1 ጎዳይ ሙሰኮ ሀይሳዳ ያግስ። 2 እስራኤለ አሳስ ሀይሳዳ ያጋዳ ኦዳ፤ እስ አስ ጎዳስ አሰ እማናዉ ቃንግኮ፥ ዎዞ ጋትያ ነ ጋማትዳይሳ መላ ሄ ኡራ ግሾ ሚሸ ቃንፆ። 3 ላታሙ ላይꬃፈ ብድ ኡሱፑን ታሙ ላይꬅ ጋካናዉ ደእያ አደ ግድኮ ጌሻ ዱንካነን ኤረትዳ ምዛነን ኡሱፑን ፄቱ ብራ ሳንትመ ቃንፆ። 4 ማጫ ግድኮ ሀስታሙ ብራ ሳንትመ ቃንፆ። 5 እቻሹ ላይꬃፈ ብድ ላታሙ ላይꬅ ጋካናዉ ደእያ አደ ግድኮ ላታሙ ብራ ሳንትመ ቃንፆ፤ ቃስ ማጫስ ግድኮ ታሙ ብራ ሳንትመ ቃንፆ። 6 እስ አጌናፐ ብድ እቻሹ ላይꬅ ጋካናዉ ደእያ አደ ግድኮ እቻሹ ብራ ሳንትመ ቃንፆ፤ ቃስ ማጫስ ግድኮ ሄꬑ ብራ ሳንትመ ቃንፆ። 7 ላይꬅ ኡሱፑን ታማነ እያፐ ቦላ ግድዳ አደ ግድኮ፥ ታማነ እቻሹ ብራ ሳንትመ፤ ቃስ ማጫስ ግድኮ ታሙ ብራ ሳንትመ ቃንፆ። 8 ቃንግዳ ኡራይ ኔኒ ጋማትዳይሳ ቃንፃናዉ ዳንዳኦና ማንቆ ግድኮ፥ እ ባ ቃንገꬃ ጋꬃናዉ እምዳ ኡራ ኤህድ ካህንያ ስንꬃን ኤሶ፤ ቃንገትዳ ኡራይ ቃንፃናዉ ዳንዳኤይሳ ኬና ቆፕድ ካህነይ ጋማቶ።

9 እስ አስ ጎዳስ ያርሾ ኦꬅድ እማናዉ ቃንግዳይ መሄ ግድኮ ጎዳስ እመትያ መሄ ኡባይ ጌሽ ግዴስ። 10 ሄ መህያ ግሾ ሀራ መሄ እሞፎ፤ ዎይኮ እያ ሀራ መሄራ ላሞፎ። ሎኡዋ ኢታራ ዎይኮ ኢታ ሎኡዋራ ላሞፎ፤ ሽን እ ላምኮ፥ ኮይሮ መሄይነ ላመ እምዳ መሄይ ናምአይካ ጌሽ ግዶ። 11 እስ አስ ጎዳስ ያርሾ ኦꬅድ እማናዉ ገፕዳ መሄይ ጌሽ ግዶና እፅኮ፥ ሄ ኡራይ ሄ መህያ ካህንያ ስን ኤሆ። 12 ሎኦ ግድን፥ ኢታ ግድን ካህነይ ሄ መህያ ጋማቶ፤ ካህነይ ጋማትዳይስ እያዉ ጋተ ግዶ። 13 ሽን ሄ መህያ ጎዳይ ዛሪድ ዎዛናዉ ኮይኮ፥ ሄ መህያ ጋትያ ቦላ ፄታፐ ላታሙ ኩሸ ጉጆ።

14 እስ አስ ባ ኬꬃ ጌሽ ኦꬅድ ጎዳስ ዱማይኮ፥ ሎኦ ግድን፥ ኢታ ግድን ካህነይ ሄ ኬꬃ ጋማቶ፤ ካህነይ ጋማትዳይስ እያዉ ጋተ ግዶ። 15 ባ ኬꬃ ጌሽ ኦꬅድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ሄ ኬꬃ ጋትያ ቦላ ፄታፐ ላታሙ ኩሸ ጉጆ፤ ስሚድ ኬꬃይ እያባ ግዴስ።

16 እስ አስ ባ ላታ ጋድያፐ ሻክድ ጌሽ ኦꬅድ ጎዳስ ዱማይኮ፥ ሄ ጋድያ ጋተይ እያን ዘረትያ ዘረꬃን ጋማተቶ። ሄስካ ናምኡ ፄታነ ላታሙ ክሎ ግራመ ባንጋ ዘርያ ጋደ ግድኮ፥ እሻታሙ ሳቅለ ቃንፆ። 17 እ ባ ጋድያ እሻታማንꬆ ላይꬃ ባለፐ ዶምድ ጌሽ ኦꬅድ ጎዳስ ዱማይኮ፥ ሄ ጋድያ ኩመꬃ ጋትያ ቃንፆ። 18 ሽን እ ባ ጋድያ እሻታማንꬆ ላይꬃ ባለይ አꬍን፥ ጌሽ ኦꬅድ ጎዳስ ዱማይኮ፥ ካልድ ደእያ እሻታማንꬆ ላይꬃ ባለይ ጋካናዉ ደእያ ላይꬃታ ካህነይ ታይብድ፥ እያ ኩመꬃ ጋትያፐ ዎꬎ። 19 ሄ ጋድያ ጌሽ ኦꬅድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ጋማተትዳ ጋትያ ቦላ ፄታፐ ላታሙ ኩሸ ጉጆ፤ ስሚድ ጋደይ እያባ ግዴስ። 20 ሽን እ ጋድያ ዛሪድ ዎዛናፐ ስን ሀራ አሳስ ባይዝኮ፥ ሄ ጋድያ ዎዛናዉ ዳንዳኤና። 21 እሻታማንꬆ ላይꬃ ባለይ ጋክን ጋደይ የደትያ ዎደ ሄ ጋደይ ናምአንꬆ ጉየ ስሞና ጎዳስ ጌሽ ግዶ፤ ሄ ጋደይ ካህነታባ ግዴስ።

22 እስ አስ ሀራ አሳፐ ሻምዳ ጋድያ ጌሽ ኦꬅድ ጎዳስ ዱማያናዉ ኮይኮ፥ 23 ካልያ እሻታማንꬆ ላይꬃ ባለይ ጋካናዉ ደእያ ጋትያ ካህነይ ጋማትኮ፥ ኡራይ ሄ ጋላስ ጋማትዳ ጋትያ ቃንፆ፤ ሄ ሚሸይ ጎዳስ ዱማትዳ ሚሸ ግዳና። 24 እሻታማንꬆ ላይꬃ ባለይ ጋክያ ዎደ ሄ ጋደይ ኮይሮ ላታን ኤክድ ባይዝዳ ኡራስ ስሜስ።

25 ኤንታ ጋተይ ጌሻ ዱንካንያን ኤረትዳ ምዛነን ጋማተቴስ። (እስ ሳቅለይ ላታሙ ጌራ ግዴስ)።

26 ሽን ኦንካ ባይራ የለትዳ መሄ ጎዳስ ዱማይድ ሺሻናዉ ዳንዳኤና፤ እ ካሰካ ጎዳባ። ሚዝ ዎይኮ ዶርሰ ግድን ጎዳባ። 27 ሄ መሄይ ጌሽ ግዶና እፅኮ፥ እ ጋማተትዳ ጋትያ ቦላ እቻሻፐ እስ ኩሸ ጉጅድ እያ ጎዳይ ዛሪድ ዎዞ። እ ዎዞና እፅኮ፥ ጋማተትዳ ጋትያን ሀራ አሳስ ባይዘቶ።

28 እስ አስ ጎዳስ ዱማይድ እምዳባይ አይባ ግድኮካ፥ አሰ ዎይኮ መሄ ዎይኮ እያ ላታ ጋደ ግድን፥ ባይዘተናነ ዎዘተና። እ ዱማይዳባ ኡባይ ጎዳስ ኡባፈ ጌሽ። 29 አሳ ግዶፈ ሀይቃና መላ ፕርደትዳ አስ ኦንካ ዎዘቶፎ፤ ሄ ኡራይ ሀይቆ።

30 ጋደን ካፅዳ ካꬅ ዎይኮ ምꬃ አይፈ ግድን ታማፈ እሶይ ጎዳባ። ሄስ ጎዳስ ጌሽ። 31 እስ አስ ባ አስራታ ዎዛናዉ ኮይኮ፥ እያ ጋትያ ቦላ ፄታፐ ላታሙ ኩሸ ጉጅድ ዎዞ። 32 ሚዛ አስራታ ዎይኮ ዶርሳ አስራታ ዎይኮ ዴሻ አስራታ ግድን፥ ሄንꬃንቹዋ ፃምአፈ ጋርሳራ አꬍያ ታማፈ እሶይ ጎዳስ ጌሽ። 33 ታማንꬆ መሄይ ኢታ ግድን፥ ሎኦ ግድን ዶሮፖ፤ ዎይኮ እያ ሀራራ ላሞፎ። ላምኮ፥ ኮይሮይነ ላመ እምዳ ናምአይ ጎዳስ ጌሽ ግዶሶና፤ ዛሪድ ዎዛናዉ ዳንዳኤተና።

34 ሲና ዙማ ቦላ ጎዳይ ሙሰ ባጋራ እስራኤለ አሳ ኪትዳ ኪታይ ሀይሳ።