሞርከት ህንተ ስንꬃን ማሻን ሀይቃና።

9 ታኒ ህንተና ማሮታ አይፈን በአና፤ ህንተና አይፍሳና፤ ህንተና ዳርሳና፤ ታኒ ታ ጫቁዋ ህንተራ ምንꬃና። 10 ህንተ ሻቻ ካꬃ ምድ ዉርሶና ደእሸ፥ ዋቻ ካꬃ ዎꬃናዉ፥ ሻቻ ካꬃ ድግድ በሰ ጊግሳና። 11 ታኒ ታ ደእያ በሳ ህንተ ግዶን ኦꬃና፤ ታኒ ህንተና እፅከ። 12 ታኒ ህንተ ግዶን ሄመታና፤ ህንተ ፆሳ ግዳና፤ ህንተ ታ አሰ ግዳና። 13 ህንተ ግብፀታስ አይለ ግዶና መላ ሄ ቢታፈ ህንተና ከስዳ ጎዳይ፥ ታኒ ህንተ ፆሳ። ታኒ ህንተ አይለተꬃ ቃምባራ መንꬃስ፤ ህንተ ꬎቁ ግድ ሄመታና መላ ኦꬃስ።

14 ሽን ህንተ ታና ስኦና እፅኮነ፥ ታ ኪታ ፖሎና እፅኮ፥ 15 ታ ዎጋ ካꬍኮ፥ ታ ኪታ ኡባ ፖሎና እፅድ ታ ጫቁዋ መንꬃናዉ ታ ህግያ ቦርኮ፥ 16 ሄ ዎደ ታኒ ህንተ ቦላ ሀይሳ ኦꬃና፤ ህንተ አኬኮና ደእሽን ያሽ፥ ግልቃተꬅ፥ ህንተ አይፍያ ተልጁምስያነ ህንተ አሳተꬃ መልስያ ምሻ ሀርገ ህንተ ቦላ የዳና። ህንተ ሞርከት ማና ግሾ ህንተ ዘርያ ዘረꬃይ መላ ግዳና። 17 ታ ህንተና ኢታ አይፈን ፄላና፤ ህንተ ሞርከታ ስንꬃን ህንተ ኩንዳና፤ ህንተና እፀይሳት ሃራና፤ ኦንካ የደꬆና ህንተ ባቃታና።

18 ሄሳ ኡባ ኦꬅንካ ህንተ ታና ስኦና እፅኮ፥ ታኒ ህንተ ናጋራ ግሾ ህንተ ሴራ ላፑን ዳኮ ኦꬃና። 19 ታ ህንተ ኦቶሩዋ መንꬃና፤ ሳሉዋ ብራታ፤ ሳአ ናሰ ብራታ ኦꬃና። 20 ህንተ ቢታይ ካꬅ፥ ህንተ ምꬃይ አይፈ እሞና ግሾ ህንተ ዎልቃይ ጮ በሳን ዉራና።

21 ህንተ ታዉ እፃስ ጊኮነ ታና ስኦና እፅኮ፥ ህንተ ናጋራ መላ ላፑን ዳኮ ጋዶ ታኒ ህንተ ቦላ ኤሀና። 22 ታኒ ህንተ ቦላ ባዞ ዶአታ የዳና፤ ኤንቲ ህንተ ናይታ ቦንቃና። ህንተ መሄታ ꬋይሳና፤ ህንተ ታይቡዋ ጉꬃና፤ ሄሳ ጋሶን ህንተ ሄመትያ ኦገይ ሁሳታና።

23 ሄ ሴራ ኡባን ህንተ ታኮ ስሞና እፅኮ፥ 24 ሄ ዎደ ታካ ህንተዉ እፃስ ጋና። ህንተ ናጋራ ግሾ ታኒ ታ ሁጰን ህንተና ላፑን ዳኮ ሴራና። 25 ታ ጫቁዋ ህንተ መንꬅዳ ግሾ፥ ኩሸ ዛራናዉ ማሻ ህንተ ቦላ ኤሀና። ህንተ፥ ህንተ ካታማታን ሺቅኮካ፥ ታኒ ህንተ ቦላ ጋዶ የዳና። ህንተ፥ ህንተ ሞርከታ ኩሸን አꬍድ እመታና። 26 ህንተ ካꬃ ታኒ ꬋይስያ ዎደ ታሙ ማጫሳት እስ በሸን ኡይꬁ ኡካና፤ ሄ ኡይꬃ ምዛነን ሻክድ ኤካና፤ ህንተ ሄሳ ማና ሽን ካለከታ።

27 ሀ ኡባን ህንተ ታና ስኦና እፅኮነ ህንተ ኢታተꬃን ጉጅድ ቢኮ፥ 28 ታ ህንተ ቦላ ሀንቆን ደንዳና። ህንተ ናጋራ ግሾ ታኒ ህንተና ላፑን ዳኮ ሴራና። 29 ህንተ፥ ህንተ አደ ናይታነ ህንተ ማጫ ናይታ አሹዋ ማና። 30 ታኒ፥ ህንተ ꬎቃ ጎይኖ በሳታ ꬋይሳና፤ ህንተ እፃነ ያርሽያ በሳ ላላና። ታኒ ህንተ አሀ ህንተ ኤቃታ አሀ ቦላ ሆላና፤ ታኒ ህንተና ፖሎ እፃና። 31 ታኒ ህንተ ካታማታ ባይሳ ኦꬃና፤ ህንተ ጎይኖ በሳታ ꬋይሳና፤ ህንተ ሳውያ ያርሹዋ ስንግከ። 32 ታኒ ህንተ ቢታ ꬋይሳና፤ ሄ ቢታን ደእያ ሞርከት ሄሳን ማላለታና። 33 ታኒ ህንተና ካዎተꬃታ ግዶን ላላና፤ ህንተ ቦላ ታ ማሻ ሾዳና። ህንተ ቢታይ ባይሳታና፤ ህንተ ካታማት ላለታና። 34 ህንተ ሞርከታ ቢታን ደእያ ዎደ፥ ባይሳ ጊግድ ደእያ ህንተ ቢታይ ባ ሳምባታ ቦንቻና። ሄ ዎደ ህንተ ቢታይ ሸምፓናነ ባ ሳምባታ ቦንችሸ ኡፋይታና። 35 ህንተ ሄ ቢታን ደእያ ዎደ ሳምባታታን ደምቦና ሸምፑዋ ሀእ ባይሳ ግድዳ ዎደ ደማና።

36 ህንተ ድኤትድ ብያ ዎደ ጉየ አትዳ አሳታ ዎዛናን ያሽ የዳና፤ ጫርኮይ ቃꬅያ ቦንጮ ግርሳይ ኤንታ ዳጋንꬃና፤ ኤንቲ ማሻፈ ባቃትያ መላ ባቃታና፤ ኤንታ ኦንካ የደꬆና ኩንዳና። 37 ኦንካ የደꬆና ኦላፐ ባቃትያዳ ባቃትሸ፥ እሶይ እሱዋራ ꬉበትድ ኩንዳና። ህንተ፥ ህንተ ሞርከታ ስንꬃን ኤቃናዉ ህንተዉ ዎልቅ ꬋያና። 38 ካዎተꬃታ ግዶን ህንተ ꬋያና፤ ህንተ ሞርከታ ቢታን ህንተ ምተትድ ꬋያና። 39 ሞርከታ ቢታን አትዳይሳት ባንታ ናጋራ ግሾነ ባንታ አዋታ ናጋራ ግሾ ግልቅድ ꬋያና።

40 ሽን ኤንቲ ባንታ ናጋራነ ታ ቦላ ማካልድ ስኦና እፅዳ ባንታ አዋታ ናጋራ ፓፅኮ፥ 41 ታ ኤንታ እፃናዳነ ኤንታ ሞርከታ ቢታ የደꬃናዳ ኦꬅዳ ባንታ ናጋራ አግኮነ ኤንታ ኪተቶና ዎዛናይ ስምኮ፥ 42 ታኒ ያይቆባራ፥ ይሳቃራነ አብራሃመራ ጫቅዳ ጫቁዋ ሀሳያና፤ ኤንታ ቢታ ዛራ ቆፓና። 43 ኤንታ ቢታይ ባይሳ አታና፤ ሄ ኤንቲ ꬋይን ባይሳ ግድድ ደእዳ ዎደን ቢታይ ሳምባታ ቦንችሸ ኡፋይታና። ኤንቲ ታ ኪታ ካꬍዳ ግሾነ ታ ዎጋ ለቅዳ ግሾ ባንታ ናጋራ ሴራ ኤካና።

44 ግዶሽን፥ ኤንቲ ባንታ ሞርከታ ቢታን ደእዳ ዎደ ኩመꬅ ꬋያና ጋካናዉ ኤንታራ ደእያ ታ ጫቁዋ መንꬅከ፤ ኤንታ የግከ። ታኒ፥ ጎዳ ኤንታ ፆሳ። 45 ታኒ ኤንታ ፆሳ ግዳናዉ፥ ካዎተꬃት ፄልሽን፥ ግብፀ ቢታፈ ከስዳ ኤንታ ማይዛታራ ታኒ ጫቅዳ ጫቁዋ ኤንታ ግሾ ሀሳያና። ታኒ ጎዳ።

46 ጎዳይ ሲና ዙማ ቦላ ሙሰ ባጋራ ባፐነ እስራኤለ አሳፐ ግዶን ዎꬅዳ ዎጋት ኪታትነ ህገት ሀይሳታ።