ታይቦ ማፃፋይ፥ እስራኤለ አሳይ ሲና ዙማፐ ደንድዳ ዎደፐ ዶምድ፥ ፆሳይ ኤንታዉ እማና ግድ ቃላ ገልዳ ቢታስ ዶሎሀ ባጋ ዛዋ ጋካናዉ ሄመትዳ ኦይታሙ ላይꬃ ታርከ ኦዴስ። ማፃፋ ሱንꬃይ፥ እስራኤለ አሳይ ሲና ዙማፐ ደንድድ ባናፐ ስን፥ እስ የለታፐ ጉየ ዮርዳኖሰ ሻፋፐ ዶሎሀ ባጋን፥ ሞአበ ቢታን፥ ሙሰይ አሳ ታይብዳ ታይቡዋ በሴስ። ናምኡ ታይቦታፐ ግዶን ደእያ ዎደን፥ እስራኤለ አሳይ ካናነፐ ዱገሀ ባጋ ዛዋን ደእያ ቃደስ-ባርነ ማትድ ደኤስ። ግዶሽን፥ ኤንቲ ፆሳይ እማና ግዳ ቢታ ያራ ገላናዉ ዳንዳእቦኮና። ሄሳ ግሾ፥ ኤንቲ ሄ ሄራን ዳሮ ላይꬅ አꬅዳፐ ጉየ፥ ዮርዳኖሰ ሻፋፐ ዶሎሀ ባጋራ ደእያ ቢታ ጋክዶሶና። ኤንታፈ ባጋይ ያን ዳናዉ ቆፋ ቃችን፥ አትዳ አሳይ ዮርዳኖሰ ፕንድ፥ ካናነ ባናዉ ባንታና ጊግስዶሶና።

ታይቦ ማፃፋይ፥ ዳሮ መቶይ ጋክያ ዎደ ያይያነ ኡፋይስ ቃንፅያ አሳ ታርከ በሴስ። ፆሳ ቦላነ ኤንታ ካለꬃና መላ ፆሳይ ዶርዳ ሙሰ ቦላ ጌላተꬃን ደንድዳ አሳ ታርከ ቆንጭሴስ። አሳይ ዳቡራንቾነ ኪተቶና ደረ ግድኮካ፥ ፆሳይ አማንꬅያ ፆሰ ግድድ፥ ኤንታ ናግድ ዎꬅዳይሳ ታርከይ ኦዴስ። ሄሳዳካ፥ ሙሰይ እስ እስ ቶሆ ዳንዳአ ꬋይኮካ፥ ምኖ አማኖይ እያዉ ደእያ ግሾ፥ ፆሳስነ አሳስ አማነትድ ኦꬅያ አስ ግድድ በንትስ።